গুৱাহাটীঃ মহানগৰীৰ মাজ মজিয়াৰ লখৰাত অষ্ট্ৰেলিয়াৰ খেলুৱৈই কঢ়িযাই অনা বাছত শিল দলিওৱা ঘটনাৰ চাঞ্চল্য ৰাজ্যজুৰি অব্যাহত আছে৷ মঙলবাৰে নিশা অষ্ট্ৰেলিয়া ক্ৰিকেট দলক কঢ়িযাই অনা বাছত দুৰ্বৃত্তই শিল দলিয়াই আইনা ভাঙে৷ নিশা প্ৰায় ১১-২০ বজাত মহানগৰীৰ ব্যস্ত ৰাষ্ট্ৰীয় ঘাই পথৰ সমীপৰ লখৰাত সংঘটিত এই ঘটনাৰ পিছতে ৰাজ্যৰ আৰক্ষী, চৰকাৰ তথা ভাৰতীয় চোৰাংচোৱা সংস্থা সক্ৰিয় হৈ পৰে৷
চোৰাংচোৱা সংস্থাই ভিৰ কমাবৰ বাবে খেলুৱৈই সকলক সৰু গাড়ীৰে অৰ্থাৎ বলে’ৰ গাড়ীৰে খেল পথাৰলৈ অনা-নিয়া কৰিব খুজিছিল যদিও দলটোৱে এই কথা অন্য ধৰণে লয় বুলি কয়৷ খেলুৱৈক সম্পুৰ্ণ নিৰপত্তা দিয়া হৈছিল বুলি উল্লেখ কৰে চোৰাংচোৱা সংস্থাই৷ আনহাতে এই ঘটনাক ৰাজ্য চৰকাৰে গুৰুত্ব সহকাৰে নোলোৱা বুলি অভিযোগ উত্থাপনৰ মাজতে ৰাজ্য চৰকাৰৰ হৈ পুৱাই সাংস্কৃতিক মন্ত্ৰী নৱ দলেই হোটেললৈ গৈ অষ্ট্ৰেলিয়া ক্ৰিকেট দলৰ খেলুৱৈক লগ ধৰে৷
