ডিজিটেল ডেস্কঃ সমগ্ৰ ৰাজ্যবাসী এতিয়া ৰঙালীৰ উছাহত মতলীয়া। ঠায়ে ঠায়ে অনুষ্ঠিত হৈছে বিহুৰ কৰ্মাশালা, বিহুৰ বিভিন্ন প্ৰতিযোগিতা। মহানগৰীৰ ভিন্ন প্ৰান্ততো অনুষ্ঠিত হৈছে বিহুৰ বিভিন্ন প্ৰতিযোগিতা। ইয়াৰে অন্যতম অাছিল লতাশিল বিহু সন্মিলনীয়ে আয়োজন কৰা বিহু সম্ৰাজ্ঞী, বিহুৰাণী, বিহু কুঁৱৰী আৰু শ্ৰেষ্ঠ ঢুলীয়া প্ৰতিযোগিতা।
সকলোৰে দৃষ্টি নিৱদ্ধ আছিল কোনো শ্ৰেষ্ঠত্ব অৰ্জন কৰিব লতাশিলত। অৱশেষত সকলোৰে উৎকন্ঠা দুৰ কৰি কালি ঘোষিত হ'ল বিহু সন্মিলনীখনত অনুষ্ঠিত বিভিন্ন প্ৰতিযোগিতাৰ ফলাফলসমূহ।
লতাশিলৰ বিহুতলীত শ্রেষ্ঠ বিহু সম্ৰাজ্ঞী ২০১৭ সন্মান কঢ়িয়াবলৈ সক্ষম হ'ল শিৱসাগৰৰ জীয়ৰী উৰ্মিমালা দুৱৰাই। বিহু সম্ৰাজ্ঞী উৰ্মিমালা দুৱৰালৈ আগবঢ়োৱা হয় এখন স্কুটী, নগদ ধন, প্ৰশস্তি পত্ৰৰ লগতে নেমকেয়াৰ হস্পিতালত কৰ্মসংস্থাপন।
ইফালে ৩৩গৰাকী নাচনীক চেৰ পেলাই আন এগৰাকী শিৱসাগৰৰ জীয়ৰী ৰাজশ্রী নাথে বিহুৰাণী প্ৰতিযোগিতাৰ বিজয়ৰ মুকুট পিন্ধিবলৈ সক্ষম হয়।
এই খবৰ পোৱাৰ লগে লগে এতিয়া শিৱসাগৰত আনন্দৰ জোৱাৰ বোৱা পৰিলক্ষিত হৈছে। অানহাতে লতাশিলৰ শ্রেষ্ঠ বিহু কুঁৱৰী ২০১৭ হিচাপে মৰাণৰ নিমিশা দিহিঙীয়া আৰু শ্ৰেষ্ঠ ঢুলীয়া হিচাপে নিৰ্বাচিত হয় গোলাঘাটৰ দেৱজিত্ তামুলী।
উল্লেখ্য যে প্ৰাক্তন মুখ্যমন্ত্ৰী প্ৰফুল্ল কুমাৰ মহন্তৰ উপস্থিতিত সোমবাৰে নিশা ঘোষণা কৰা হয় এই প্ৰতিযোগিতাসমূহৰ ফলাফল।