নতুন দিল্লীঃ প্ৰধানমন্ত্ৰী নৰেন্দ্ৰ মোদীয়ে আজি কিছুসময় পূৰ্বে কেবাখনো ৰাজ্যৰ মুখ্যমন্ত্ৰীসকলৰ সৈতে কৰ’না সন্দৰ্ভত ভিডিঅ’ কনফাৰেঞ্চিংযোগে আলোচনাত মিলিত হয়। এই আলোচনাকালত ৩ মে’ৰ পিছতো দেশত লকডাউন অব্যাহত থাকিব। 

অৱশ্যে এই লকডাউন অধিকভাৱে সংক্ৰমিত হোৱা অঞ্চলসমূহতহে কঠোৰভাৱে ৰূপায়ণ কৰিব বুলিও সদৰী কৰে প্ৰধানমন্ত্ৰীগৰাকীয়ে। লকডাউন স্তৰ অনুযায়ী উঠাই দিবলৈ চৰকাৰে পৰিকল্পনা গ্ৰহণ কৰিছে বুলিও বৈঠকত জনায় মোদীয়ে।

আজিৰ বৈঠকত ভাগ লৈ আলোচনাত ভাগ লোৱা ৯খন ৰাজ্যৰ মুখ্যমন্ত্ৰীসকলৰ ভিতৰত ৫জনে আৰ্থিক স্থিতিক পুনৰ স্বাভাৱিক কৰি তোলাৰ স্বাৰ্থত লকডাউন খোলাৰ ব্যৱস্থা কৰিবলৈ আহ্বান জনায়। আনহাতে বাকীকেইজন মুখ্যমন্ত্ৰীয়ে কৰ’নাৰ সংক্ৰমণ যাতে আৰু ভয়াৱহ হ’ব নোৱাৰে তাৰ বাবে লকডাউন বৃদ্ধি কৰা উচিত বুলি মন্তব্য দাঙি ধৰে। 


► তলৰ বিশেষ প্ৰতিবেদন পঢ়িবলৈ ক্লিক কৰক ফটোখনত...


প্ৰধানমন্ত্ৰী কাৰ্যালয়ৰ সূত্ৰৰ উধৃতি দি এনডিটিভিৰ এটি বাতৰিত কোৱা হৈছে যে আজিৰ বৈঠকৰ অন্তত সকলো ৰাজ্যৰ মুখ্যমন্ত্ৰীসকলক লকডাউন উঠাবলৈ পৰ্যায়ক্ৰমে প্ৰস্তুতি চলাবলৈ পৰামৰ্শ আগবঢ়াইছে প্ৰধানমন্ত্ৰী মোদীয়ে। ইয়াৰ বাবে সংক্ৰমণৰ ওপৰত ভিত্তি কৰি জিলাসমূহক ৰেড, গ্ৰীণ আৰু অৰেঞ্জ আদি জ’নত ভাগ কৰিবলৈকো কৈছে প্ৰধানমন্ত্ৰীগৰাকীয়ে।

এই ভিডিঅ’ বৈঠকত বিহাৰ, ওড়িশা, গুজৰাট, হাৰিয়ানা, উত্তৰাখণ্ড, হিমাচল প্ৰদেশ আৰু পুডুচেৰীৰ মুখ্যমন্ত্ৰীসকলে ভাগ লয়। উত্তৰ-পূবৰ পৰা মেঘালয় আৰু মিজোৰামৰ মুখ্যমন্ত্ৰীয়ে অংশগ্ৰহণ কৰে। আনহাতে কেৰালাৰ মুখ্যমন্ত্ৰী পিনাৰয়ি বিজয়নৰ হৈ বৈঠকত অংশগ্ৰহণ কৰে ৰাজ্যখনৰ মুখ্য সচিবে।

ইফালে, একাধিক বাদানুবাদৰ অন্তত এই বৈঠকত কেৱল প্ৰত্যক্ষদৰ্শী হিচাপে ভাগ লয় পশ্চিমবংগৰ মুখ্যমন্ত্ৰী মমতা বেনাৰ্জীয়ে। অৱশ্যে তেওঁ বৈঠকত কথা কোৱাৰ কোনো সুযোগ লাভ নকৰিলে বুলি জনাইছে। এই লৈ মুখ্যমন্ত্ৰীগৰাকী ক্ষুব্ধ হৈ পৰিছে বুলিও বাতৰিত প্ৰকাশ পাইছে। উল্লেখ্য যে পশ্চিমবংগৰ মুখ্যমন্ত্ৰীগৰাকীৰ ৰাজ্যপালৰ জৰিয়তে কৰ'নাক লৈ বিগত কিছুদিন ধৰি কেন্দ্ৰৰ সৈতে অব্যাহত আছে একপ্ৰকাৰৰ শীতল যুদ্ধ।