গাঁৱে গাঁৱে ভোগালীক আদৰাৰ প্ৰস্তুতি

নগাঁওঃ ভোগৰ ভোগজৰা লৈ আকৌ অসমীয়াৰ পদূলিমুখ পালে বাপতি সাহোন ভোগালী তথা মাঘ বিহু৷ ভোগৰ উৎসৱ ভোগালী মানেই যেন পৰম আনন্দৰ উৎসৱ৷ শস্য চপোৱাৰ পিছত উদং হৈ পৰা কৃষক ৰাইজৰ আশা-ভৰষাৰ থলী পথাৰসমূহত চলিছে এতিয়া মাঘ বিহুৰ প্ৰস্তুতি ৷ আধুনিকতাৰ ধাম-খুমীয়াত পৰি ভোগালী বিহুৰ কেতবোৰ ঐতিহ্য-পৰম্পৰাত ঘূণে ধৰিছে যদিও এই বিহুৰ উৎসাহ-উদ্দীপনা আজিও হ্ৰাস পোৱা নাই অসমীয়াৰ মাজত ৷

সেয়ে এতিয়া অতি হেঁপাহৰ ভোগালী বিহুটিক আদৰিবলৈ সাজু হৈছে সৰ্বস্তৰৰ জনতা৷ যাৰ পৰিণতিত গ্ৰাম্যঞ্চলৰ প্ৰতিখন ঘৰতে এক উখল-মাখল পৰিবেশ উদ্ভৱ হোৱাৰ বিপৰীতে মুকলি পথাৰত দৃশ্যমান হৈছে জাতীয় সংস্কৃতিৰ অনুশীলন৷ অধিকাংশ গ্ৰাম্যঞ্চলৰ পথাৰত প্ৰতিখন পথাৰত পৰম্পৰা অনুসৰি নিৰ্মাণ কৰি থকা হৈছে মাঘ বিহুৰ অবিচ্ছেদ্য অংগ মেজি নতুবা ভেলাঘৰ৷