86
গুৱাহাটীঃ দিল্লীত অসমৰ জীয়ৰী বিদিশা বেজবৰুৱাৰ মৃত্যুৰ ঘটনাই অন্য দিশে গতি কৰিছে। আজি পুৱাৰ ভাগত জেৰাৰ বাবে দিল্লী আৰক্ষীয়ে গ্ৰেপ্তাৰ কৰিছে বিদিশাৰ স্বামী নিশিতক। বলিউডৰ ‘জগ্গা জাচুচ’ নামৰ ছবিখনত অভিনয় কৰা অসমৰ গায়িকা তথা অভিনেত্ৰীগৰাকীৰ আত্মহত্যাৰ আঁৰত পাৰিবাৰিক কন্দলৰ ভূমিকা সম্পৰ্কে সন্দিহান হৈ পৰা বিদিশাৰ পিতৃয়ে দাখিল কৰা এজাহাৰৰ ভিত্তিত আৰক্ষীয়ে নিশিতক গ্ৰেপ্তাৰ কৰাৰ পিছতে বিষয়টো ৰহস্যঘন হৈ পৰিছে।
গুৱাহাটীৰ উজানবজাৰৰ বাসিন্দা বিদিশাৰ মৃতদেহ সোমবাৰে উদ্ধাৰ কৰা হৈছিল দিল্লীৰ গুৰগাওঁৰ সুশান্ত লেক এলেকাৰ এটা এপাৰ্টমেণ্টত। অলপতে মুম্বাইৰ পৰা দিল্লীলৈ ঘৰ সলাইছিল বিদিশাই। তাতেই চিলিং ফেনত বিদিশাৰ ওলমি থকা মৃতদেহ প্ৰত্যক্ষ কৰে আৰক্ষীয়ে।
