তেজপুৰঃ সমগ্ৰ ৰাজ্যৰ লগতে শোণিতপুৰ জিলাৰ ভিন্ন স্থানত আজি সুন্দৰৰ পূজাৰী, সুৰৰ উপাসক কলাগুৰু বিষ্ণু ৰাভাক স্মৰণ কৰা হয়।
ভাৰতৰ স্বাধীনতা সংগ্ৰামত বলিষ্ঠতাৰে নিজক জড়িত কৰি সাম্যবাদী আন্দোলন গঢ়ি আমৃত্যু সংগ্ৰামী সত্বাৰে শিল্প সাধনাত কৰি যোৱা শিল্পীগৰাকীৰ সমাধিক্ষেত্ৰত বিভিন্ন দল সংগঠনে শ্ৰদ্ধাঞ্জলি জনায়।
তেজপুৰ সমষ্টিৰ বিধায়ক বৃন্দাবন গোস্বামী, শোণিতপুৰ জিলা ছাত্ৰ সন্থাৰ সাঃসম্পাদক নিতুল বৰা, তেজপুৰ আঞ্চলিক ছাত্ৰ সন্থাৰ সাঃ সম্পাদক অৰূপ তালুকদাৰ, সাংস্কৃিতক সম্পাদক কৃষ্ণ বৈশ্য, দেবাঞ্জন পাঠক, প্ৰাঞ্জল দাসে ৰাভাৰ সমাধিক্ষেত্ৰত শ্ৰদ্ধাঞ্জলি জনায়।
আনহাতে তেজপুৰ সাহিত্য সভাৰ সভাপতি হেমন্ত কুমাৰ বৰুৱা, বিশিষ্ট শিক্ষাবিদ বেণুধৰ কাকতি, সমাজকৰ্মী মৃনালী চেতিয়া, এমট্ৰনৰ উপাধ্যক্ষ ঋতুবৰণ শৰ্মাকে ধৰি বিশিষ্ট ব্যক্তি সকলে তেজপুৰ সাহিত্য সভা প্ৰাংগণত বিষ্ণু, জ্যোতি, ফণী এই ত্ৰিমূৰ্তিকেইগৰাকীৰ মূৰ্তিত মাল্যাৰ্পণৰে শ্ৰদ্ধাঞ্জলি জনায়।
বাণ থিয়েটাৰ পৰিচালনা সমিতিয়েও শ্ৰদ্ধাঞ্জলি কাৰ্যসূচীৰ আয়োজন কৰে। ইয়াৰ উপৰিও জিলাখনৰ মিছন চাৰিআলি, ডিপোটা, বিহগুৰিৰ চন্দ্ৰনাথ শৰ্মা স্মৃতি ভৱন পৰিচালনা সমিতি, পশ্চিম তেজপুৰ আঞ্চলিক ৰাভা ছাত্ৰ সন্থাই নিৰাইআটিত, বাপুভেটি যুৱ সমাজে বাপুভেটিত আড়ম্বৰপূৰ্ণভাবে ৰাভা দিৱস উদযাপন কৰি প্ৰিয় শিল্পীগৰাকীক শ্ৰদ্ধা জনোৱাৰ লগতে সাংস্কৃতিক অনুষ্ঠান অনুষ্ঠিত কৰে।