যোৱাটো বাৰিষাৰ আগৰ পৰাই অসম-মেঘালয়ৰ সীমান্তত অৱস্থিত উচ্চ শিক্ষাৰ প্ৰতিষ্ঠান ইউনিভাৰ্চিটি অৱ চায়েন্স এণ্ড টেকন’লজি মেঘালয় বা ইউএছটিএমৰ বিৰুদ্ধে সৰৱ হৈ আহিছিল অসমৰ মুখ্যমন্ত্ৰী হিমন্ত বিশ্ব শৰ্মা। ‘ফ্লাড জেহাদ’ৰ পৰা ‘ভুৱা ডিগ্ৰী’ আৰু ‘ভুৱা অবিচি প্ৰমাণপত্ৰ’লৈকে একাধিক বিশেষণ আৰু অভিযোগেৰে প্ৰায়ে মুখ্যমন্ত্ৰীয়ে আক্ৰমণ কৰি আহিছে ইউএছটিএম আৰু স্বত্বাধিকাৰ মহবুবুল হকক। ইয়াৰ মাজতে শেহতীয়াকৈ স্বত্বাধিকাৰ তথা ইউএছটিএমৰ আচাৰ্য মহবুবুল হকক অসম আৰক্ষীয়ে গ্ৰেপ্তাৰ কৰাৰ লৈ অসম আৰু মেঘালয়ত সূত্ৰপাত ঘটিছে ৰাজনৈতিক উত্তেজনাৰ।
উল্লেখ্য যে, ২০১১ চনত মেঘালয়ৰ ৰি-ভোই জিলাত স্থাপন কৰা হৈছিল ব্যক্তিগত বিশ্ববিদ্যালয় ইউএছটিএম। পাহাৰ কাটি নিৰ্মাণ কৰা এই বিশ্ববিদ্যালয়খনৰ বাবেই যোৱাটো বাৰিষাত গুৱাহাটীত কৃত্ৰিম বানৰ সৃষ্টি হোৱা বুলি বিস্ফোৰক দাবী কৰিছিল অসমৰ মুখ্যমন্ত্ৰী হিমন্ত বিশ্ব শৰ্মাই।
কিন্তু অসম আৰক্ষীৰ বিশেষ টাস্ক ফ’ৰ্চে শনিবাৰে নিশা গুৱাহাটীৰ বাসগৃহৰ গ্ৰেপ্তাৰ কৰে ইউএছটিএমৰ স্বত্বাধিকাৰ মহবুবুল হকক। শ্ৰীভূমিত শিক্ষা গৱেষণা আৰু উন্নয়ন ফাউণ্ডেচনৰ উদ্যোগত অনুষ্ঠিত কেন্দ্ৰীয় পাব্লিক স্কুলৰ পৰীক্ষাত অনিয়মৰ অভিযোগ উত্থাপন হোৱাৰ পিছতে মহবুবুল হকক গ্ৰেপ্তাৰ কৰা হয়।
মহবুবুল হক এই ফাউণ্ডেশ্যনৰো অধ্যক্ষ পদত আছে, যাৰ অধীনত দুখন বিদ্যালয় আৰু ইউ এছ টি এম চলি আছে। ইয়াৰ উপৰিও যোৱা বছৰ হকে উত্তৰ-পূৰ্বাঞ্চলৰ প্ৰথমখন ব্যক্তিগত চিকিৎসা মহাবিদ্যালয়ও আৰম্ভ কৰিছিল।
দৰাচলতে শুকুৰবাৰে শ্ৰীভূমি জিলাৰ পথাৰকান্দিৰ চেণ্ট্ৰেল পাব্লিক স্কুলত চিবিএছই ব’ৰ্ডৰ অধীনত দ্বাদশ শ্ৰেণীৰ পৰীক্ষা চলি আছিল। কিন্তু পৰীক্ষা শেষ হোৱাৰ পিছত একাংশ ছাত্ৰ-ছাত্ৰীয়ে হুলস্থুলৰ সৃষ্টি কৰিবলৈ আৰম্ভ কৰে।
পথাৰকান্দি আৰক্ষী থানাৰ ভাৰপ্ৰাপ্ত বিষয়া সোমেশ্বৰ কোঁৱৰৰ মতে, শুকুৰবাৰে চেণ্ট্ৰেল পাব্লিক স্কুলত চিবিএছইৰ দ্বাদশ শ্ৰেণীৰ পদাৰ্থ বিজ্ঞানৰ পৰীক্ষাৰ সময়ত তীব্ৰ উত্তেজনাপূৰ্ণ পৰিস্থিতিৰ সৃষ্টি হৈছিল। অভিযোগ অনুসৰি, পৰীক্ষাত একাংশ শিক্ষাৰ্থীক শিক্ষা গৱেষণা আৰু উন্নয়ন ফাউণ্ডেচনে অধিক নম্বৰ লাভ কৰাত সহায় কৰিব বুলি ধন সংগ্ৰহ কৰিছিল।
এই অভিযোগক লৈয়ে শ্ৰীভূমি আৰক্ষীয়ে ৰুজু কৰা এক গোচৰৰ ভিত্তিত ইউএছটিএমৰ চ্যান্সেলৰ আৰু চেণ্ট্ৰেল পাব্লিক স্কুলৰ অধ্যক্ষকে ধৰি ছয়জন লোকক গ্ৰেপ্তাৰ কৰে। বৰ্তমান এই আটাইকেইজন লোকক জিলা আদালতে জেললৈ প্ৰেৰণ কৰিছে।
শ্ৰীভূমি জিলাত নিয়োজিত এজন আৰক্ষী বিষয়াৰ মতে, একাংশ ছাত্ৰ-ছাত্ৰীয়ে দাবী কৰে যে তেওঁলোকে গোটেই সময়খিনি ইউএছটিএমত ক্লাছত অংশ লৈছিল। আৰক্ষীয়ে জনোৱা মতে, আন আন জিলাৰ ছাত্ৰ-ছাত্ৰীসকলক সহজেই উত্তীৰ্ণ কৰোৱাৰ প্ৰতিশ্ৰুতিৰে পৰীক্ষা দিবলৈ এই কেন্দ্ৰটোলৈ অনা হৈছিল।
পৰৱৰ্তী সময়ত মুখ্যমন্ত্ৰী হিমন্ত বিশ্ব শৰ্মাই ছ’চিয়েল মিডিয়া প্লেটফৰ্ম এক্সত ২০৯ গৰাকী ছাত্ৰ-ছাত্ৰীৰ তালিকা শ্বেয়াৰ কৰি লিখে, “ইউএছটিএমৰ স্বত্বাধিকাৰী মহবুবুল হকে চি বি এছ ই পৰীক্ষাত উচ্চ নম্বৰ পোৱাৰ প্ৰতিশ্ৰুতি দিয়া সেইসকল ছাত্ৰ-ছাত্ৰীৰ নাম এইবোৰ।” তেওঁ আগলৈ লিখিছে, "অসম আৰক্ষীয়ে বিষয়টোৰ তদন্ত কৰি আছে আৰু এটা গোচৰ ৰুজু হৈছে। এইটো এটা গুৰুতৰ বিষয় আৰু আমি সংশ্লিষ্ট সকলো পক্ষৰ পৰা সহযোগিতা আশা কৰিছো।"
ইউএছটিএমৰ বিৰুদ্ধে মুখ্যমন্ত্ৰীৰ ‘ফ্লাড জেহাদ’ৰ অভিযোগ
মাত্ৰ কেইটামান মাহ পূৰ্বে অৰ্থাত্ বাৰিষাৰ সময়ত ইউএছটিএম আৰু মহবুবুল হকৰ বিৰুদ্ধে ফ্লাড জেহাদ চলোৱাৰ অভিযোগ উত্থাপন কৰিছিল মুখ্যমন্ত্ৰী হিমন্ত বিশ্ব শৰ্মাই। তেওঁ দাবী কৰিছিল যে চুবুৰীয়া মেঘালয়ত পাহাৰ কাটি বিস্তৃত ইউ এছ টি এম কেম্পাছ নিৰ্মাণ কৰি অসমত ‘ফ্লাড জেহাদ’ চলাইছে মহবুবুল হকে। গুৱাহাটীত সৃষ্টি হোৱা ভয়াবহ কৃত্ৰিম বানৰ বাবেও তেওঁ জগৰীয়া কৰিছিল ইউএছটিএমক।
তদুপৰি যোৱা বছৰৰ আগষ্ট মাহত মুখ্যমন্ত্ৰী হিমন্ত বিশ্ব শৰ্মাই ইউ এছ টি এমৰ পৰা স্নাতক ডিগ্ৰী লাভ কৰা ছাত্ৰ-ছাত্ৰীসকল অসম চৰকাৰৰ চাকৰিৰ বাবে যোগ্য নহ’ব বুলি ঘোষণা কৰিছিল। শেহতীয়াকৈ ইউএছটিএমত ভুৱা ডিগ্ৰী প্ৰদান কৰা হয় বুলিও দাবী কৰিছিল মুখ্যমন্ত্ৰীয়ে। তেওঁ অভিযোগ কৰিছিল যে উপযুক্ত পৰীক্ষা অবিহনেই পিএইচডি ডিগ্ৰী প্ৰদান কৰে ইউএছটিএমে। আনকি মহবুবুল হকে প্ৰৱঞ্চনাৰে অবিচিৰ প্ৰমাণপত্ৰ লাভ কৰাৰো অভিযোগ কৰিছিল হিমন্ত বিশ্ব শৰ্মাই।
এনেদৰে বিগত কেইবামাহৰ পৰা ইউএছটিএম আৰু প্ৰতিষ্ঠাপক মহবুবুল হকৰ বিৰুদ্ধে ইটোৰ পিছত অভিযোগ উত্থাপন কৰি অহাৰ মাজতে পথাৰকান্দিৰ এক গোচৰক লৈ হকক গ্ৰেপ্তাৰ কৰে অসম আৰক্ষীয়ে। ইউএছটিএম আৰু মহবুবুল হকৰ বিৰুদ্ধে মুখ্যমন্ত্ৰীৰ সৰৱ স্থিতি আৰু মাজনিশা হকৰ গ্ৰেপ্তাৰক সহজভাৱে ল’ব পৰা নাই অনেকেই।
অৱশ্যে অসমৰ মুখ্যমন্ত্ৰীৰ স্থিতিৰ বিপৰীতে সদায় ইউএছটিএমৰ পক্ষত থিয় দি আহিছে আন এখন বিজেপিশাসিত ৰাজ্য মেঘালয়ৰ কনৰাড চাংমা নেতৃত্বাধীন চৰকাৰে। অসমৰ মুখ্যমন্ত্ৰীয়ে ইউএছটিএমৰ বিৰুদ্ধে ‘ফ্লাড জেহাদ’ৰ অভিযোগ তোলাৰ সময়তে মুখ্যমন্ত্ৰী কনৰাড চাংমাই কৈছিল- ইউএছটিএম মেঘালয়ৰ অন্যতম প্ৰধান শিক্ষানুষ্ঠান। ইয়াত বৰ কাম চলি আছে।
আনহাতে শেহতীয়াকৈ ইউএছটিএমত ‘ভুৱা ডিগ্ৰী’ প্ৰদান কৰা হয় বুলি মুখ্যমন্ত্ৰী হিমন্ত বিশ্ব শৰ্মাই কৰা অভিযোগৰ সময়তো বিশ্ববিদ্যালয়খনৰ পক্ষতে থিয় দিছিল মেঘালয়ে।
যোৱা বৃহস্পতিবাৰে সাংবাদিকৰ সৈতে হোৱা এক সাক্ষাৎকাৰত মেঘালয়ৰ মুখ্য সচিব ড’নাল্ড পি ৱাহলাঙে কৈছিল, "ইউ এছ টি এম এখন ৰাজ্যিক বিশ্ববিদ্যালয়। ইয়াক মেঘালয় ৰাজ্যিক বিধানসভাৰ অনুমোদন দিয়া হৈছে। ইয়াৰ ডিগ্ৰীসমূহ ইউ জি চি আৰু মেডিকেল কাউন্সিলে স্বীকৃতি দিছে। গতিকে ই যে ভুৱা বিশ্ববিদ্যালয় বুলি কোনো প্ৰশ্নই উত্থাপন নহয়।"
এনে পৰিস্থিতিত প্ৰশ্ন উত্থাপন হয় যে মুখ্যমন্ত্ৰী হিমন্ত বিশ্ব শৰ্মাই কিয় মহবুবুল হকৰ বিৰুদ্ধে এটাৰ পিছত এটাকৈ অভিযোগ উত্থাপন কৰি আহিছে?
এই সকলোবোৰৰ আঁৰৰ কাৰণ কি?
যোৱা কেইবা দশক ধৰি উত্তৰ-পূবৰ ৰাজ্যত সাংবাদিকতা কৰি অহা জ্যেষ্ঠ সাংবাদিক অনিৰ্বাণ ৰয়ে কয়, “যোৱা কেইমাহমানৰ পৰা মুখ্যমন্ত্ৰীয়ে ব্যক্তিগতভাৱে ইউ এছ টি এম আৰু ইয়াৰ প্ৰতিষ্ঠাপক মেহবুবুল হকৰ বিৰুদ্ধে যিদৰে কথা কৈছে, তাৰ আঁৰত কিছু কাহিনী আছে।”
অনিৰ্বাণ ৰয়ে কয়, "এখন বিশ্ববিদ্যালয়ৰ চ্যান্সেলৰক মাজনিশা এছটিএফ পঠিয়াই যিদৰে গ্ৰেপ্তাৰ কৰা হৈছিল, ই চৰকাৰৰ বিষয়ে ৰাইজলৈ ভুল বাৰ্তা প্ৰেৰণ কৰিছে। এনে লাগে যেন হক কোনোবা উগ্ৰপন্থী। অতি গুৰুতৰ গোচৰতহে এছ টি এফ ব্যৱহাৰ কৰা হয়।"
তেওঁ আগলৈ কয়, "ইউএছটিএম এখন উচ্চ শিক্ষানুষ্ঠান, গতিকে এগৰাকী শিক্ষিত মুখ্যমন্ত্ৰীয়ে এনে কাম কৰিব নালাগে যাৰ ফলত ছাত্ৰ-ছাত্ৰীৰ শৈক্ষিক কেৰিয়াৰ বিপদত পৰিব পাৰে। যদি প্ৰতিষ্ঠানটোত কিবা অবৈধ ঘটনা সংঘটিত হৈছে, তেন্তে মুখ্যমন্ত্ৰীয়ে তদন্ত কৰক। কোনো তদন্ত অবিহনে কাৰোবাৰ বিৰুদ্ধে 'ফ্লাড জেহাদ'ৰ অভিযোগ কেনেকৈ উত্থাপন কৰিব পাৰি?"
জ্যেষ্ঠ সাংবাদিকগৰাকীয়ে লগতে কয় যে মুখ্যমন্ত্ৰী হিমন্ত বিশ্ব শৰ্মাৰ বহু সিদ্ধান্তই আচলতে বিতৰ্কিত। তেওঁ কয় যে, ২০২১ চনত যেতিয়া হিমন্ত বিশ্ব শৰ্মাই অসমৰ মুখ্যমন্ত্ৰীৰ পদত বহিছিল, তাৰ পিছত তেওঁ গ্ৰহণ কৰা কেইবাটাও সিদ্ধান্তই বিতৰ্কৰ সৃষ্টি কৰি আহিছে।
বিশেষকৈ অসমৰ ‘বাংলাভাষী মুছলমানসকল’ মুখ্যমন্ত্ৰীৰ ‘চফ্ট টাৰ্গেট’ হোৱাৰ অভিযোগ উত্থাপন হৈ আহিছে। সেয়া মুছলমান সমাজত বাল্যবিবাহৰ কথাই হওক বা বহুবিবাহৰ সৈতে জড়িত বিষয়টোৱেই হওক। ব্যৱস্থা লোৱাৰ সমান্তৰালকৈ মুখ্যমন্ত্ৰী হিমন্তইও এই বিষয়ত বক্তব্য দি আহিছে।
মুখ্যমন্ত্ৰী হোৱাৰ পিছত কংগ্ৰেছৰ পৰা বিজেপিলৈ অহা হিমন্ত বিশ্ব শৰ্মাই অসম বিধানসভাত শুকুৰবৰীয়া নামাজৰ বাবে তিনি ঘণ্টীয়া বিৰতিৰ অন্ত পেলাইছিল। ইয়াৰ পিছত হিমন্ত চৰকাৰে বাংলা মূলৰ মুছলমানসকলক পৃথক কৰি গৰীয়া, মৰিয়া, জলাহ, দেশী আৰু চৈয়দ সম্প্ৰদায়ক ‘খিলঞ্জীয়া মুছলমান’ বুলি ঘোষণা কৰে।
একে সময়তে মুছলমানসকলৰ বিবাহত মৌলবীৰ ভূমিকাৰ অন্ত পেলাই হিমন্ত বিশ্ব শৰ্মা চৰকাৰে সদনত গৃহীত কৰিছিল ‘অসম মুছলিম বিবাহ বিধেয়ক’। ইয়াৰোপৰি অসমত বিবাহ আৰু বিবাহ বিচ্ছেদৰ চৰকাৰী পঞ্জীয়ন বাধ্যতামূলক কৰা হৈছে। আনহাতে প্ৰায় ১২০০ চৰকাৰী সাহায্যপ্ৰাপ্ত মাদ্ৰাছাক চৰকাৰী বিদ্যালয়লৈ ৰূপান্তৰিত কৰা হৈছে।
'দ্য শ্বিলং টাইমছ'ৰ সম্পাদিকা পেট্ৰিচিয়া মুখিমে কয়, "ইউএছটিইএমৰ অধিকাংশ ছাত্ৰ-ছাত্ৰী আৰু শিক্ষক অসমৰ। হয়তো মুখ্যমন্ত্ৰী হিমন্ত বিশ্ব শৰ্মাৰ এই কথা ভাল নালাগিব পাৰে বা তেওঁৰ আন কিবা উদ্দেশ্য থাকিব পাৰে।"
তেওঁ আৰু কয়, "যদি ইউজিচিৰ নিয়ম অনুসৰি 'ইউএছটিএম' চলি আছে, তেন্তে বাকী কামবোৰ তেওঁলোকক হাৰাশাস্তি কৰিবলৈ কৰা হৈছে। অসমত বিজেপিয়ে মুছলমানৰ বিৰুদ্ধে ৰাজনীতি কৰি আহিছে। বিশেষকৈ মুখ্যমন্ত্ৰী হিমন্ত বিশ্ব শৰ্মাই মুছলমানৰ বিৰুদ্ধে মুকলিকৈ কথা কয়। এই সকলোবোৰৰ মাজতে বাঙালী মূলৰ মুছলমানক টাৰ্গেট কৰা হৈছে।"
পেট্ৰিচিয়া মুখিমে কয়, "যদি কোনো প্ৰতিষ্ঠান নিয়মৰ অধীনত সঠিকভাৱে চলি আছে, তেন্তে এজন মুখ্যমন্ত্ৰীয়ে 'ফ্লাড জেহাদ'ৰ দৰে কথা কোৱা উচিত নহয়। মুখ্যমন্ত্ৰী শৰ্মাই ভুৱা ডিগ্ৰীৰ অভিযোগ কৰে, কিন্তু তদন্ত নকৰে। ইয়াৰ পৰা দেখা যায় যে তেওঁৰ উদ্দেশ্য আন কিবা।"
আমোদজনক কথাটো হ’ল ২০২১ চনত ইউ এছ টি এমৰ এক কাৰ্যসূচীত মুখ্য অতিথি হিচাপে উপস্থিত আছিল মুখ্যমন্ত্ৰী হিমন্ত বিশ্ব শৰ্মা। কিন্তু পৰৱৰ্তী সময়ত মক্কাৰ আৰ্হিত নিৰ্মিত ইউএছটিএমৰ মূল প্ৰৱেশদ্বাৰৰ সমালোচনা কৰি তেওঁ কৈছিল যে ইউএছটিএমলৈ গ’লে মক্কালৈ যোৱা যেন লাগে। অসমত ইউএছটিএমতকৈ বিশাল বিশ্ববিদ্যালয় স্থাপন কৰা হ’ব বুলি মুখ্যমন্ত্ৰীয়ে ঘোষণা কৰিছিল যদিও আজি সেয়া কেৱল ফুটুকাৰ ফেন।
কংগ্ৰেছৰ অভিযোগ আৰু বিজেপিৰ উত্তৰ
কংগ্ৰেছৰ জ্যেষ্ঠ নেতা তথা প্ৰাক্তন সাংসদ ৰিপুন বৰাই মুখ্যমন্ত্ৰী হিমন্তৰ বিৰুদ্ধে অভিযোগ উত্থাপন কৰিছে যে অসমক দেশৰ পাঁচখন শ্ৰেষ্ঠ ৰাজ্যৰ ভিতৰত অন্যতম কৰি তোলাৰ পৰিৱৰ্তে দেশৰ পাঁচটা ধনী পৰিয়ালৰ ভিতৰত নিজৰ পৰিয়ালক অন্তৰ্ভুক্ত কৰাত ব্যস্ত হৈ পৰিছে হিমন্ত বিশ্ব শৰ্মা।
ইউ এছ টি এমৰ প্ৰতিষ্ঠাপকগৰাকীক গ্ৰেপ্তাৰ সন্দৰ্ভত ৰিপুণ বৰাই কয়, "গুৱাহাটী বছৰ বছৰ ধৰি বানপানীৰ সন্মুখীন হৈ আহিছে যদিও যোৱা বছৰৰ বানপানীৰ সমগ্ৰ দোষ মুখ্যমন্ত্ৰীয়ে ইউ এছ টি এমৰ ওপৰত জাপি দিলে। সেয়েহে অসমৰ মুখ্যমন্ত্ৰীয়ে ন্যস্ত স্বাৰ্থৰ বাবে উত্তৰ-পূৰ্বাঞ্চলৰ বিখ্যাত শিক্ষাবিদ মহবুবুল হকক আক্ৰমণ কৰিছে।"
অসম বিজেপিৰ জ্যেষ্ঠ নেতা বিজয় কুমাৰ গুপ্তাই এই বিষয়ত দলৰ বিৰুদ্ধে উত্থাপিত অভিযোগৰ প্ৰতিক্ৰিয়া প্ৰকাশ কৰি কয়, "ইউ এছ টি এমৰ বিদ্যালয়ত পৰীক্ষা দিবলৈ যোৱা ছাত্ৰ-ছাত্ৰীসকলে ইউ এছ টি এমৰ মুৰব্বী মহবুবুল হকৰ বিৰুদ্ধে অভিযোগ উত্থাপন কৰিছে আৰু সেই ভিত্তিত গোচৰ ৰুজু কৰি ব্যৱস্থা গ্ৰহণ কৰা হৈছে।"
"কোনোবাই যদি কিবা অবৈধ কাম কৰে তেন্তে আৰক্ষীয়ে তেওঁৰ বিৰুদ্ধে ব্যৱস্থা ল'ব, গতিকে এই বিষয়ত বিজেপিৰ কোনো সম্পৰ্ক নাই। এতিয়া বিষয়টো আদালতৰ সন্মুখত। বিচাৰ হ'ব আৰু সকলো স্পষ্ট হৈ পৰিব।" –তেওঁ লগতে কয়।
আনহাতে, বঙালী মুছলমানক লক্ষ্য কৰি লোৱা প্ৰশ্নৰ উত্তৰত বিজেপি নেতাগৰাকীয়ে কয়, "চৰকাৰে কোনো হিন্দুত্ববাদী ৰাজনীতি নকৰে। সুশাসন আৰু নিৰপেক্ষতা আমাৰ চৰকাৰৰ লক্ষ্য। যদি কোনোবা কোনো অপৰাধত ধৰা পৰে, তেন্তে অভিযুক্তৰ জাতি আৰু ধৰ্মৰ কথা বিবেচনা কৰা উচিত নহয়।"
ৰাজ্যৰ জ্যেষ্ঠ সাংবাদিক নৱ কুমাৰ ঠাকুৰিয়াই ইউ এছ টি এমৰ চ্যান্সেলৰ মহবুবুল হকৰ গ্ৰেপ্তাৰক এক আচৰিত ঘটনা বুলি অভিহিত কৰে। কিন্তু এই ঘটনাত বিজেপিয়ে মুছলমানক লক্ষ্য কৰি ৰাজনীতি কৰিছে বুলি উত্থাপিত অভিযোগো তেওঁ অস্বীকাৰ কৰে।
তেওঁ কয়, "বিদ্যালয় পৰীক্ষা পৰ্যায়ত সংঘটিত হোৱা অভিযোগত এজন চ্যান্সেলৰ গ্ৰেপ্তাৰ হোৱাটো আচৰিত কথা। চ্যান্সেলৰ ডাঙৰ পদ। চৰকাৰী বিশ্ববিদ্যালয়ত চ্যান্সেলৰ ৰাজ্যপাল। গতিকে এই বিষয়টো এতিয়া গুৰুতৰ তদন্তৰ বিষয়। কাৰণ শেহতীয়াকৈ দেশত নীট পৰীক্ষাৰ সন্দৰ্ভত এটা ডাঙৰ অনিয়ম প্ৰকাশ পাইছিল।"
ঠাকুৰিয়াই কয়, "যদি কোনোবাই এই ঘটনা সন্দৰ্ভত বিজেপিক মুছলমান বিৰোধী ৰাজনীতি কৰাৰ অভিযোগ তুলিছে, তেন্তে সেয়া শুদ্ধ নহয়। কাৰণ ৰাজনৈতিক দৃষ্টিকোণৰ পৰা বিজেপি মুছলমান সমৰ্থক যেন লাগে।"
"প্ৰধানমন্ত্ৰী নৰেন্দ্ৰ মোদীয়ে দৰগাহত চাদৰ আগবঢ়ায়। বিজেপি চৰকাৰৰ আঁচনিৰ হিতাধিকাৰীলৈ যদি আমি চাওঁ, তেন্তে তেওঁলোকৰ অধিকাংশই মুছলমান। বিনামূলীয়া ৰেচনৰ পৰা আৰম্ভ কৰি গৃহ নিৰ্মাণ আঁচনি আৰু শৌচাগাৰলৈকে মুছলমানসকলে সৰ্বাধিক লাভৱান হৈছে। গতিকে এই বিষয়ত বিজেপিয়ে যিকোনো ধৰণৰ ৰাজনীতি কৰিছে বুলি ক'লে ভুল হ'ব।"
পৰিয়ালৰ লোকে কি কয়?
মহবুবুল হক গ্ৰেপ্তাৰ সন্দৰ্ভত তেওঁৰ পৰিয়ালৰ এজন সদস্যই কয় যে যোৱা কেইদিনমানৰ পৰা তেওঁৰ পৰিয়ালটো অতিশয় শংকাত ভুগিছে। হকৰ এজন ঘনিষ্ঠ সহযোগীয়ে কয়, "মুখ্যমন্ত্ৰী হিমন্ত বিশ্ব শৰ্মাই যিখন ইউ এছ টি এমক ভুৱা আখ্যা দিছে, সেই একেখন ইউ এছ টি এমকে মেঘালয় চৰকাৰে প্ৰকৃত বুলি অভিহিত কৰিছে। আমাক এনেদৰে টাৰ্গেট কৰি কি লাভ? মহবুবুল হকে এই শিক্ষানুষ্ঠানখন স্থাপনৰ বাবে জীৱনত বহু সংগ্ৰাম কৰিছে, কিন্তু মুখ্যমন্ত্ৰীয়ে তেওঁৰ পিছ এৰা নাই।"
চেণ্ট্ৰেল পাব্লিক স্কুলত ছাত্ৰ-ছাত্ৰীয়ে কৰা উত্তপ্ত পৰিস্থিতি সন্দৰ্ভত হকৰ আত্মীয়ই কয় যে ই আৰ ডি এফৰ অধীনত ছাত্ৰ-ছাত্ৰীক ভিজন ৫০ নামেৰে পৰীক্ষাৰ বাবে প্ৰস্তুতি চলোৱা হয়। তেওঁ কয়, "এয়া প্ৰথমবাৰৰ বাবে নাছিল। বিগত বহু বছৰ ধৰি এই কেন্দ্ৰলৈ ছাত্ৰ-ছাত্ৰীয়ে পৰীক্ষা দিবলৈ আহিছিল। কিন্তু এইবাৰ কিছুমান ছাত্ৰ-ছাত্ৰীক উচটনি দিয়া হৈছিল আৰু এই হুলস্থুলৰ সৃষ্টি হৈছিল। এই বিষয়টো যেতিয়া তদন্ত কৰা হ'ব, তেতিয়া সকলো স্পষ্ট হৈ পৰিব।"
ইফালে, মহবুবুল হকক গ্ৰেপ্তাৰ কৰাৰ পিছত মুখ্যমন্ত্ৰী হিমন্ত বিশ্ব শৰ্মাই কয়, "গুৱাহাটী, নগাঁও আৰু কামৰূপ জিলাৰ পৰা ২০০ৰো অধিক ছাত্ৰ-ছাত্ৰীক ৩০ নম্বৰতকৈ অধিক নম্বৰ দিয়াৰ প্ৰতিশ্ৰুতি দি পথাৰকান্দিলৈ লৈ যোৱা হৈছিল। সহায় নোপোৱাত তেওঁলোকে এটা ৰেকেট গঠন কৰি গোটেই গেংটো পোহৰলৈ আহিল আৰু ই কেৱল চিবিএছইতে সীমাবদ্ধ নহয়, ইও মেডিকেল এণ্ট্ৰেন্সলৈকে বিয়পি পৰে আৰু সমগ্ৰ জালিয়াতিৰ কথাও উদঙাই দিয়া হ'ব।"
মহবুবুল হক কোন?
শ্ৰীভূমি (পূৰ্বতে কৰিমগঞ্জ) জিলাৰ পথাৰকান্দিৰ বৰচৰা গাঁৱৰ মহবুবুল হকে গাঁওতে প্ৰাথমিক শিক্ষা গ্ৰহণ কৰাৰ পিছত আলিগড় মুছলিম বিশ্ববিদ্যালয়ৰ পৰা প্ৰথমে বিএছচি ডিগ্ৰী গ্ৰহণ কৰে। ইয়াৰ পিছতে তেওঁ ২০০০ চনত প্ৰথম বিভাগত দ্বিতীয় স্থান লাভ কৰি একেখন বিশ্ববিদ্যালয়ৰ পৰা কম্পিউটাৰ বিজ্ঞানত স্নাতকোত্তৰ ডিগ্ৰী লাভ কৰে।
আনুষ্ঠানিক শিক্ষা সাং কৰাৰ পিছতে ভাৰত আৰু বিদেশৰ বহুজাতিক কোম্পানীৰ পৰা লাভজনক চাকৰিৰ অফাৰ লাভ কৰিছিল মহবুবুল হকে। কিন্তু তেওঁ পুনৰ অসমলৈ উভতি আহি শৈক্ষিক উদ্যোগী হিচাপে নিজৰ কেৰিয়াৰ আৰম্ভ কৰে।
কেইবাটাও সাক্ষাৎকাৰত হকে দাবী কৰা মতে, ২০০১ চনত তেওঁ মাত্ৰ এটা কম্পিউটাৰ আৰু চাৰিজন ছাত্ৰ-ছাত্ৰীৰে আৰু ৮৫ টকাৰ মূলধনেৰে মণিপাল গ্ৰুপৰ অধীনত এটা কম্পিউটাৰ প্ৰশিক্ষণ কেন্দ্ৰ আৰম্ভ কৰিছিল। পৰৱৰ্তী সময়ত মাত্ৰ পাঁচ বছৰৰ ভিতৰতে এই কেন্দ্ৰটো যথেষ্ট ডাঙৰ হৈ পৰে।
এই পৰ্যন্ত হকে ইউনিভাৰ্চিটি অৱ চায়েন্স এণ্ড টেকন’লজি মেঘালয়, ৰিজিঅ’নেল ইনষ্টিটিউট অৱ চায়েন্স এণ্ড টেকন’লজি, ইউনিভাৰ্চিটি স্কুল অৱ ল’ এণ্ড ৰিচাৰ্চ ইন মেঘালয়, স্কুল অৱ বিজনেছ ছায়েন্স, ইউনিভাৰ্চিটি স্কুল অৱ ফাৰ্মাচিউটিকেল ছায়েন্স, পি এ চাংমা ইণ্টাৰনেশ্যনেল মেডিকেল কলেজ এণ্ড হস্পিতালকে ধৰি কেইবাখনো ডিগ্ৰী কলেজ আৰু স্কুল স্থাপন কৰিছে।
ভাৰত চৰকাৰৰ ৰাষ্ট্ৰীয় প্ৰতিষ্ঠানিক ৰেংকিং কাঠামো ২০২৩ৰ নৱম সংস্কৰণত ইউ এছ টি এম ভাৰতৰ শীৰ্ষ ২০০ খন বিশ্ববিদ্যালয়ৰ ভিতৰত স্থান লাভ কৰে।