পূব বৰপেটাঃ যাতায়াত¸ শিক্ষা¸ চিকিৎসা¸ নিবনুৱা¸ গৰাখহনীয়া আদিৰ সমস্যাকলৈ আজিও চিন্তিত পূব বৰপেটাৰ ৰাইজ। স্বৰাজোত্তৰ কালৰ পৰা ৰাজ্যৰ অন্য জিলাৰ তুলনাত উন্নয়নত পিছ পৰা জিলা জিলাখনেই হৈছে বৰপেটা।

বিশেষকৈ জিলাখনৰ বৰপেটা¸ চেঙা আৰু সৰুক্ষেত্ৰী বিধানসভা সমষ্টীৰ অন্তৰ্গত পূব বৰপেটাৰ ভেল্লা¸ কেওটকুছি¸ পুঠিমাৰী¸ ফতিকগ্ৰহ¸ বাৰাদি গোহেৰপাম¸ মাজগাঁও¸ পাটবাউসী¸ পালহাজী¸ দংৰা¸ ঔমূৰা¸ ভোগেৰপাৰ¸ শুহা-বাৰাদি¸ জনতা বজাৰ¸ চুটিয়াপাৰা¸ হৰিপুৰ¸ বহৰি¸ নগাও¸ বৰবিলা¸ বিষ্ণুপুৰ¸ বাতিকুৰিহা¸ ৰাধাকুছি¸ ভেৰালদি¸ তাঁতিকুছি¸ খৰুৱাপাৰা¸ ভৈৰাগুৰি¸ বাগোদি¸ গহিয়া¸ ব্যাসকুছি¸ বৰমাৰা¸ ভকুৱাতেপা¸ আগদিয়া¸ সৰ্থেবাৰী আদি বিভিন্ন অঞ্চলৰ ৰাইজে এশ-এবুৰি সমস্যাৰে জীৱন নিৰ্বাহ কৰি আহিছে।

সমস্যা সমাধানৰ প্ৰতি চৰকাৰ¸ নিৰ্বাচিত জনপ্ৰতিনিধিৰ চৰম গুৰুত্বহীনতাৰ বাবে অঞ্চলবাসী ৰাইজে যাতায়াত¸ খোৱা পানী¸ কৃষি¸ বিদ্যুৎ¸ শিক্ষাৰ লগতে নিবনুৱা¸ বানপানী¸ গৰাখহনীয়া আদি সকলো ক্ষেত্ৰতে জীয়াতু ভোগ কৰি আহিছে । বিধায়ক¸ সাংসদৰ নীৰৱ ভূমিকাৰ বাবে উপৰোক্ত অঞ্চলসমূহৰ বাট-পথসমূহ জহি খহি গৈছে। গড়কাপ্তানী পথসমূহ জৰাজীৰ্ণ ৰূপত দেখিবলৈ পোৱা গৈছে।

ৰাস্তা¸ ঘাটৰ মাজত থকা কাঠৰ দলংসমূহ বিধায়ক¸ ঠিকাদাৰ তথা বিভাগীয় কৰ্তৃপক্ষৰ বাবে একপ্ৰকাৰ সোণৰ কণী পৰা হাঁহত পৰিণত হৈছে। মেৰামতি কৰাৰ এবছৰ নৌহওঁতেই পূৰ্বৰ দৰে ভয়ংকৰ ৰূপ ধাৰণ কৰা দেখা পোৱ গৈছে। পথ মেৰামতি ক্ষেত্ৰতো একেই কাহিনী বৰ্ণনা কৰিব পাৰি ইয়াৰ উপৰি উক্ত অঞ্চলসমূহত বৰ্তমানলৈকে প্ৰায় ২০ খনৰো অধিক বাঁহৰ সাকোৰে ৰাইজ বিপদসংকুল যাতায়াত কৰিব লগা হৈছে।

উপৰোক্ত অঞ্চলসমূহত দুই-চাৰিখন পি এইচ চি আছে যদিও আপদকালীন সময়ত দুৰ্গম ঠাইৰ পৰা সময়মতে ঢুকি পোৱাত অসুবিধা হয়। চিকিৎসা কেন্দ্ৰসমূহত নাই পৰ্যাপ্ত পৰিমাণে চিকিৎসক¸ নাৰ্ছ¸ ঔষধ-পাতিও নাথাকে । কৃষি সমস্যাৰ ক্ষেত্ৰত কৃষক-বনুৱাই প্ৰয়োজন অনুসৰি নাপায় চৰকাৰী বীজ¸ ঔষধ¸ সাৰ-পানী¸ অন্যান্য সা-সৰঞ্জামৰ লগতে চৰকাৰী এককালীন সাহায্য।

দালাল-মধ্যভোগীৰ প্ৰভাৱত প্ৰকৃত খেতিয়কে কৃষি ঋণ¸ পাৱাৰ টিলাৰ¸ টেক্টৰ আদি প্ৰাপ্তিৰ পৰা বঞ্চিত হয়। খোৱা পানী ক্ষেত্ৰত আইৰণযুক্ত ফ্ল'ৰাইডযুক্ত পানী সেৱন কৰি ৰাইজে বিভন্ন ৰোগত আক্ৰান্ত হোৱা দেখা গৈছে। অঞ্চলসমূহত ঠাই বিশেষে জনসংখ্যা অনুপাতে নাই প্ৰাথমিক বিদ্যালয়। একাংশ বিদ্যালয় ছাত্ৰ-ছাত্ৰীৰ অভাৱত বন্ধ হোৱাৰো উপক্ৰম ঘটিছে।