নতুন দিল্লীঃ সৰ্বত্ৰে মূল্যবৃদ্ধিৰ মাধমাৰৰ মাজতে ৰন্ধন গেছৰ দাম বৃদ্ধিৰে দেশৰ জনতাৰ মূৰত আন এক ৰাম টাঙোন শোধাইছে নৰেন্দ্ৰ মোদী নেতৃত্বাধীন কেন্দ্ৰৰ এনডিএ চৰকাৰে। আজি কেন্দ্ৰীয় পেট্ৰ’লিয়াম মন্ত্ৰী হৰদীপ সিং পুৰীয়ে ঘৰুৱা ৰন্ধন গেছৰ চিলিণ্ডাৰৰ দাম ৫০ টকাকৈ বৃদ্ধি কৰিবলৈ চৰকাৰে লোৱা সিদ্ধান্তৰ কথা সদৰী কৰে। মূল্যবৃদ্ধিয়ে এইবাৰ উজ্জ্বলা যোজনাকো সামৰি ল’ব বুলি জানিবলৈ দিছে কেন্দ্ৰীয় মন্ত্ৰীগৰাকীয়ে।
সম্প্ৰতি উজ্জ্বলা যোজনাৰ হিতাধিকাৰীসকলে ৫০০ টকাতে ৰন্ধন গেছৰ চিলিণ্ডাৰ লাভ কৰি আছিল যদিও এতিয়াৰে পৰা ৫৫০ টকা ভৰিব লাগিব। গুৱাহাটীকে ধৰি অসমৰ প্ৰতিটো অঞ্চলতে সকলোৱে ৰাজসাহায্যবিহীন দৰত চিলিণ্ডাৰ ক্ৰয় কৰি আহিছে।
উজ্জ্বলা যোজনাৰ হিতাধিকাৰীক বাদ দি অসমত ৰন্ধন গেছৰ চিলিণ্ডাৰ ব্যৱহাৰকাৰীসকলে ৰাজসাহায্যবিহীন ১৪.২ কিলোগ্ৰাম ওজনৰ চিলিণ্ডাৰ আজিৰ তাৰিখত ৮৫২ টকা দৰত ক্ৰয় কৰি আহিছে। উজ্জ্বলা যোজনাৰ হিতাধিকাৰীসকলে চিলিণ্ডাৰ ক্ৰয় কৰাৰ পিছত বেংক একাউণ্টত ৩০০ টকাকৈ ৰাজসাহায্য লাভ কৰে।
ফলত এইসকল গ্ৰাহকৰ ক্ষেত্ৰত চিলিণ্ডাৰৰ দাম হয়গৈ ৫৫২ টকা। আনহাতে উজ্জ্বলা যোজনাৰ বাহিৰৰ যিসকল গ্ৰাহকে ৰাজসাহায্য গ্ৰহণ কৰি আহিছে তেওঁলোকে সাহায্য হিচাপে একাউণ্টত লাভ কৰে মাত্ৰ ১৯ টকা। ৰন্ধন গেছৰ চিলিণ্ডাৰৰ দামবৃদ্ধিৰ সিদ্ধান্তৰ পিছতে বজাৰ বিশ্লেষকসকলে এয়া ট্ৰাম্পৰ নতুন শুল্কনীতিৰ পাৰ্শ্বক্ৰিয়া বুলি মন্তব্য কৰা দেখা গৈছে।
মন্ত্ৰীগৰাকীয়ে আৰু কয় যে প্ৰতি ২-৩ সপ্তাহৰ মূৰে মূৰে ইন্ধন আৰু এলপিজিৰ দামৰ পৰ্যালোচনা কৰা হয়। সেই পৰ্যালোচনা কৰিয়েই এলপিজিৰ দামবৃদ্ধি কৰা হৈছে। এলপিজিৰ লগতে পেট্ৰ’ল আৰু ডিজেলৰ ওপৰতো ২টকাকৈ শুল্ক বৃদ্ধি কৰিছে কেন্দ্ৰ চৰকাৰে। ইয়াৰ ফলত এক লিটাৰ পেট্ৰ’লৰ শুল্ক ১৩ টকা আৰু এক লিটাৰ ডিজেলৰ শুল্ক ১০ টকা হৈছেগৈ। অৱশ্যে এই শুল্কবৃদ্ধিৰ প্ৰভাৱ গ্ৰাহকসকলৰ ওপৰত নপৰে আৰু পেট্ৰ’ল-ডিজেলৰ মূল্যবৃদ্ধি নহয় বুলিও পেট্ৰ’লিয়াম মন্ত্ৰী হৰদীপ সিং পুৰীয়ে স্পষ্ট কৰি দিয়ে।
এই সন্দৰ্ভত কেন্দ্ৰীয় মন্ত্ৰীগৰাকীয়ে জনাই যে সাধাৰণ মানুহক সমস্যাত পেলাবলৈ এই সিদ্ধান্ত লোৱা হোৱা নাই। বৰং তৈল প্ৰতিষ্ঠানসমূহৰ ক্ষতি কিছু পৰিমাণে হ্ৰাস কৰিবলৈকে এই সিদ্ধান্ত গ্ৰহণ কৰা হৈছে। মন্ত্ৰীগৰাকীয়ে আৰু কয় যে ৰন্ধন গেছৰ ৰাজসাহায্য প্ৰদান কৰি অহাৰ ফলত তৈল সংস্থাসমূহৰ ৪৩ হাজাৰ কোটি লোকচান হৈছে।
উল্লেখ্য যে, বিগত সপ্তাহত বাণিজ্যিক এলপিজি চিলিণ্ডাৰৰ দাম ৪১ টকাকৈ হ্ৰাস কৰা হৈছিল। ইয়াৰ ফলত ৰেষ্টুৰেণ্ট, হোটেলসমূহ উপকৃত হৈছে যদিও ঘৰুৱা চিলিণ্ডাৰৰ দাম বৃদ্ধিৰ ফলত এতিয়া দেশৰ সাধাৰণ জনতাৰ অৱস্থা কিছু পৰিমাণে হ’লেও শোচনীয় হৈ পৰাতো নিশ্চিত।