ডিফুঃ কাৰ্বি আংলং জিলাবাসীৰ বাবে বিহুক বিহ কৰি তুলিলে আলোচনাপন্থী আলফা নেতা অনুপ চেতিয়াই। এই অভিযোগ হিলছ ট্ৰাইবেল লীগ চমুকৈ এইছ টি এলৰ।
আজি বিয়লি কাৰ্বি লামেত আমেইৰ কাৰ্যালয়ত অনুষ্ঠিত এখন সংবাদ মেলত এই অভিযোগ উত্থাপন কৰি চেতিয়াৰ মন্তব্য কোনো কাৰণতে গ্ৰহণযোগ্য হ'ব নোৱাৰে বুলি উল্লেখ কৰে এইছ টি এলৰ নেতৃত্বই।
সংগঠনটোৱে কয় যে, ষষ্ঠ অনুসূচী ভাৰতীয় সংবিধানৰ এটা অংশ আৰু এয়া কাৰ্বি জনগোষ্ঠীৰ প্ৰাপ্য অধিকাৰ।অনুচ্ছেদ ২ আৰু উপ-অনুচ্ছেদ ৬ত ৰাজ্যপালক প্ৰথম জিলা পৰিষদৰ নীতি প্ৰস্তুত কৰাৰ ক্ষমতা প্ৰদান কৰিছে বুলিও সংগঠনটোৰ নেতৃবৰ্গই সদৰী কৰে।৷
উপ-অনুচ্ছেদ ৭ত থকা সুবিধা অনুসৰি জিলা পৰিষদে ৰাজ্যপালৰ অনুমোদন সাপেক্ষে নীতি প্ৰস্তুত নকৰালৈকে ৰাজ্যপালে প্ৰস্তুত কৰা নীতিসমূহ নিৰ্বাচনী বিষয়া তথা কৰ্মকৰ্তাসকলৰ ক্ষেত্ৰত প্ৰয়োজ্য হ’ব বুলিও জানিবলৈ দিয়ে এইছ টি এলৰ নেতৃবৰ্গই।
সংগঠনটোৱে ষষ্ঠ অনুসূচী সন্দৰ্ভত অনাগত দিনসমূহত কোনোধৰণৰ মন্তব্য নকৰিবলৈকো অনুপ চেতিয়াক আহ্বান জনায়৷
উল্লেখ্য যে বকলীয়াঘাটত বিহুৰ অনুষ্ঠানত উপস্থিত থাকি অনুপ চেতিয়াই কাৰ্বি জনগোষ্ঠীয় সংগঠনসমূহে ভোটাৰ তালিকাত অজনজাতিৰ নাম অন্তৰ্ভূক্তিকৰণৰ বিৰুদ্ধে সাব্যস্ত কৰি অহা প্ৰতিবাদৰ ফলত ৰক্তপাত হ’ব পাৰে বুলি মন্তব্য কৰিছিল।
আলোচনাপন্থী আলফা নেতাজনৰ এনে মন্তব্যই কাৰ্বি জনগোষ্ঠীৰ লোকসকলৰ বাবে বিহুক বিহ সদৃশ কৰি তোলে বুলিও আজি সংবাদমেলত সংগঠনটোৱে ক্ষোভ প্ৰকাশ কৰে।