ডিজিটেল ডেস্কঃ এটা অডিঅ’ ৰেকৰ্ডিং ধুমুহাৰ বেগত সমগ্ৰ দেশতে ভাইৰেল হৈ পৰিছে৷ এমাহ পুৰণি অডিঅ’ ৰেকৰ্ডিঙটো ভাইৰেল হৈ পৰে ছচিয়েল মিডিয়াত৷
তামিলনাডুৰ বিৰোধনগৰ জিলাৰ আৰুপ্পুকোট্টইৰ দেৱাংগ আৰ্ট কলেজৰ অধ্যাপিকাই কেলজৰ কেইবাগৰাকী ছাত্ৰীক ফোন যোগে দিছিল দেহ দিয়াৰ ভয়াবহ প্ৰস্তাৱ৷ তাৰ বিনিময়ত যুৱতীক দিয়া হৈছিল ডিগ্ৰী আৰু টকা দিয়াৰ লোভ৷
অডিঅ’টোত অধ্যাপিকাগৰাকীয়ে স্পষ্টকৈ উল্লেখ কৰে কিছু কাম কৰাৰ বাবে মাডুৰাই কামৰাজ বিশ্ববিদ্যালয়ৰ প্ৰশাসনিক বিষয়াক কলেজৰ কেইগৰাকীমান ছাত্ৰীৰ প্ৰয়োজন৷ সকলো কথা খুলি কব নোৱাৰো৷ আশা কৰো যুৱতীসকলে বুজি পাইছে। তাৰ বিনিময়ত তেওঁলোকে কি পাব তাকো কয়৷ অধ্যাপিকাগৰাকীয়ে পৰীক্ষাত নম্বৰ বৃদ্ধি, ভাল কেৰিয়াৰ, টকা, চাকৰি আদিৰ লোভ দিয়ে৷ ২০ মিনিটৰ এই ক্লিপটোত এঠাইত তামিলনাডুৰ ৰাজ্যপাল বানোৱাৰিলাল পুৰোহিতৰ নাম লয়৷
আৰুপ্পুকোট্টইৰ দেৱাংগ আৰ্ট কলেজৰ পৰা এই খবৰ সমগ্ৰ দেশত প্ৰচাৰ হবলৈ বেছি সময় নালাগিল৷ যোৱা ১৯ মাৰ্চতে এই কাণ্ডৰ খবৰ দিয়া হয় আৰক্ষীক৷ ২১ মাৰ্চত অধ্যাপিকাক চাকৰিৰ পৰা নিলম্বন কৰা হয়৷ এছআইএফে ধৰ্ণা প্ৰদৰ্শন কৰে কলেজৰ বাহিৰত তাৰ পিছতেহে বহু পলমকৈ অধ্যাপিকাক গ্ৰেপ্তাৰ কৰে আৰক্ষীয়ে৷ ৰাজ্যপালৰ কাৰ্যালয়ৰ পৰা এই ঘটনাক তদন্তৰ নিৰ্দেশ দিয়ে৷
তামিলনাডুৰ ৰাজ্যপাল বানোৱাৰিলাল পুৰোহিতে তেওঁৰ নাম এই কাণ্ডত সাঙুৰ খাই পৰাত মঙলবাৰে এখন সংবাদমেলৰ আয়োজন কৰিছিল ৰাজভৱনত৷ সংবাদমেলত স্পষ্টিকৰণ দিবলৈ যাওঁতে নকুন বিবাদৰ সৃষ্টি হৈছিল৷ এগৰাকী মহিলা সাংবাদিকে সোধা প্ৰশ্নৰ উত্তৰ দিবলৈ গৈ মহিলা সাংবাদিকগৰাকীক ৰাজ্যপাল পুৰোহিতে গালত চিকুট মাৰে৷ ইয়াৰ পিছতেই ৰাজ্যপালগৰাকীৰ আচৰণত ক্ষোভিত হৈ পৰে তামিলনাডুৰ বিভিন্ন সাংবাদিক সংগঠন৷ ৰাজ্যৰ প্ৰশাসনৰ প্ৰধানগৰাকীৰ এনে কাণ্ডত দল-সংগঠনেও ৰাজ্যপালে কৰা ভুলৰ বাবে ৰাজহুৱা ক্ষমা খোজাৰ দাবী জনায়৷
ইয়াৰ পাছতেই ৰাজ্যপাল বানোৱাৰিলাল পুৰোহিতে আন এক এক সংবাদমেল আয়োজন কৰি মহিলা সাংবাদিকগৰাকীক ক্ষমা খোজে৷ তেওঁ কয় ‘‘তুমি সোধা প্ৰশ্নটো মোৰ মনপুতঃ হৈছিল৷ মই তোমাৰ প্ৰশ্নৰ প্ৰশংসা কৰিবলৈ গৈয়েই তোমাৰ গালত চিকুট মাৰিছিলোঁ৷ যদি এই কাৰ্যই তোমাৰ সন্মান আৰু স্বাভিমানত আঘাত হানিছে, তেন্তে তাৰ বাবে মই তোমাৰ ওচৰত ক্ষমা বিছাৰিছোঁ৷’’
ৰাজ্যপাল গৰাকীয়ে কয়- ‘‘তেওঁ মোৰ নাতিনীৰ বয়সৰ৷ সাংবাদিক হিচাপে মহিলাগৰাকীৰ প্ৰশংসাত স্নেহৰ বশবৰ্তী হৈয়ে মই তেওঁৰ গালত চিকুটিছিলোঁ৷ তাত মোৰ কোনো আন চিন্তা নাছিল৷’’