জয়ন্ত মুদৈ, নগাঁওঃ আজি ঘোষিত উচ্চতৰ মাধ্যমিক চূড়ান্ত পৰীক্ষাৰ ফলাফলত ঈষণীয় সফলতা অৰ্জন কৰিছে নগঞা পৰীক্ষাৰ্থীয়ে৷ মুঠ এঘাৰ গৰাকী নগঞা মেধাৱী পৰীক্ষাৰ্থীয়ে ৰাজ্যৰ ভিতৰত স্থান লাভ কৰি জিলাখনলৈ গৌৰৱ কঢ়িয়াই আনে৷
ইয়াৰ ভিতৰত বিজ্ঞান শাখাত ৰামানুজন জুনিয়ৰ কলেজৰ ছাত্ৰ বিতোপন আৰান্ধৰাই অসমৰ ভিতৰতে প্ৰথম স্থান দখল কৰি জিলাবাসীক গৌৰাম্বিত কৰিছে।
এই মেধাৱী ছাত্ৰজনকে ধৰি বিজ্ঞান শাখাত ৰামানুজন জুনিয়ৰ কলেজৰপৰা হৃদি প্ৰিয়ম শৰ্মাই তৃতীয়, অয়ন কৌশিক মহন্ত আৰু বিশাল বৰুৱাই পঞ্চম, শুভাশীষ দেয়ে অষ্টম, অভিজ্ঞান ডি বাঢ়ৈয়ে নৱম আৰু কৌস্তুভ কিশোৰ কলিতাই দশম স্থান লাভ কৰাৰ লগতে মেট্ৰিক্স জুনিয়ৰ কলেজৰ হীৰক জ্যোতি হাজৰিকাই চতুৰ্থ আৰু কনচেপ্ট জুনিয়ৰ কলেজৰ পুস্পা গুপ্তাই দশম স্থান অৰ্জন কৰিবলৈ সক্ষম হয়৷
আনহাতে, কলা শাখাত কনচেপ্ট জুনিয়ৰ কলেজৰ গীতাঞ্জলি বৰঠাকুৰে অসমৰ ভিতৰত দ্বিতীয় স্থান লাভ কৰাৰ বিপৰীতে বাণিজ্য শাখাত গীতাঞ্জলি জুনিয়ৰ কলেজৰ তানিশা আলামপুৰীয়াই ষষ্ঠ স্থান দখলেৰে জিলাখনক গৌৰাম্বিত কৰিবলৈ সক্ষম হৈছে৷
কাজেই, এনে বৃহৎ সফলতাত অতিকে উৎসাহিত হৈ পৰা নগঞা ৰাইজৰ মাজত স্বাভাবিকতেই উছাহৰ ঢল বোৱা পৰিলক্ষিত হৈছে৷ ফলাফল ঘোষণাৰ পাছতেই স্থান লাভ কৰা তিনিওখন শিক্ষানুষ্ঠানত উৎসাহী জনতাৰ সোঁত বয় আৰু সকলোয়ে স্ফূৰ্তি-তামাচাৰে বিজয় উৎসৱ পালন কৰে।