গুৱাহাটীঃ খেতিয়কৰ নামত এতিয়াও বতাহত টকা উৰি আছে, এইখন অসমতে একাংশই এতিয়া হোৰাহোৰে ধন ঘটি আছে। পিছে কেনেকৈ? আপোনালোকক কোনো অৰ্থহীন চাছপেন্সত ৰাখিব বিচৰা নাই।
পোনতেই এই লিংকটোলৈ যাওক। pmkisan.gov.in। এই লিংকটো হ’ল, প্ৰধানমন্ত্ৰী কিষাণ সন্মান নিধিৰ। আপোনাৰো নিশ্চয় মনত পৰিছে, এই আঁচনিৰ জৰিয়তে কেন্দ্ৰীয় চৰকাৰে দুখীয়া কৃষকক বছৰি ন্যুনতম ৬০০০ টকাৰ সাহায্য প্ৰদান কৰিছে। ইতিমধ্যে প্ৰথম কিস্তিৰ ধন কৃষকে লাভ কৰিবলৈ সক্ষম হৈছে।
এতিয়া লিংকটোলৈ গৈ আপুনিও যদি নিজৰ ৰাজ্য, জিলা, ছাব-ডিভিজন, ব্লক আৰু নিজৰ গাঁৱৰ নাম লিখি দিয়ে তেন্তে আপোনাৰ নিজৰ গাঁওখনৰো কোন কোন লোকে সাহায্য পাইছে তাৰ নাম তালিকা পাব। অসম বা ভাৰতবৰ্ষৰ প্ৰতিখন গাঁৱৰে প্ৰতিজন হিতাধিকাৰীৰ নাম-তালিকা ইয়াত আছে।
গাঁৱে-গাঁৱে প্ৰকৃত ছবি
গুৰুত্বপূৰ্ণ কথাটো হ’ল, বিশেষকৈ অসমত ইয়াৰে গৰিষ্ঠসংখ্যাক হিতাধিকাৰীৰ নামেই ভুৱা প্ৰমাণিত হোৱাৰ অভিযোগ আহিছে। চৰকাৰী আঁচনিৰ গইনা লৈ ভুৱা হিতাধিকাৰীৰ নাম-তালিকাৰে এতিয়া কোৰোনাৰে ধন চপাইছে একাংশ ঘোচখোৰ বিষয়া-কৰ্মচাৰী তথা পঞ্চায়ত প্ৰতিনিধিয়ে।
যোৰহাট জিলাৰ টিয়ক সমষ্টিৰ অন্তৰ্গত পীড়াকটা এটা বৃহত্তৰ অঞ্চল। পীড়াকটা অঞ্চলৰ ১৩খন গাঁৱৰ হিতাধিকাৰীৰ নাম-তালিকাত যথেষ্টসংখ্যক ভুৱা হিতাধিকাৰীৰ নাম পোহৰলৈ আহিছে। নাম-তালিকাত এনে বহু মানুহৰ নাম আৰু উপাধি আছে, সেই নাম তথা উপাধিধাৰী ব্যক্তি বা সম্প্ৰদায়ৰ কোনো এজন লোকেই কোনো এখন গাঁৱতেই নাই।
'বিষয়টোৰ গুৰুত্বতাৰ প্ৰতি লক্ষ্য ৰাখি ইতিমধ্যে যোৰহাট জিলাৰ উপায়ুক্তগৰাকীক হোৱাটছএপৰ জৰিয়তে অভিযোগ দাখিল কৰা হৈছে। লগতে প্ৰধানমন্ত্ৰীৰ কাৰ্যালয়তো এই সন্দৰ্ভত অভিযোগ দাখিল কৰা হৈছে। লকডাউন খুলিলেই উপায়ুক্তগৰাকীক ব্যক্তিগতভাৱে সাক্ষাৎ কৰি লিখিত অভিযোগ দাখিল কৰা হ’ব। অৱশ্যে হোৱাটছএপ বাৰ্তালাপত বিষয়টো চোৱা হ’ব বুলি মন্তব্য কৰিছে উপায়ুক্তগৰাকীয়ে।’-NNOৰ আগত এই কথা ব্যক্ত কৰিলে স্থানীয় এজন সচেতন যুৱকে।
''সমগ্ৰ তালিকাখনত ১০০০ ৰো অধিক ভুৱা বা সন্দেহজনক হিতাধিকাৰীৰ নাম দেখা গৈছে। প্ৰতিজনৰ বাবদ যদি ৬০০০ টকাকৈ ধৰা হয় তেন্তে '১০০০X৬০০০’ অংকটো কিমান সেয়া সহজেই অনুমেয়।’’-তেওঁৰ মত।
আনহাতে, ধুবুৰী আৰু গোৱালপাৰা জিলাৰো ভিন্ন অঞ্চলত আঁচনিখনৰ নামত ব্যাপক অনিয়ম সংঘটিত হোৱাৰ অভিযোগ উত্থাপিত হৈছে। জিলা দুখনৰ কেবাখনো গাঁৱত নৱম শ্ৰেণীত পঢ়ি থকা ছাত্ৰয়ো প্ৰধানমন্ত্ৰী কিষাণ সন্মানৰ ধন লাভ কৰা বুলি সচেতন লোকসকলে মন্তব্য কৰা দেখা গৈছে। তামাৰহাটকে ধৰি ধুবুৰী জিলাৰ কোনো কোনো ঠাইত একে পৰিয়ালৰ কেবাজনো সদস্যৰ লগতে চাকৰি কৰা লোকৰ সন্তানৰ নামো তালিকাত থকা বুলি ভিন্নজনে জনাইছে।
"ধুবুৰীৰ তামাৰহাটত একে পৰিয়ালৰ কেবাজনৰো নাম আমি তালিকাত থকা দেখিছো। গোলকগঞ্জতো কোনোদিনেই খেতি-বাতি নকৰা দোকান দিয়া লোকৰ নাম তালিকাত আছে। আঁচনিত স্পষ্টকৈ উল্লেখ আছে এই সুবিধা কেৱল কৃষকেহে পাব। তেনে ক্ষেত্ৰত কেনেকৈ খেতিৰ সৈতে সম্পৰ্ক নথকা লোকে কৃষকৰ আঁচনিৰ সুবিধা পাব পাৰে? আমি জনা মতে এনে লোকৰ নাম কমিছন লৈ সংশ্লিষ্ট দায়িত্বত থকাসকলে তালিকাত অন্তৰ্ভুক্ত কৰিছে।'-NNOৰ আগত এইদৰে কয় ধুবুৰীৰ সৰকাৰ উপাধিৰ এজন যুৱকে।
কামৰূপ জিলাৰ বিহদিয়া-জাজিকোণা ব্লকৰ অন্তৰ্গত গাঁওসমূহতো উত্থাপিত হৈছে অনিয়ম সংঘটিত হোৱাৰ অভিযোগ। ছ’চিয়েল মিডিয়াযোগে উক্ত ব্লকৰ বৰকুৰিহা গাঁৱৰ শৰণীয়া উপাধিধাৰী এজন ব্যক্তিয়ে লিখিছে, 'বেছিভাগ মানুহেই অচিনাকি। ডাঙৰ কথাটো হ'ল মই সৰুৰে পৰা খেলি ডাঙৰ হোৱা গাঁৱখনত যে কুমাৰ, বৈশ্য, বৰ্মন, শইকীয়া আদি উপাধিৰ মানুহ আছে সেই কথা এই তালিকাখনৰ পৰাহে জানিব পাৰিলো। ইছলামধৰ্মী যিসকল লোকৰ নাম তালিকাখনত আছে সেইবোৰৰো অস্তিত্বৰ ওপৰত সন্দেহ আছে।’
জিলাখনৰ চাংসাৰি গাঁৱতো স্থানীয় লোকসকলে অনিয়ম সংঘটিত হোৱা বুলি দাবী কৰা দেখা গৈছে। সুশীল নাথ নামৰ এজনে ফেচবুকত লিখিছে, 'কৃষক সন্মান নিধিৰ অধীনত যিবিলাক খেতিয়কৰ নাম (সকলো নহয়) আমাৰ চাংসাৰি গাঁৱৰ পৰা নিৰ্বাচিত হৈছে তাৰ ভিতৰত এনেকুৱা কিছুমান খেতিয়কৰ নাম আছিল যিসকলে হয়তো আজিলৈ খেতিৰ নামত পথাৰৰ বোকা পানী গচকি পোৱা নাই (গেৰাণ্টি)। নিৰ্বাচন কমিটিক প্ৰণাম।’
নলবাৰী জিলাতো আঁচনিখনৰ নামত বিভিন্ন গাঁৱত প্ৰকৃত কৃষকক বঞ্চিত কৰি বহুসংখ্যক ভুৱা নাম অন্তৰ্ভুক্ত কৰাৰ অভিযোগ উঠিছে। এই সন্দৰ্ভত স্থানীয় ৰূপজ্যোতি যুৱক সংঘৰ তৰফৰ পৰা জিলা উপায়ুক্তক স্মাৰক পত্ৰও প্ৰদান কৰিছে। জিলাখনৰ বৰ্মন, কলিতা, বেজবৰুৱা, মেধি আৰু শীল উপাধিৰ লোক বসবাস কৰা নানকাৰ ভয়ৰা গাঁৱত পাল, সাহা, সৰকাৰ, ঘোষ, হ'ক, ৰহমান, বেগম, আলী, বসুমতাৰী, ব্ৰহ্ম আদি উপাধিযুক্ত লোকেৰে ভৰি আছে বুলি জনাইছে সংঘৰ সাধাৰণ সম্পাদক দিলজিৎ বৰ্মনে। ছ’চিয়েল মিডিয়াযোগে তেওঁ বাকী গাঁৱৰ লোকসকলকো সতৰ্ক হ’বলৈ আহ্বান জনাইছে।
এয়া মাত্ৰ কেইটামান উদাহৰণহে। এতিয়া আপোনালোকেও ওপৰত উল্লেখ কৰা লিংকটোত ক্লিক কৰি নিজৰ গাঁওখনৰ নাম-তালিকা চাওকচোন। নাম-তালিকাত কিমান ভুৱা হিতাধিকাৰীৰ নাম আছে সেয়া আমাকো জনাওক, ৰাজ্যবাসীকো জানিবলৈ দিয়ক।
কিয় এনে হ’বলৈ পাইছে?
পাঠকসকলে চাগৈ নিশ্চয় জানে, অসমত আধাৰ কাৰ্ড এতিয়াও বাধ্যতামূলক হোৱা নাই। অৰ্থাৎ, হিতাধিকাৰী হ’বলৈ আধাৰ কাৰ্ড নহ’লেও হ’ব। তাৰেই সুযোগ লৈছে ঘোঁচখোৰ বিষয়া-কৰ্মচাৰী তথা পঞ্চায়ত প্ৰতিনিধিসকলে। উল্লেখ্য যে, প্ৰাৰম্ভিক তালিকাখন গাঁও পঞ্চায়তৰ সভাপতি, সচিব তথা ৰাজহ চক্ৰ বিষয়া আদিয়ে প্ৰস্তুত কৰে। এনে তালিকা প্ৰস্তুত কৰা সময়তে সুযোগ লয় ধুৰন্ধৰ ব্যক্তিসকলে।
আপোনালোকৰ মনতো প্ৰশ্ন জাগিব পাৰে যিটো ধনৰাশি পোনে পোনে হিতাধিকাৰীৰ বেংক একাউণ্টত সোমাই, তেনেস্থলত কেনেকৈ দুৰ্নীতি সম্ভৱ হ’ব পাৰে? কিন্তু অনুসন্ধানত দেখা গৈছে যে, ধন আত্মসাতৰ বাবে ভুৱা হিতাধিকাৰীৰ নামত ভুৱা একাউণ্টো খুলি লোৱা হৈছে।
অধিকাংশ ক্ষেত্ৰতে দেখা গৈছে আন জিলাৰ বা ঠাইৰ পৰা গৈ উক্ত স্থানসমূহত শ্ৰমিক হিচাপে কৰ্মৰত লোকসকলক সেই ঠাইৰ ঠিকনাৰে স্থানীয় বেংকত একাউণ্ট খুলি দি হিতাধিকাৰীৰ তালিকাত ফিফটি-ফিফটি অথবা ছিক্সটি-ফৰটি হিচাপত অন্তৰ্ভুক্ত কৰা হৈছে। যেতিয়াই অনলাইনযোগে সেই লোকসকলৰ একাউণ্টত পিএম কিষাণ সন্মানৰ ধন সোমাব তেতিয়াই তাৰ পৰা এটা অংশ সংগ্ৰহ কৰাৰ অভিসন্ধি ৰচিছে তালিকা প্ৰস্তুতৰ সৈতে জড়িত দুৰ্নীতিপৰায়ণ ঘোঁচখোৰ বিষয়া-কৰ্মচাৰী তথা পঞ্চায়ত প্ৰতিনিধিসকলে।
কি আছে আঁচনিখনত?
এই আঁচনিখন ৰূপায়ণৰ বাবে ২০১৯-২০২০ বিত্তীয় বৰ্ষৰ বাবে মুঠ ৭৫ হাজাৰ কোটি টকা ধাৰ্য কৰিছে কেন্দ্ৰ চৰকাৰে। ২০১৮ চনৰ ১ ডিচেম্বৰৰ পৰা প্ৰযোজ্য হোৱা এই আঁচনিখনৰ জৰিয়তে সমগ্ৰ দেশৰ মুঠ ১৩.১৫ কোটি উপান্ত কৃষকক সামৰি লোৱা লক্ষ্য নিৰ্ধাৰণ কৰা হৈছে।
স্বামী, স্ত্ৰী আৰু সন্তানৰে পৰিপূৰ্ণ অতিকমেও ৪-৫ জন সদস্য থকা যিসকল কৃষক পৰিয়ালৰ ২ হেক্টৰ বা ১৪ বিঘাতকৈ কম কৃষিভূমি আছে সেইসকল কৃষকেহে এই আঁচনিৰ সুবিধা লাভ কৰিব বুলিও স্পষ্টকৈ উল্লেখ আছে আঁচনিখনত। আঁচনিখনৰ সুবিধা লাভৰ বাবে আধাৰ কাৰ্ড বাধ্যতামূলক বুলি কোৱা হৈছে যদিও আধাৰ কাৰ্ড সম্পূৰ্ণৰূপে হৈ নুঠা ৰাজ্যসমূহত আন নথি-পত্ৰ গ্ৰহণ কৰিব পাৰি বুলি সদৰী কৰিছে।
অৱশ্যে যদিহে আধাৰ কাৰ্ড নথকা ৰাজ্যসমূহত হিতাধিকাৰীসকলৰ ক্ষেত্ৰত বেংক একাউণ্টলৈ পোনপটীয়াকৈ ধন হস্তান্তৰ কৰাৰ সময়ত কোনো তথ্যৰ ভুল-ক্ৰুটি ধৰা পৰে তেন্তে সমুদায় ধন ঘূৰাই লোৱাৰ ব্যৱস্থা কৰাৰ কথাও আঁচনিখনত উল্লেখ কৰা হৈছে। এনে পৰিপ্ৰেক্ষিতত অসমত আঁচনিখন ৰূপায়ণত যি অনিয়ম সংঘটিত হৈছে বুলি অভিযোগ উত্থাপিত হৈছে সেয়া সঁচা প্ৰমাণিত হ’লে ভুৱা হিতাধিকাৰীসকলে ধন উভতাই দিবলগীয়া হোৱাতো নিশ্চিত বুলিব পাৰি।