নতুন দিল্লীঃ দীৰ্ঘদিন ধৰি দক্ষিণ এছিয়াত উগ্ৰপন্থী আক্ৰমণ, অস্থিৰতা, সন্ত্ৰাসবাদ, সীমান্তৰ উত্তেজনা আদি আন্তঃৰাষ্ট্ৰীয় পৰ্যায়ত অতিশয় চিন্তাৰ বিষয় হৈ আহিছে। বিশেষকৈ কাশ্মীৰ উপত্যকাত উগ্ৰপন্থী কাৰ্যকলাপে বাৰে বাৰে সীমান্ত অতিক্ৰম কৰি আহিছে। ২০২৫ চনৰ এপ্ৰিল মাহত জম্মু-কাশ্মীৰৰ পেহেলগামত নিৰীহ পৰ্যটকৰ হত্যাকাণ্ডই কেৱল ভাৰতৰ বাবেই নহয় সমগ্ৰ অঞ্চলটোৰ বাবে এক অভূতপূৰ্ব নজিৰ গঢ়ি তুলিছিল। এইবাৰ সেই অত্যাচাৰৰ প্ৰতি সঁহাৰি জনাই কঠোৰ পদক্ষেপ গ্ৰহণ কৰিলে আমেৰিকাই।
বৃহস্পতিবাৰে আমেৰিকাৰ বিদেশ মন্ত্ৰালয়ে ঘোষণা কৰে যে ‘দ্য ৰেজিষ্টেন্স ফ্ৰণ্ট’ (টিআৰএফ)ক বিদেশী সন্ত্ৰাসবাদী সংস্থা (এফ টি অ’) আৰু বিশেষভাৱে নিৰ্ধাৰিত গ্ল’বেল টেৰ’ৰিষ্ট (এছ ডি জি টি) হিচাপে তালিকাভুক্ত কৰা হৈছে। বিদেশ সচিব মাৰ্কো ৰুবিঅ’ই স্পষ্ট কৰি দিয়ে যে এই পদক্ষেপ তেওঁলোকৰ স্বাৰ্থত আৰু আন্তঃৰাষ্ট্ৰীয় নিৰাপত্তা শক্তিশালী কৰাৰ লগতে পেহেলগাম হত্যাকাণ্ডৰ ন্যায় নিশ্চিত কৰিবলৈ লোৱা হৈছে।
উল্লেখ্য যে, চলিত বৰ্ষৰ ২২ এপ্ৰিলত পেহেলগামৰ বিখ্যাত বৈছাৰণ হ্ৰদৰ সমীপত হিন্দু আৰু খ্ৰীষ্টানৰ লগতে স্থানীয় এজন মুছলমানকে ধৰি ২৬ জন পৰ্যটকক গুলীয়াই হত্যা কৰিছিল পাঁচজন সশস্ত্ৰ উগ্ৰপন্থীয়ে। তদন্তত প্ৰকাশ পাইছে যে এম ৪ কাৰবাইন আৰু এ কে-৪৭ ৰাইফল লৈ আক্ৰমণকাৰীয়ে নিৰ্বাচিত হত্যাকাণ্ড সংঘটিত কৰিছিল। আক্ৰমণৰ লগে লগে টি আৰ এফে ভাৰতত দায়িত্ব স্বীকাৰ কৰে যদিও কেইদিনমানৰ পিছত নতুন বিবৃতি প্ৰকাশ কৰি সকলো জড়িত হোৱাৰ কথা অস্বীকাৰ কৰে।
পাকিস্তানস্থিত কুখ্যাত লস্কৰ-ই-তৈবাৰ শাখা সংগঠন টি আৰ এফ গঠন কৰা হৈছিল ২০১৯ চনত। ভাৰতীয় চোৰাংচোৱা আৰু আন্তঃৰাষ্ট্ৰীয় নিৰীক্ষণৰ মতে, এফ এ টি এফৰ হেঁচা হ্ৰাস কৰিবলৈ এল ই টিয়ে একাধিক ছাঁয়া সংগঠন গঠন কৰিছিল, যাৰ ফলত পাকিস্তানৰ ভূমিকাক অস্বীকাৰ কৰাটো সহজ হৈ পৰিছিল। টি আৰ এফে স্থানীয় অসন্তুষ্টি, প্ৰতিবাদ, আৰু তথাকথিত ‘অধিকাৰ প্ৰতিষ্ঠা’ৰ কাহিনীক উজ্জ্বল কৰি নিজৰ পৰিচয় শক্তিশালী কৰিব বিচাৰে, যদিও ইয়াৰ মূল নেতৃত্ব আৰু গাঁথনি পাকিস্তানৰ পৰা পৰিচালিত হয়। এই সংগঠনটোৰ নেতৃত্বত আছে শ্বেখ ছাজ্জাদ গুল, যিজনক ইতিমধ্যে ভাৰতত সন্ত্ৰাসবাদী হিচাপে চিহ্নিত কৰা হৈছে।
ইফালে, এই আক্ৰমণৰ পিছত ভাৰত আৰু পাকিস্তানৰ সম্পৰ্ক পুনৰ অস্থিৰ হৈ পৰে। ভাৰতে ১৯৬০ চনৰ সিন্ধু জল চুক্তি সাময়িকভাৱে স্থগিত ৰাখি সীমান্ত আৰু আকাশমাৰ্গত বাধা আৰোপ কৰে। ইয়াৰ প্ৰতিক্ৰিয়া স্বৰূপে পাকিস্তানেও বাণিজ্যিক আৰু কূটনৈতিক পৰ্যায়তো বিভিন্ন নিষেধাজ্ঞা আৰোপ কৰে।
ইফালে, টি আৰ এফক ব্লেকলিষ্ট কৰাৰ আমেৰিকাৰ এই পদক্ষেপক ভাৰতে তীব্ৰ সমৰ্থন জনাই প্ৰধানমন্ত্ৰী নৰেন্দ্ৰ মোদী আৰু বৈদেশিক মন্ত্ৰী এছ জয়শংকৰে ইয়াক “শূন্য সহনশীলতা নীতিৰ প্ৰতি দৃঢ় প্ৰতিশ্ৰুতি আৰু ভাৰত-আমেৰিকাৰ সন্ত্ৰাসবাদ বিৰোধী সহযোগিতাৰ এক নতুন অধ্যায়” বুলি অভিহিত কৰে।
আমেৰিকাৰ দূতাবাসৰ বিবৃতিত দুয়োখন দেশৰ নিৰীক্ষণ আৰু যৌথ প্ৰচেষ্টাৰ ওপৰতো গুৰুত্ব আৰোপ কৰা হৈছে। ইয়াৰ উপৰিও সচিব ৰুবিঅ’ই পাকিস্তানক তদন্তত প্ৰত্যক্ষভাৱে সহায় কৰিবলৈ আহ্বান জনায়।
‘দ্য ৰেজিষ্টেন্স ফ্ৰণ্ট’ক ব্লেকলিষ্ট কৰাৰ সিদ্ধান্তই কাশ্মীৰত উগ্ৰপন্থীৰ বিৰুদ্ধে বিভিন্ন দেশ আৰু বিশ্ব সংগঠনলৈ এক নতুন সতৰ্কবাণী প্ৰেৰণ কৰিছে। বিশেষজ্ঞসকলৰ মতে দক্ষিণ এছিয়াৰ শান্তিৰ স্বাৰ্থত এনে সচেতন হেঁচাত শক্তিশালী আৰু ফলপ্ৰসূ ব্যৱস্থা গ্ৰহণ কৰাটো অতি প্ৰয়োজনীয়।
