গুৱাহাটী/শিৱসাগৰঃ কৃষক মুক্তি সংগ্ৰাম সমিতিৰ নেতা অখিল গগৈয়ে মাওবাদী গোচৰত জামিন লাভ কৰাৰ পাছতে পুনৰ গ্রেপ্তাৰ কৰে শিৱসাগৰ আৰক্ষীয়ে৷ নাগৰিকত্ব সংশোধনী বিধেয়ক (বৰ্তমান নাগৰিকত্ব সংশোধনী আইন)ৰ বিৰুদ্ধে শিৱসাগৰত হোৱা গণপ্ৰতিবাদৰ সময়ত ৰুজু কৰা এক গোচৰত গুৱাহাটী কেন্দ্ৰীয় কাৰাগাৰৰ পৰাই শিৱসাগৰ আৰক্ষীয়ে গ্ৰেপ্তাৰ কৰে অখিল গগৈক৷
বৃহস্পতিবাৰে পুৱা প্ৰায় ৫.৩০ বজাত শিৱসাগৰ আৰক্ষীৰ এটা দলে কাৰাগাৰৰ পৰা লৈ যায় অখিল গগৈক৷ জানিব পৰা মতে, NIAৰ আদালতত জামিন লাভৰ সম্ভাৱনা প্ৰকট হৈ পৰাৰ পৰিপ্ৰেক্ষিততে অখিলক পুনৰ গ্ৰেপ্তাৰ কৰিবলৈ যোৱা তিনি দিনৰ পৰা গুৱাহাটীত বাহৰ পাতি আছিল শিৱসাগৰ আৰক্ষীৰ উক্ত দলটো।
ইফালে, কাহিলীপুৱাতেই গ্ৰেপ্তাৰ কৰি দুপৰীয়াৰ ভাগত আৰক্ষীৰ দলটোৱে অখিল গগৈক লৈ শিৱসাগৰত উপস্থিত হোৱাৰ সময়তে সৃষ্টি হয় এক উত্তেজনাময় পৰিস্থিতিৰ৷ জয় আই অসম, অখিল গগৈৰ বিৰুদ্ধে ষড়যন্ত্ৰ নচলিব, অখিল গগৈক মুক্তি দিয়ক আদি শ্লগানেৰে শিৱসাগৰ সদৰৰ সন্মুখত তীব্ৰ প্ৰতিবাদ সাব্যস্ত কৰে কৃষক মুক্তি সংগ্ৰাম সমিতিৰ লগতে অখিল গগৈৰ একাংশ সংগ্ৰামী সতীৰ্থই৷ শিৱসাগৰ আৰক্ষীয়ে প্ৰতিবাদকাৰী দলটোক বাধা দিবলৈ চেষ্টা চলাই আৰু পৰিস্থিতি নিয়ন্ত্ৰণ কৰে৷
উল্লখ্য যে, বিগত বৰ্ষৰ ১১ ডিচেম্বৰত নাগৰিকত্ব সংশোধনী আইনৰ বিৰুদ্ধে শিৱসাগৰ সদৰত কৃষক নেতা অখিল গগৈৰ নেতৃত্বত গ্ৰহণ কৰা হৈছিল এক প্ৰতিবাদী কাৰ্যসূচী৷ সেই প্ৰতিবাদী কাৰ্যসূচীক লৈয়ে অখিল গগৈৰ বিৰুদ্ধে শিৱসাগৰ আৰক্ষীয়ে ৰুজু কৰা ১৩৪৪/২০১৯ নং গোচৰৰ ভাৰতীয় দণ্ডবিধিৰ ১২০(বি) ১৪৩/১৫০/১৫৩/১৫৩(এ)/১৫৭/১৫৮/১৮৮/১৮৩/২৯১/৪৩১ ধাৰাত আজি পুনৰ গ্ৰেপ্তাৰ কৰে শেৱসাগৰ আৰক্ষীয়ে৷
জানিব পৰা মতে, শিৱসাগৰ আৰক্ষীয়ে ৪ দিনৰ জিম্মাত লৈছে অখিল গগৈকে। এনেদৰে আজি গুৱাহাটীৰ কাৰাগাৰৰ পৰাই গ্ৰেপ্তাৰ কৰাৰ পিছত একেৰাহে ৯০ দিনতকৈয়ো অধিক সময় ধৰি মুকলি আকাশ নেদেখাকৈয়ে বন্দী জীৱন কটাবলগীয়াত পৰিছে কৃষক নেতাজন। দিনৰ পিছত দিন ধৰি কৃষক নেতাজনক আৱদ্ধ কৰি ৰখাৰ বিৰুদ্ধে বিগত সময়ছোৱাত একাধিক দল-সংগঠনে প্ৰতিবাদ সাব্যস্ত কৰি আহিছে যদিও তেনে প্ৰতিবাদলৈ চৰকাৰে কোনোধৰণৰ গুৰুত্ব প্ৰদান কৰা পৰিলক্ষিত হোৱা নাই।