কাছাৰঃ হাজাৰ হাজাৰ ছাত্ৰ-ছাত্ৰীৰ প্ৰতিবাদত উত্তাল হ’ল কাছাৰৰ চহৰ ৷ ৰাজ্য চৰকাৰ তথা গৃহ বিভাগৰ বিৰুদ্ধে অপহৰণকাৰীক আটক কৰিব নোৱাৰাৰ অভিযোগ উত্থাপন কৰি শুকুৰবাৰে ৰাজপথলৈ ওলাই আহিল অসম বিশ্ববিদ্যালয়ৰ ছাত্ৰ-ছাত্ৰী৷

উল্লেখ্য যে, অসম বিশ্ববিদ্যালয়ৰ প্ৰৱক্তা শুভদীপ চৌধুৰীৰ কন্যা ৪ জুনত চৰকাৰী আৱাসগৃহৰ পৰা নিৰুদ্দেশ হৈছিল। পিছত আৰক্ষীয়ে যোৱা ১০ জুনত মেঘালয়ৰ ক্লিয়েৰহিয়াটত অপহৰণকাৰীৰ কবলৰ পৰা উদ্ধাৰ কৰে প্ৰৱক্তাগৰাকীৰ কন্যাক৷

শিশুটিক উদ্ধাৰৰ ১৩ দিন উকলি যোৱাৰ পাছতো অপহৰণকাৰীক আজিলৈ আৰক্ষীয়ে আটক কৰিব নোৱাৰাত ছাত্ৰ-ছাত্ৰী তথা স্থানীয় ৰাইজে উত্তাল প্ৰতিবাদ সাব্যস্ত কৰে৷ ছাত্ৰ-ছাত্ৰী সহিতে প্ৰায় ৫০০০ হাজাৰ লোকে আৰক্ষী তথা চৰকাৰ বিৰোধী শ্ল’গানেৰে ৰাজপথ কপাই তোলে৷

বনকৰা যুৱতী নেহা বাগতিয়ে অপহৰণ কাণ্ডৰ সৈতে জড়িত থকা বুলি স্পষ্ট হোৱাৰ পিছতো আৰক্ষীয়ে আটক কৰিব নোৱাৰাত ক্ষোভিত হৈ ৰাজপথলৈ ওলাই আহে ৰাইজ৷ শীঘ্ৰে নেহা বাগতিক কৰায়ত্ব নকৰিলে পুনৰাই আন্দোলন কৰাৰো হুংকাৰ প্ৰদান কৰে ছাত্ৰ-ছাত্ৰীসকলে৷

ADGP মুকেশ আগৰৱালাৰ নেতৃত্বত অভিযান চলাই অসম আৰক্ষীৰ এটা দলে শিশুটিক উদ্ধাৰ কৰিছিল। আৰক্ষী-প্ৰশাসনে অধ্যাপকৰ দুবছৰীয়া কন্যাগৰাকীক উদ্ধাৰৰ বাবে দিনে-নিশাই অভিযান চলোৱাৰ লগতে নেতাজী ছাত্ৰ যুৱ সন্থাই জিলা খনৰ বাটে-ঘাটে শিশুটোৰ ফটো লগাই ৰাইজক উদ্ধাৰত সহায় কৰিবলৈ আহ্বান জনাইছিল।

প্ৰাক্তন মন্ত্ৰী গৌতম ৰয়ে কিশোৰীগৰাকীৰ খবৰ দিওতাক এক লাখ, কাছাৰ আৰক্ষীয়ে ৫০ হাজাৰ, সোণাইৰ বিধায়ক আমিনুল হক লস্কৰে এক লাখ টকা আৰু নেতাজী ছাত্ৰ-যুৱ সন্থায়ো নগদ ধন দিব বুলি ঘোষণা কৰিছিল।