১০ বছৰে হৈ ৰ’ল এলাগী! ‘ভাৰত ৰত্ন’ৰে আদৱানিক ওভতাই দিয়া হ’ল নেকি কাঢ়ি লোৱা সন্মান?

২০১৪ চনৰ লোকসভা নিৰ্বাচনৰ সময়ত নৰেন্দ্ৰ মোদীৰ বিপৰীতে তেওঁৱো আছিল প্ৰধানমন্ত্ৰী পদৰ দাবীদাৰ। কিন্তু পিছত যেন তেওঁ লাহে লাহে হেৰাই গৈছিল সক্ৰিয় ৰাজনীতিৰ পৰা। অভিযোগ উঠিছিল- মোদীৰ নেতৃত্বৰ নতুন বিজেপিয়ে এলাগী কৰিছে তেওঁক। একালৰ নাম-যশ আৰু সবল নেতৃত্বৰ ঠাইত পৰৱৰ্তী সময়ত তেওঁ হৈ পৰিছিল দলৰ পৰা বিচ্ছিন্ন নেতা। 

এসময়ৰ বিজেপিৰ গুৰি ধৰোঁতা আৰু যাৰ বাবেই আজি অযোধ্যাত ৰাম মন্দিৰ নিৰ্মাণ সম্ভৱ হৈ উঠিল তেঁৱেই হৈছে লালকৃষ্ণ আদৱানি। সক্ৰিয় ৰাজনীতিৰ পৰা কেতিয়াবাই বিচ্ছিন্ন হৈ পৰা আদৱানিক এতিয়া ভাৰত ৰত্নৰে সন্মানিত কৰিব মোদী চৰকাৰে। প্ৰধানমন্ত্ৰী নৰেন্দ্ৰ মোদীয়ে খোদ এক্স হেণ্ডেলযোগে দেশবাসীক জনাইছে এই খবৰ। ভাৰতীয় জনতা পাৰ্টীৰ স্তম্ভস্বৰূপ প্ৰবীণ ৰাজনীতিবিদগৰাকীক ভাৰত ৰত্ন প্ৰদানৰ খবৰে উল্লাসিত কৰিছে তেওঁৰ সমৰ্থকসকলকো।