কৰ’নাত বিধ্বস্ত ইটালীত অৱশেষত আশাৰ ৰেঙণি, ক্ৰমাৎ হ্ৰাস পাইছে মৃত্যুৰ হাৰ

বিশেষ প্ৰতিবেদনঃ সমগ্ৰ পৃথিৱীতে কৰ’না ভাইৰাছ বিয়পি পৰিছে যদিও সৰ্বাধিক লোকৰ মৃত্যু হৈছে ইউৰোপ মহাদেশৰ ইটালীত। দেশখনৰ চৰকাৰী সূত্ৰ অনুসৰি শনিবাৰে এই ভাইৰাছৰ সংক্ৰমণৰ ফলত মৃত্যু হয় ৬৮১ জন লোকৰ। দেওবাৰৰ দিনটোত দেশখনত মৃত্যু ঘটিছে মাত্ৰ ৫২৫ জনৰ। ১৫ হাজাৰৰো অধিক লোকৰ মৃত্যু হোৱাৰ পিছত দীৰ্ঘ সময়ৰ অন্তত যোৱা দুদিনত এনেদৰে দেখিবলৈ পোৱা গৈছে আশাৰ ৰেঙণি। 

ইটালীৰ সাধাৰণ জীৱন সুৰক্ষাৰ ক্ষেত্ৰত নিয়োজিত চিভিল প্ৰটেকচন ডিভিজনৰ মতে দেশখনত শনিবাৰৰ দিনটোতে প্ৰথমবাৰৰ বাবে কম মৃত্যু দেখিবলৈ পোৱা গৈছে। চিভিল প্ৰটেকচন ডিভিজনৰ মুখ্য কাৰ্যবাহী বিষয়া এজেলী বেৰেলিয়ে সংবাদ প্ৰতিষ্ঠানক জানিবলৈ দিয়ে যে যোৱা শুকুৰবাৰে ইটালীৰ চিকিৎসালয়ত ক্ৰিটিকেল কেয়াৰত ৰোগীৰ সংখ্যা ৪,০৬৪ জন আৰু শনিবাৰৰ দিনা এই ৰোগীৰ সংখ্যা ৩৯৯৪ জন হয়।