গুৱাহাটীঃ নাগৰিকত্ব আইন সংশোধন বিৰোধী মঞ্চৰ নেতৃত্বত প্ৰতিবাদ কৰি অহা ৰাজ্যৰ কেইবাগৰাকী বুদ্ধিজীৱী, সমাজকৰ্মী, প্ৰাক্তন সাংবাদিকে সোমবাৰে সদৌ অসম ছাত্ৰ সন্থাৰ কেন্দ্ৰীয় নেতৃত্বৰে আলোচনাত বহে৷ মহানগৰীৰ উজানবজাৰস্থিত শ্বহীদ ন্যাসত কেইবাগৰাকী বুদ্ধিজীৱী তথা প্ৰাক্তন সাংবাদিক আৰু সমাজকৰ্মীৰ দলটোৰ সৈতে আছু নেতৃত্বই দীৰ্ঘ সময় বাংলাদেশৰ হিন্দু শৰণাৰ্থী অসমত সংস্থাপন আৰু নাগৰিকত্ব সংশোধনী আইন সন্দৰ্ভত আলোচনা কৰে৷
দীৰ্ঘ সময়ৰ অন্তত অসমৰ বুদ্ধিজীৱীয়ে আছুৰ সৈতে আলোচনাত বহে৷ অসম আন্দোলনৰ সময়ৰ পিছৰে পৰা আছুৱে একাংশ বুদ্ধিজীৱীৰ পৰামৰ্শ গ্ৰহণ কৰা নাছিল৷ বিশেষকৈ ড০ হীৰেণ গোহাঁইৰ কাষ চপা নাছিল আছুৱে৷ অসম আন্দোলনত ঘোৰ বিৰোধী আৰু সময়ে সময়ে বাতৰি কাকতৰ জৰিয়তে আছুক যোগাত্মক সমালোচনা কৰি অহা ড০ হীৰেণ গোহাঁইয়ে দীৰ্ঘ সময়ৰ অন্তত আছু নেতৃত্বৰ সৈতে বহে তথা আছুৰ কাৰ্যালয়লৈ আহে৷ শ্বহীদ ন্যাসত ড০ হীৰেন গোঁহাই, উদয়াদিত্য ভৰালী, মনজিত মহন্ত কমল কুমাৰ মেধি উপস্থিত থাকে৷
