বাহাকাবাৰীঃ নগাঁও জিলাৰ ৰহা সমষ্টিৰ অন্যতম পঞ্চায়ত চাপৰমুখ । ৰাইজে অভিযোগ কৰা অনুসৰি কংগ্ৰেছ চৰকাৰৰ দিনৰ পৰাই এই পঞ্চায়তত কেৱল লুণ্ঠনৰাজহে চলি আছে । চাপৰমুখ পাব্লিক পট্টি ৫ নং ৱাৰ্ড আৰু ৬ নং ৱাৰ্ডত অ গ প চৰকাৰৰ দিনতেই নিৰ্মিত নলা আজিও নিৰ্মাণ সম্পূৰ্ণ নহ’ল ।
পূৰ্বৰ কংগ্ৰেছ চৰকাৰৰ দিনতেই হৰলুকি হ'ল বিপুল পৰিমাণৰ ধন । অৰ্দ্ধ নিৰ্মিত অৱস্থাতে আছে নলা । ঢাকনি নোহোৱা নলাত পৰি মৃত্যুমুখত পৰিছে অনেক পশুধন । আনকি কেইবাজনো লোক নলাত পৰি চিৰদিনৰ বাবে ঘূণীয়া হৈছে । নিৰ্মাণ নহ’ল নলাৰ কাষৰ ৰাস্তা । বাৰিষা একাঠু পানীৰ তলত বুৰ গৈ থাকে চাপৰমুখ পাব্লিক পট্টিৰ বাট-পথ।
আশ্বৰ্যজনক যে এই বাট-পথ নিৰ্মাণৰ নামত অহা ধন কোনো কাম নকৰাকৈয়ে হৰলুকিৰ লগতে ইন্দিৰা আৱাস যোজনা , এম জি এনৰেগা , ত্ৰয়োদশ আৰু চতুৰ্দশ বিত্তীয় বৰ্ষৰ আঁচনিৰ পুঁজিৰ সিংহভাগ পঞ্চায়ত সভানেত্ৰী আৰু প্ৰাক্তন সভাপতিয়ে আত্মসাৎ কৰিছে বুলি ৰাইজে দাবী কৰিছে ।
এই ক্ষেত্ৰত ৰাইজৰ হৈ চেন্টুৰঞ্জন দেবে তথ্য জনাৰ অধিকাৰ আইন ২০০৫ ৰ অধীনত আবেদন কৰি সুফল নোপোৱাত বিষয়টি মুখ্যমন্ত্ৰী আৰু প্ৰধানমন্ত্ৰীলৈ পত্ৰ প্ৰেৰণ কৰিছিল । সেই পত্ৰৰ উত্তৰত তদন্ত কৰিবলৈও নিৰ্দেশ দিছিল । কিন্তু সেই নিৰ্দেশক ৰহা খণ্ড উন্নয়ন বিষয়াই কোনো গুৰুত্ব দিয়া নাই ।
ইয়াৰ উপৰি ৰহা সমষ্টিৰ বিধায়ক ডিম্বেশ্বৰ দাসক হস্তক্ষেপ দাবী কৰি আহিছিল যদিও ৰাইজে কোনো সু-ফল পাবলৈ সক্ষম হোৱা নাই । ফলত ৰাইজৰ উন্নয়নৰ পুঁজিৰে ৰাজকীয় কায়দাৰে লাহ-বিলাহৰ জীৱন কটাইছে একাংশই।