তুলসীবাৰীঃ দীৰ্ঘদিন ধৰি শয্যাগত হৈ থকা তুলসীবাৰী নিবাসী কৃতী শিক্ষক উমেশ চন্দ্ৰ কলিতাক আজি ৰঙিয়া জিলা প্ৰাদেশীকৃত বিদ্যালয় অবসৰপ্ৰাপ্ত শিক্ষক-কৰ্মচাৰী সন্থাই নিজা বাসভবনত সম্বৰ্দ্ধনা জ্ঞাপন কৰে৷ তদুপলক্ষে সন্থাৰ সভাপতি দ্বীজেন্দ্ৰ নাথ তালুকদাৰৰ সঞ্চালনাত অনুষ্ঠিত গাম্ভীৰ্যপূৰ্ণ অনুষ্ঠানত অৱসৰ প্ৰাপ্ত শিক্ষক-কৰ্মচাৰীৰ প্ৰতিনিধি দলটোৱে ফুলাম গামোচা, মানপত্ৰ আৰু জাপি আদিৰে সম্বৰ্দ্ধনা জ্ঞাপন কৰাৰ লগতে কলিতাৰ সু স্বাস্থ্য আৰু দীৰ্ঘায়ু কামনা কৰে৷
সম্পাদক কৰুণাকান্ত কলিতাই আঁতধৰা সভাখনত কলিতাৰ সহধৰ্মিনী নীৰু প্ৰভা কলিতাকো আনুষ্ঠানিক ভাবে সম্বৰ্দ্ধনা জ্ঞাপন কৰা হয়৷ অনুষ্ঠানত তুলসীবাৰী বহুমুখী উচ্চতৰ মাধ্যমিক বিদ্যালয়ৰ অধ্যক্ষা লীনু বৰদলৈ উপস্থিত থাকি ১৯৬৯ চনত একেখন বিদ্যালয়ত শিক্ষকতাৰে কৰ্ম জীৱন আৰম্ভ কৰি ১৯৯০-২০০৪ চনলৈ প্ৰধান শিক্ষক তথা অধ্যক্ষৰ দায়িত্ব কৃতিত্বৰে পালন কৰা কলিতাৰ বৰ্ণিল কৰ্মময় জীৱনৰ ওপৰত আলোকপাত কৰে৷
