যদি আপুনি ভাৰতৰ গ্ৰাম্য অঞ্চলৰ ১৪ৰ পৰা ১৮ বছৰ বয়সৰ এগৰাকী কিশোৰ বা কিশোৰীক দ্বিতীয় শ্ৰেণীতে পঢ়ি অহা আৰু নিজৰ মাতৃভাষাতে লিখা থকা এটা শাৰী পঢ়িবলৈ দিয়ে, অথবা তৃতীয় বা চতুৰ্থ শ্ৰেণীতে শিকা তিনিটা সংখ্যাৰ হৰণ অংক এটা কৰিবলৈ দিয়ে, তেন্তে হয়তো তেওঁলোকৰ প্ৰদৰ্শন দেখি আপুনি নিৰাশ হৈ পৰাৰ সম্ভাৱনাই অধিক। শেহতীয়াকৈ প্ৰকাশ পোৱা বাৰ্ষিক শিক্ষাৰ স্থিতিৰ প্ৰতিবেদন বা এ এছ ই আৰৰ প্ৰতিবেদনত প্ৰকাশ পাইছে গ্ৰামাঞ্চলত শিক্ষাৰ পয়ালগা স্বৰূপ।
‘প্ৰথম’ৰ দ্বাৰা প্ৰকাশিত এ এছ ই আৰৰ ২০২৩ৰ প্ৰতিবেদনত পোহৰলৈ আহিছে দেশৰ ১৪-১৮ বছৰ বয়সৰ ভিতৰৰ কিশোৰ-কিশোৰীৰ শৈক্ষিক সক্ষমতা। দেশৰ ২৮ খন ৰাজ্যৰ ২৬ খন জিলাত চলোৱা সমীক্ষাৰ জৰিয়তে কিশোৰ-কিশোৰীসকল মৌলিক আৰু ব্যৱহাৰিক শিক্ষাত কিমান সক্ষম সেয়া নিৰ্ধাৰণ কৰা হৈছে। মুঠ ৩৪,৭৪৫ গৰাকী ১৪-১৮ বছৰৰ কিশোৰ-কিশোৰীক লৈ চলোৱা এই সমীক্ষাত তেওঁলোকৰ শিক্ষাৰ মান বুজিবলৈ বিভিন্ন বিষয়ত কেইবাটাও প্ৰশ্ন কৰা হৈছিল। শিক্ষাৰ্থী সকলক নিজ মাতৃভাষাত দ্বিতীয় শ্ৰেণীৰ পাঠ্যক্ৰমৰ এটা শাৰী পঢ়িবলৈ দিয়া হৈছিল। তদুপৰি সৰল ইংৰাজী বাক্যও পঢ়িবলৈ দিয়া হৈছিল। কিশোৰ-কিশোৰীসকলৰ হিচাবৰ সক্ষমতা বুজিবলৈ তৃতীয়-চতুৰ্থ শ্ৰেণীতে পঢ়িবলৈ পোৱা তিনিটা সংখ্যাৰ হৰণ অংক কৰিবলৈ দিয়া হৈছিল, স্কেলেৰে জোখমাখ কৰিবলৈ দিয়া হৈছিল, সময়ৰ হিচাপ উলিয়াবলৈ দিয়া হৈছিল।