গুৱাহাটীঃ অসমীয়া জাতিক অস্বিত্বৰ সংকটত পেলাই বিজেপি নেতৃত্বৰ কেন্দ্ৰ ৰাজ্য চৰকাৰে অসমত ধৰ্মৰ ভিত্তিত হিন্দু বাংলাদেশীক সংস্থাপন কৰিব বিচৰা কাণ্ডৰ বিৰুদ্ধে যোৱা দুটা বছৰে গণ আন্দোলন অব্যাহত আছে৷ তাৰ মাজতে অসমৰ এটা সংগঠনে হিন্দু বাংলাদেশী সংস্থাপনৰ চৰকাৰৰ প্ৰচেষ্টাক সমৰ্থন কৰা বুলি প্ৰচাৰ হোৱা খবৰে ৰাজ্যত তীব্ৰ চাঞ্চল্যৰ সৃষ্টি কৰিছে৷
অসম সত্ৰ মহাসভাই হিন্দু বাংলাদেশী সংস্থাপনক সমৰ্থন কৰা বুলি আৰু যোৱা ১৭ এপ্ৰলিত সংসদীয় যুটীয়া সমিতিয়ে দিল্লীত অনুষ্ঠিত কৰা শুনানিত অসম সত্ৰ মহাসভাৰ প্ৰতিনিধি উপস্থিত থাকি বাংলাদেশী সংস্থাপনক সমৰ্থন কৰি বক্তব্য প্ৰকাশ কৰি বুলি খবৰ প্ৰচাৰ হয়৷ যোৱা দুদিন ধৰি এই ঘটনাৰ বিৰুদ্ধে বিভিন্ন পক্ষই প্ৰতিক্ৰিয়া প্ৰকাশ কৰিছে৷ দিল্লীত বাহৰ পাতি থকা আছুৰ মুখ্য উপদেষ্টা সমুজ্জ্বল কুমাৰ ভট্টাচাৰ্যই তীব্ৰ প্ৰতিক্ৰিয়া প্ৰকাশ কৰি শীঘ্ৰে সত্ৰ মহাসভাক স্থিতি স্পষ্ট কৰাৰ দাবী জনায়৷
