নতুন দিল্লীঃ ইনফ্লুৱেঞ্চাৰ মিশা আগৰৱালৰ মৃত্যুৱে উদঙাইছে ছ’চিয়েল মিডিয়া আসক্তিৰ ভয়ংকৰ সত্য। ফে'চবুক-ইনষ্টাগ্ৰামত খুহুতীয়া ভিডিঅ’ৰ জৰিয়তে যথেষ্ট কম সময়তে জনপ্ৰিয় হৈ পৰা মিশা আগৰৱালে আত্মহত্যা কৰাৰ কথা নিশ্চিত কৰিছে তেওঁৰ পৰিয়ালে।
নিজৰ ২৫ বছৰীয়া জন্মদিনৰ দুদিন পূৰ্বে ২৪ এপ্ৰিলত মিশাই নিজৰেই প্ৰাণনাশ কৰে। ইতিমধ্যে ছ'চিয়েল মিডিয়াত মিশাৰ মৃত্যৰ খবৰ বিয়পি পৰিছিল যদিও উদীয়মান কণ্টেণ্ট ক্ৰিয়েটৰগৰাকীয়ে কি কাৰণত আত্মহনন কৰিলে সেই বিষয়ে জানিব পৰা হোৱা নাছিল আৰু পৰিয়ালেও তেওঁৰ মৃত্যুৰ খবৰ আনুষ্ঠানিকভাৱে নিশ্চিত কৰা নাছিল।
আজি ইনফ্লুৱেঞ্চাৰগৰাকীৰ ভগ্নীয়ে ইণ্ষ্টাগ্ৰামৰ জড়িয়তে মিশাৰ মৃত্যুৰ কাৰণ প্ৰকাশ কৰি লিখা এক প’ষ্টে ছচিয়েল মিডিয়াৰ এটা ভয়ংকৰ দিশ উন্মোচন কৰিছে। মিশাৰ ভগ্নীয়ে লিখিছে যে ১ মিলিয়ন ফ’লৱাৰৰ সপোন পূৰণ নোহোৱাৰ বাবেই হতাশাত ভূগিছিল ইন্ফ্লুৱেঞ্চাৰগৰাকী। ম’বাইলৰ ৱালপেপাৰ সজাইছিল ১ নিযুত ফ’লৱাৰৰ কাল্পনিক ছবিৰে।
নিজৰ মন-প্ৰাণ ছচিয়েল মিডিয়াতে সঁপি দিছিল মিশাই। কিন্তু বিগত কিছুদিনৰ পৰা ফ’ল’ৱাৰ কমি অহাৰ বাবে হতাশাত ভুগিছিল তেওঁ। অৱশেষত নিজকে শেষ কৰি দিয়াৰ চৰম সিদ্ধান্ত লৈছিল ইন্ফ্লুৱেঞ্চাৰ মিশাই। উল্লেখ্য, আইনৰ স্নাতক মিশা আগৰৱাল এগৰাকী মেধাবী ছাত্ৰী আছিল আৰু প্ৰাদেশিক লোকসেৱাৰ পৰীক্ষাৰ বাবে প্ৰস্তুতি চলাই আছিল।
কিন্তু ছ’চিয়েল মিডিয়াৰ ক্ষন্তেকীয়া খ্যাতিয়ে বিভ্ৰান্ত কৰিছিল তেওঁক। অৱশেষত ছচিয়েল মিডিয়াই সম্পূৰ্ণৰূপে গ্ৰাস কৰি পেলোৱা মিশাই লৈ পেলাইছিল কোনেও নভবা সেই সিদ্ধান্ত।