87
ভাৰতৰ আটাইতকৈ দুৰ্নীতিগ্ৰস্ত, ভ্ৰষ্ট মুখ্যমন্ত্ৰীজনেই হৈছে অসমৰ মুখ্যমন্ত্ৰীজন। তেওঁৰ পৰিয়ালৰ প্ৰতিজন সদস্য, লাগিলে সেয়া তেওঁৰ সন্তানেই হওক বা তেওঁৰ পত্নীয়ে হওক, সকলোৱে একেলগে দুৰ্নীতি সংঘটিত কৰি আছে। ভাৰত জোড়ো ন্যায় যাত্ৰাৰ আজি পঞ্চম দিনা যোৰহাটত মুখ্যমন্ত্ৰী ড০ হিমন্ত বিশ্ব শৰ্মাৰ বিৰুদ্ধে এইদৰে সৰৱ হৈ পৰে কংগ্ৰেছ নেতা ৰাহুল গান্ধী।
১৪ জানুৱাৰীত মণিপুৰৰ থৌবালৰ পৰা ভাৰত জোড়ো ন্যায় যাত্ৰাৰ আৰম্ভণি কৰি নাগালেণ্ডৰ মাজেৰে আজি অসমত উপস্থিত হয় ৰাহুল গান্ধী। আজি পুৱা ৮ বজাত নাগালেণ্ডৰ তুলি ডাকঘৰৰ সমীপৰ এই ন্যায় যাত্ৰা পুনৰাম্ভ কৰি নাগালেণ্ডৰ মাজেৰে প্ৰায় ১.৫ কিলোমিটাৰ অতিক্ৰম কৰি পুৱা ৯.৩০ বজাত উপস্থিত হয় অসম সীমান্তত। ইয়াৰ পিছতে আন্তঃৰাজ্যিক সীমান্তত আনুষ্ঠানিকভাৱে ‘পতাকা হস্তান্তৰ’ কৰা হয়।
