গুৱাহাটীঃ গোলাঘাটত বিষাক্ত সুৰা সেৱন কৰি শতাধিক লোক নিহত হোৱা ঘটনাত গভীৰ শোক প্ৰকাশ কৰি কৃষক মুক্তি সংগ্ৰাম সমিতিৰ উপদেষ্টা অখিল গগৈয়ে এনে মৰ্মান্তিক ঘটনাৰ বাবে শাসনাধিস্থিত বি জে পি নেতৃত্বাধীন চৰকাৰক জগৰীয়া কৰে৷ অসমৰ ইতিহাসত প্ৰথমবাৰৰ বাবে সংঘটিত সৰ্ববৃহৎ ট্ৰেজেডি গোলাঘাটৰ উপায়ুক্ত, আৰক্ষী অধীক্ষক, স্বাস্থ্য আৰু আবকাৰী বিভাগৰ বৰমূৰীয়াসকলৰ চিণ্ডিকেটৰ বাবেই এনে ঘটনা সংঘটিত হ’ব পালে বুলি তেওঁ অভিযোগ কৰে৷

নজৰবিহীনভাৱে সৰ্বানন্দ সোণোৱাল নেতৃত্বাধীন চৰকাৰখনে ৰাজ্যত চুলাই মদৰ উৎপাদন আৰু বিক্ৰীত উৎসাহ যোগোৱাৰ পাছত জিলাখনত লালচৰণ আগৰৱালা আৰু সুভাষ সাহাই নামৰ দুজন ব্যৱসায়ীয়ে লালি গুৰৰ যোগান ধৰিছিল৷ এই ব্যৱসায়ী চক্ৰটোৱে লালি গুৰৰ চিণ্ডিকেট চলাই থকা বুলি অভিযোগ তোলে অখিল গগৈয়ে৷ 

কৃষক মুক্তিৰ গান্ধীবস্তিস্থিত মুখ্য কাৰ্যালয়ত আয়োজিত এক সংবাদ মেলত তেওঁ ৰাজ্যৰ বি জে পি চৰকাৰক আবকাৰী নীতিৰ বাবে ক্ষুৰধাৰ সমালোচনা কৰি কয় যে চৰকাৰে সুৰাৰ ওপৰত আৰোপিত শুল্ককেই ৰাজহ আহৰণৰ মূল উৎস হিচাপে বাছি লৈছে৷ পূৰ্বৰ সকলো অভিলেখ ভংগ কৰি ২০১৮-১৯ বৰ্ষত অসম চৰকাৰে ১,০৯৩.৯৭ কোটি টকা মাত্ৰ আবকাৰী শুল্ক হিচাপেই সংগ্ৰহ কৰিবলৈ সক্ষম হৈছিল৷ ই ইয়াকে সূচায় যে বি জে পি চৰকাৰখনে অসমৰ গাঁৱে-ভূঞে, চহৰে-নগৰে সুৰাৰ ঢল বোৱাই দিছে৷ 

সেই চৰকাৰখনেই দেশীয় সুৰাৰ উপৰিও পূৰ্বে নিষিদ্ধ থকা চুলাই মদৰো বৈধতা প্ৰদান কৰে৷ 

বিহাৰত বিষাক্ত সুৰা পান কৰি ১৬ জন লোক নিহত হোৱা এটা ঘটনাৰ পাছতেই নীতিশ কুমাৰ চৰকাৰে সমগ্ৰ ৰাজ্যতে দেশী কি বিদেশী সকলো সুৰা নিষিদ্ধ কৰাৰ কঠোৰ সিদ্ধান্ত গ্ৰহণ কৰিছিল৷ ইয়াৰ বিপৰীতে অসমত এতিয়া চহৰাঞ্চলত প্ৰতি এশ মিটাৰৰ অন্তৰে অন্তৰে সুৰাৰ দোকানৰ বাবে অনুজ্ঞা পত্ৰ দিয়া হৈছে আৰু গ্ৰামাঞ্চলত প্ৰতি ৩ কিল’মিটাৰৰ ব্যৱধানত একো একোটা সুৰাৰ ঘাটি স্থাপনৰ অনুমতি প্ৰদান কৰা হৈছে৷ 

গগৈয়ে অভিযোগ কৰে যে স্বাৰাজোত্তৰ ৭০ বছৰত চাহ-বাগিচাৰ শ্ৰমিকসকলক প্ৰতিখন চৰকাৰে শোষণ আৰু লুন্ঠন কৰি আহিছে৷ কিন্তু বৰ্তমানৰ বি জে পি চৰকাৰে ইয়াতকৈও অধিক আগবাঢ়ি গৈ চাহ-শ্ৰমিকসকলক সুৰাতে ডুবাই ৰখাৰ পৰিকল্পনা কৰিছে৷

বছৰ বছৰ ধৰি নিৰ্যাতিত-নিপীড়িত তথা শোষিত হৈ থকা চাহ-বাগিচাৰ লোকসকলে তেওঁলোকৰ ভাগ্যৰ পৰিৱৰ্তনৰ বাবেই বি জে পিক ভোট দি জয়যুক্ত কৰিছিল৷ কিন্তু আৰ এছ এছ, বি জে পিয়ে একমাত্ৰ ভোট বেংক হিচাপেই ব্যৱহাৰ কৰি আহিছে চাহ বাগানৰ শ্ৰমিকসকলক৷

তেওঁ অভিযোগ কৰে যে বৰ্তমানৰ চৰকাৰখনত ধৰ্মীয় নেতাই ভৰি পৰিছে যদিও ৰাজ্যত ধৰ্ম বিৰোধী বুলি আখ্যায়িত সুৰাকেই উৎসাহিত কৰা পৰিলক্ষিত হৈছে৷ 

এই দুৰ্ভাগ্যজনক ঘটনাৰ বাবেই আবকাৰী মন্ত্ৰী পৰিমল শুক্লবৈদ্যক জগৰীয়া কৰি কৃষক মুক্তি সংগ্ৰাম সমিতিয়ে শীঘ্ৰেই তেওঁৰ পদত্যাগ দাবী কৰে৷ মন্ত্ৰীজনে পদত্যাগ নকৰিলে সংগঠনটোৱে তীব্ৰ আন্দোলন গঢ়ি তুলিব বুলি কয়৷ 

ইফালে, মন্ত্ৰী হিমন্ত বিশ্ব শৰ্মাই চাহ বাগিচাৰ লোকৰ সৈতে অমাৰ্জিত ভাষাত কালি কথা পতাত অখিল গগৈয়ে মন্ত্ৰীজনক সমালোচনা কৰে৷ মাতৃসম বৃদ্ধা এগৰাকীক ‘তই-তই’কৈ সম্বোধন কৰাটো অসমীয়া সংস্কৃতি-বিৰুদ্ধ তথা নিন্দনীয় বুলি মন্তব্য কৰে কৃষক নেতাজনে৷