জয়ন্ত মুদৈ,নগাঁওঃ নগাঁও জিলাৰ বটদ্ৰৱা বিধান সভা সমষ্টিৰ অন্তৰ্গত ৰাইদঙীয়াৰ ক’ৰচোং সত্ৰৰ এজনী মৰম লগা কণমানী ছোৱালী৷ নিষ্ঠুৰ বাস্তৱৰ সন্মুখীন হৈ পখিলা খেদা বয়সতে জীৱনৰ কঠোৰ সংগ্ৰামৰ সন্মুখীন হ’ব লগীয়া হৈছে এই কনমানীজনীয়ে৷ বহু কষ্টৰে তাই অব্যাহত ৰাখিছে কঠোৰ জীৱন সংগ্ৰাম৷ উপলব্ধি কৰিব জোখাৰে বয়স নৌহওঁতেই চম্ভালিবলগীয়া হৈছে নিজৰ ঘৰখন৷ আনকি অন্ধ মাতৃক চোৱাচিতা কৰিবৰ বাবেই বাদ দিবলগীয়া হৈছে বিদ্যালয়৷ এই কনমানিজনীৰ নাম হৈছে পল্লবী বৰা৷ 

বয়স মাত্ৰ বাৰ বছৰ। স্কুলৰ সমনীয়াৰ লগত পঢ়াশুনা কৰা, খেল ধেমালি, হাঁহি-স্ফুৰ্তি বা ৰং-তামাচা কৰাৰ বয়সতে হঠাৎ এই কনমানিজনীৰ জীৱনলৈ নামি অহা কাল অমানিশাৰ কাৰণ হ’ল পিতৃ-মাতৃৰ তায়েই একমাত্ৰ সন্তান। পঞ্চম মানত পঢ়িবলৈ লওঁতেই এদিন দেউতাক উচ্চ ৰক্তচাজনীত ৰোগত আক্ৰান্ত শৰীৰৰ এটা অংশ সম্পূৰ্ণ বিকল হৈ পৰে। যিহেতু বাপেকেই আছিল তেওঁলোকৰ একমাত্ৰ ভৰষা৷ গতিকে বাপেকে অসুস্থ হৈ পৰাৰ লগে লগে স্বাভাৱিকতেই আৰ্থিকভাৱে দুৰ্বল হৈ পৰে পৰিয়ালটো৷ এনেদৰে এটা বছৰ পাৰ হোৱাৰ পিছত এদিন আকৌ মাক পুতুলি বৰা অসুস্থ হৈ পৰে৷ এই অসুস্থতাতেই মাকে নিজৰ দৃষ্টি শক্তিও হেৰুৱাই পেলায়৷ 

ফলত মাকৰ দৃষ্টিহীনতাই কনমানিজনীৰ জীৱনলৈ নমাই আনে কাল অমানিশা৷ ক’লৈ যাব, কি কৰিব তাই৷ তাইৰ সম্পত্তি বুলিবলৈ তাইৰ লগত আছে বাপেকে মৰমতে কিনি দিয়া চাইকেলখন আৰু স্কুলৰ কেইখনমান কিতাপ আৰু বহী৷ বাপেক অসুস্থ থাকোতে দুই এদিন স্কুললৈ গৈ আছিল যদিও শেষত একেবাৰেই পঢ়াৰ আশা বাদ দি নিজে মাক-দেউতাকৰ শুশ্ৰুষাত লাগিবলৈ বাধ্য হয়৷ ডাক্তৰৰ ওচৰত নিয়াৰ তাইৰ ক্ষমতা নায়৷ 

তদুপৰি তাই মাক-দেউতাকক কি যোগাৰ কৰি দিব পাৰিব তাকলৈও চিন্তা৷ গতিকে গাঁওখনৰ ঘৰে ঘৰে যাৰ পৰা যি পাই তাকে নিজে বনাই মাক বাপেকৰ খুওৱাৰ লগতে তাৰে সামান্য তাই খায়৷ তেনেকৈ এটা বছৰ পাৰ হোৱাৰ পিছতে হঠাৎ এদিন দেউতাকৰ মৃত্যু হয়৷ ৰাইজেই মিলি দেউতাকৰ শ্ৰাদ্ধৰ সকলো কাম কৰি দিয়ে৷ ইফালে, ভুতৰ ওপৰত দানহ পৰাদি এনেদৰে কঠোৰ পৰিশ্ৰম কৰি কৰি এইবাৰ তাইও বৃক্ক ৰোগত আক্ৰান্ত হয়৷ গাঁৱৰ মানুহে তাইক চিকিৎসকৰ ওচৰত নি চিকিৎসা প্ৰদান কৰাই সুস্থ কৰি তোলে যদিও তাই সম্পূৰ্ণ সুস্থ হ’ব পৰা নায়৷ 

পৰিতাপৰ বিষয় যে তেওঁলোকৰ একমাত্ৰ বিছনাখন দেউতাকৰ অন্তিম সৎকাৰত দি এতিয়া মাক আৰু তাই এখন তুলিতে মাটিতে শুব লগাত পৰিছে৷ আনৰ ঘৰৰ ৰাহি হোৱা খাদ্য সমুহ এতিয়া সিহঁতৰ বাবে জীয়াই থকাৰ সম্বল৷ এসাঁজ যদি খাইছে আন সাজৰ বাবে আনৰ ঘৰলৈ বাট চাইছে৷ মুঠতে এক দুৰ্বিসহ জীৱন পাৰ কৰিব লগাত পৰিছে পল্লবী আৰু মাকে। নিয়তিৰ এই পৰিহাসৰ বাবে দুুৰ্বিসহ হৈ পৰা এই কনমানি জনী আৰু অন্ধ মাতৃয়ে বাট চাইছে কোনোবা সুহৃদ লোক তথা দল সংগঠনৰ সহায়ৰ বাবে৷ 

কিন্তু এইক্ষেত্ৰত পোৱা নাই ৰজা ঘৰৰ কোনো সঁহাৰি৷ কিয়নো, বিভিন্ন সভা-সমিতিত পৰিবৰ্তনকামী ৰাজ্য চৰকাৰৰ মন্ত্ৰী-বিধায়কসকলে সুহৃদ, অটল অমৃত অভিযান, আয়ুষ্মান ভাৰত আদি বিভিন্ন চৰকাৰী আঁচনিৰ বিষয়ে ঘোষণা কৰি ৰাইজক আকৰ্ষিত কৰাৰ চেষ্টা চলাই আহিছে যদিও বাস্তৱ ক্ষেত্ৰত এনেধৰণৰ কোনো আঁচনিৰ সুফল পোৱা নাই এই দুৰ্ভগীয়া পৰিয়ালটোয়ে৷

আনকি পিতৃৰ মৃত্যুৰ পিছত দৃষ্টিহীনা পল্লৱীৰ দৰিদ্ৰ মাতৃয়ে আজিকোপতি বিধৱা মহিলাই লাভ কৰিবলগীয়া এককালীন সাহায্যও লাভ কৰা নায়৷ জানিব পৰা মতে, অসম চৰকাৰৰ সমাজ কল্যাণ বিভাগৰপৰা কোনোবা এগৰাকী আহি পল্লৱী আৰু তেওঁৰ মাতৃৰ সকলো তথ্য-পাতি লৈ গৈছিল যদিও কেইবামাহো অতিক্ৰম কৰাৰ পিছতো আশ্চৰ্যজনকভাবে বিভাগটোৰপৰা পোৱা নাই কোনো সঁহাৰি৷ আনকি শাসকীয় বিজেপি দলৰ স্থানীয় নেতা-কৰ্মী পৰিয়ালটোৰ দুৰৱস্থা সন্দৰ্ভত অৱগত যদিও স্থানীয় বিধায়িকা আঙুৰলতা ডেকাৰ সুদৃষ্টিৰপৰা এতিয়াও এই হতভাগা মাতৃ-কন্যা বঞ্চিত হৈ থকা বিষয়টোয়ে সচেতন মহলত ব্যাপক চৰ্চা লাভ কৰিছে৷