খাৰুপেটীয়াঃ হেপাহৰ ৰঙালী বিহুটিলৈ মাথো এমাহ সময় বাকী৷ লোকসভা নিৰ্বাচনলৈও এমাহ বাকী৷ অসমৰ চাৰিওফালে এতিয়া ব্যস্ততা৷ এনে ব্যস্ততাৰ মাজতো বিভিন্ন ঠাইত হেঁপাহৰ বিহুটিক আদৰিবলৈ আৰম্ভ হৈছে ঢোল পেঁপাৰ মাত৷ ঢোলৰ মাতত ৰজনজনাই গৈছে চাৰিওদিশ৷
ফাগুনৰ পচোৱাই মন উন্মাদ কৰাৰ পিছে পিছে কুলি কেতেকীৰ মাতেও শুৱনি কৰিলে চৌদিশ৷ মদাৰ, শিমলু, পলাশৰ লগে লগে ফুলিল কপৌফুল৷ চৌদিশে বসন্তৰ আগমনত মন উন্মনা, উন্মুক্ত প্ৰেমৰ আকুল আহ্বান।
এনে সময়তে দৰঙৰ দলগাঁৱত বাপতিসাহোন বিহুটিক আদৰিবলৈ চলিছে ব্যাপক প্ৰস্ততি৷ নৱপ্ৰজন্মৰ মাজত বিহু কলা-কৃষ্টি জীয়াই ৰাখিবলৈ দলগাঁৱৰ দুটা জাতীয় সংগঠনৰ শাখা দলগাঁও মইনা পাৰিজাত আৰু শাখা সাহিত্য সভাৰ উদ্যোগত দলগাঁৱত পাঁচদিনীয়া এক বিহু কৰ্মশালাৰ আয়োজন কৰা হয়৷
ডিব্ৰুগড়ৰ ঘাই বিহুৱা জীতেন দাস আৰু তেওঁৰ সংগী বৃন্দই প্ৰশিক্ষক হৈ দলগাঁৱৰ নৱপ্ৰজন্মৰ মাজত বিহু নৃত্যৰ প্ৰশিক্ষণ আৰম্ভ কৰে। পাঁচদিনীয়া এই কৰ্মশালাখন শুভাৰম্ভ কৰে দলগাঁৱৰ ৰাজহ চক্ৰবিষয়া যুৱৰাজ বৰঠাকুৰে। কৰ্মশালাখনৰ উদ্বোধনী অনুষ্ঠানত দলগাঁও অঞ্চলৰ মহিলাসকলেও ঢোল, পেঁপাৰ ছেঁৱে ছেঁৱে কঁকাল ঘুৰাই ঘূৰাই এপাক নাচি মতলীয়া হৈ পৰে৷
মইনা পাৰিজাত আৰু দলগাওঁ সাহিত্য সভাৰ সম্পাদক ধীৰেন নাথ শইকীয়াই লোৱা এনে পদক্ষেপে অঞ্চলটোৰ উঠি প্ৰজন্মক অসমৰ কলা-সংস্কৃতিক জীয়াই ৰাখিবলৈ যথেষ্ট সহায় কৰিব৷ উল্লেখ্য যে, ১২ মার্চৰপৰা আৰম্ভ হোৱা কৰ্মশালাটো ১৬ মাৰ্চলৈ চলিব।