জয়ন্ত মুদৈ,নগাঁওঃ পুনৰ আন্তঃৰাষ্ট্ৰীয় প্ৰেক্ষাপটত উজলি উঠিছে অসম কন্যা হিমা দাস৷ পোলেণ্ডত অনুষ্ঠিত কুটন’ এথলেটিকছ মিটত এইবাৰ স্বৰ্ণ পদক জয় কৰিবলৈ সক্ষম হৈছে হিমা দাস। মহিলাৰ ২০০ মিটাৰ দৌৰত স্বৰ্ণ লাভ কৰে হিমাই। 

হিমাই ২৩.৯৭ ছেকেণ্ডত নিজৰ দৌৰ সম্পূৰ্ণ কৰি শীৰ্ষ স্থান লাভেৰে দখল কৰে এই পদক। প্ৰকাশ যে, এটা সপ্তাহৰ ভিতৰত হিমা দাসৰ এইয়া দ্বিতীয়টো স্বৰ্ণ জয়। ইয়াৰ পূৰ্বে পিঠিৰ বিষকো নেওচি মঙলবাৰে পজনান এথলেটিকছ গ্ৰাঁ প্ৰীত মহিলাৰ ২০০ মিটাৰ ৰেচত সোণৰ পদক জয় কৰিছিল ধিং এক্সপ্ৰেছ খ্যাত হিমাই৷ হিমা দাসৰ ব্যক্তিগত সৰ্বোচ্ছ স্কৰ ২৩.১০ ছেকেণ্ড আৰু টুৰ্ণামেণ্টত তেওঁ স্বৰ্ণজয় কৰোতে গতিবেগ আছিল ২৩.৬৫ ছেকেণ্ড । 

উল্লেখ্য যে, নগাঁও জিলাৰ অতি পিছ পৰা ধিঙৰ সমীপৰ কান্ধুলীমাৰী গাঁৱৰ ৰঞ্জিত দাস আৰু জোনালী দাসৰ কন্যা হিমা দাস৷ এটি দৰিদ্ৰ পৰিয়ালৰ সন্তান হিমা৷ সৰ্বদিশতে পিছপৰা কান্ধুলীমাৰী গাঁৱত খেলৰ পৰিৱেশ নাথাকিলেও হিমাই নিজৰ একাগ্ৰতা, কঠোৰ পৰিশ্ৰম আৰু তীব্ৰ সংগ্ৰামৰ জৰিয়তে উজলি উঠি দেশ আৰু অসমীয়া জাতিক গৌৰাৱান্বিত কৰিছ৷ আন্তঃৰাষ্ট্ৰীয় পৰ্যায়ত অসমৰ গ্ৰাম্য এলেকাৰ এগৰাকী জীয়ৰীয়ে এটাৰ পিছত এটা সফলতা কঢ়িয়াই আনি সকলো সীমা ইতিমধ্যে অতিক্ৰম কৰিছে৷ 

আকাশ চুবৰ মন তথা হাবিয়াস বুকুত সাৱটি লৈ ফুৰা দৌৰৰ ৰাণী হিমাৰ হয়তো আকাশ চুবৰ বাবে বেছি দূৰ নায়৷ কিয়নো, ইতিমধ্যে ধাৰাবাহিক দুৰ্দান্ত প্ৰদৰ্শনৰ সুবাদত হিমাই বিগত বৰ্ষৰ আগষ্ট মাহত ইণ্ডোনেচিয়াৰ জাকাৰ্টাত অনুষ্ঠিত এছিয়ান গেমছৰ মহিলাৰ ৪×৪০০ মিটাৰ ৰীলে দৌৰত দলগতভাৱে সোণৰ লগতে আন দুটা ইভেন্টত ৰূপৰ পদক দখলেৰে পদক লাভৰ হেট্ৰিক অৰ্জনেৰে ৰাজ্যৰ লগতে দেশবাসীক গৌৰাম্বিত কৰিছিল৷ 

আনহাতে, অষ্ট্ৰেলিয়াত অনুষ্ঠিত হৈ যোৱা কমনৱেলথ গেমচত ভাৰতক প্ৰতিনিধিত্ব কৰি আন্তঃৰাষ্ট্ৰীয় দৌৰবিদ হিমাই ৪০০ মিটাৰ দৌৰ প্ৰতিযোগিতাৰ বাবে নিৰ্বাচিত হৈছিল আৰু ছেমি ফাইনেলত প্ৰৱেশ কৰিবলৈ সক্ষম হৈছিল৷ ইয়াৰ পূৰ্বে থিনলেণ্ডৰ টেমপাৰেত অনুষ্ঠিত হৈ যোৱা অনূৰ্ধ্ব-২০ আই এ এ এফ ছেম্পিয়নশ্বিপত ৪০০ মিটাৰ দৌৰত স্বৰ্ণপদক দখল কৰি ইতিহাস ৰছিবলৈ সমৰ্থ হৈছিল দৌৰৰ ৰাণী হিমা৷ যাক লৈ অসমৰ সৰ্বতে আনন্দৰ ঢল বৈছিল৷ বিশেষকৈ নগাঁও জিলাৰ কান্ধুলীমাৰী গাঁৱৰ লোকসকল আনন্দত আত্মহাৰা হৈ পৰিছিল হিমাৰ এনে সফলতাত৷ অনুৰূপ পুনৰ দুটাকৈ আন্তঃৰাষ্ট্ৰীয় পৰ্যায়ত দুটাকৈ স্বৰ্ণ পদক জয় কৰাৰ বাতৰিয়ে এতিয়া সমগ্ৰ নগাঁও জিলাৰ লগতে জন্মভূমি কান্ধুলীমাৰীত আনন্দৰ ঢল বোৱাইছে৷