বিহালীঃ সোমবাৰে সদৌ অসম আদিবাসী ছাত্ৰ সন্থাৰ বিহালী আঞ্চলিক সমিতিয়ে বিশ্বনাথ জিলা উপায়ুক্ত আৰু বিশ্বনাথ জিলা আৰক্ষী অধীক্ষকক এক তিনি দফীয়া স্মাৰক পত্ৰ প্ৰদান কৰে৷ ৰাজ্য যোৰহাট আৰু গোলাঘাট জিলাত চুলাই মদ সেৱন কৰি ইতিমধ্যে ১৬৪ জনকৈ নিৰীহ লোকৰ মৃত্যু হোৱাৰ পিচতেই ছাত্ৰ সংগঠনটোয়ে স্মাৰক পত্ৰ জড়িয়তে উদ্বিগ্নতা প্ৰকাশ কৰি বিহালী বিধান সভা সমষ্টিৰ সকলো অঞ্চলৰপৰা অবৈধ্য সুৰা আৰু চুলাই মদৰ ঘাটি উৎখাত কৰিবলৈ দাবী জনায়৷
সংগঠনটোয়ে স্মাৰক পত্ৰ প্ৰদানৰে বিহালীত অবৈধভাৱে গঢ়লৈ উঠা চুলাই মদৰ ভাঁটি আৰু অৰুণাচলী সুৰাৰ অবৈধ সৰবৰাহ বন্ধ কৰা, বিশ্বনাথ জিলা ব্যাপি মজুত থকা লালীগুড়ৰ গুদাম সমুহ ছীল কৰাৰ দাবী জনোৱাৰ উপৰিও বিশ্বনাথ জিলাৰ অন্তৰ্গত চাহ বাগিছা সমুহৰপৰা অবৈধ সুৰা প্ৰচলন বন্ধ কৰাৰ লগতে বিশ্বনাথ জিলাৰ সাপ্তাহিক বজাৰ সমুহৰপৰা চুলাই মদ বিপনী উচ্ছেদ কৰাৰ দাবী জনায়৷
উল্লেখ্যযোগ্য যে, সংগঠনটোৰ সভাপতি সঞ্জীৱ কুমাৰ তাঁতি আৰু সম্পাদক পৱন বাউৰী স্বাক্ষৰিত স্মাৰক পত্ৰত প্ৰকাশ বিশ্বনাথ জিলা আবকাৰী বিভাগৰ কৰ্মচাৰীয়ে প্ৰতিমাহে অবৈধ সুৰা ব্যৱসায়ীৰ পৰা মুকলিভাৱে ধনৰ লেনাদেনা কৰি সমাজ ব্যৱস্থা ধ্বংস কৰি আহিছে৷
এই সময়ত সংগঠনটোক নেতৃত্ব দিয়ে বিশ্বনাথ জিলা আদিবাসী ছাত্ৰ সন্থাৰ জিলা সম্পাদক অজিত কুৰ্মী, চুচেন মৌলিক, কুনাল ভূঞা, শংকৰ কৰ্মকাৰ আদিয়ে৷ আনহাতে, যি সময়ত সমগ্ৰ ৰাজ্যত চুলাই মদৰ সংহাৰি পৰিণতিৰ পিচত জিলা প্ৰশাসন যন্ত্ৰই চুলাই মদৰ বিৰূদ্ধে অভিযান চলাই আহিছে সেই সময়ত বিহালীৰ ছাত্ৰ সংগঠনে মুকলিকৈ আবকাৰী বিভাগৰ বিৰুদ্ধে জিলা উপায়ুক্ত আৰু আৰক্ষী অধীক্ষকক স্মাৰক পত্ৰ প্ৰদানৰে অৱগত কৰাৰ পিচত জিলা প্ৰশাসনে কি পদক্ষেপ গ্ৰহণ কৰে সেয়া পৰৱৰ্তী সময়ত লক্ষনীয় হ’ব৷