ডিজিটেল ডেস্কঃ চলচিত্ৰজগতলৈ আগবঢ়োৱা অনবদ্য অৱদানৰ বাবে অন্ধ্ৰ প্ৰদেশৰ চলচিত্ৰ নিৰ্মাতা তথা অভিনেতাজনলৈ আগবঢ়োৱা হৈছে ২০১৬ বৰ্ষৰ দাদা চাহেব ফাল্কে পুৰস্কাৰ৷ তথ্য আৰু সম্প্ৰচাৰণ মন্ত্ৰী ভেংকেয়া নাইডুয়ে নিৰ্মাতাজনৰ নামটো পুৰস্কাৰৰ বাবে অনুমোদন জনায়৷
৩ মে বিজ্ঞান ভৱনত অনুষ্ঠানত ৰাষ্ট্ৰপতিয়ে কে বিশ্বনাথক এই পুৰষ্কাৰ প্ৰদান কৰিব৷ উক্ত পুৰস্কাৰত আছে এটা স্বৰ্ণ পদুম, নগদ ১০ লাখ টকা আৰু এখন আলোৱান৷ ১৯৬৫ চনৰ পৰা এতিয়ালৈ ৫০ খন চলচিত্ৰ পৰিচালনা কৰিছে বিশ্বনাথে৷
সামাজিক বিভিন্ন দিশবোৰ চলচিত্ৰত উপস্থাপিত কৰা বিশ্বনাথক ১৯৯২চনত পদ্মশ্ৰী সন্মানেৰে বিভুষিত কৰা হৈছিল৷ তদুপৰি ৫বাৰ ৰাষ্ট্ৰীয় পুৰস্কাৰ ,২০ বাৰ অন্ধ্ৰ প্ৰদেশৰ নন্দী পুৰস্কাৰ পোৱাৰ উপৰিও আন কেইবাটাও সন্মান লাভ কৰিছে চলচিত্ৰ নিৰ্মাতাজনে৷
ভাৰতীয় চলচিত্ৰজগতৰ পিতৃ দাদাচাহেব ফাল্কেৰ চলচিত্ৰজগতখনলৈ আগবঢ়োৱা অনবদ্য অৱদানৰ সোঁৱৰণতে ভাৰত চৰকাৰে ১৯৬৯ চনৰ পৰা আগবঢ়াই আহিছে এই পুৰস্কাৰ৷