467
ষ্টেটাছ ছিম্বল৷ বিয়া-বাৰুৰ ক্ষেত্ৰত এই ছিম্বলেই বহু সময়ত বহুতৰে জীৱনত হেঙাৰ হৈ থিয় দিয়ে৷ এই বিশেষ ছিম্বল নিমিলাৰ বাবেই কিমানজনৰ সপোনৰ সংসাৰ ভাঙি থানবান হৈ পৰিছে তাৰ হিচাপ নাই৷ এই ছিম্বল পিছে আধুনিক নহয়৷ সেই তাহানিৰে পৰা ছিম্বলবিধে নিজৰ আধিপত্য বিস্তাৰ কৰি আহিছে৷ মানৱ সমাজতো বাদেই স্বয়ং ঈশ্বৰো এই ছিম্বলৰ কবলত পৰিবলৈ বাধ্য হৈ পৰিছে।
পুৰাণৰ দিনৰ এটি কাহিনী৷ নায়িকা এগৰাকী সুন্দৰী৷ প্ৰেমত পৰিল এজন দিব্য পুৰুষৰ৷ হ’লেই যেনিবা দিব্য পুৰুষ৷ ষ্টেটাছ চিম্বল নিমিলিলে নায়িকাৰ পিতৃয়ে সেই প্ৰেম মানি ল’বই বা কিয়? সেয়ে কঠোৰ পিতৃয়ে লগে লগে নাকচ কৰিলে মৰমৰ কন্যাৰ নিভৃত প্ৰেম৷ প্ৰেয়সীৰ পৰিয়ালৰ সৈতে ষ্টেটাছ ছিম্বল নিমিলা এই প্ৰেমিকজন কোন জানেনে? তেওঁ হৈছে দেৱাদিদেৱ মহাদেৱ শিৱ৷