গুৱাহাটীৰ শিলসাঁকোৰ এক প্ৰতিবাদে এতিয়া দখল কৰিছে সংবাদ মাধ্যমৰ শিৰোনাম। শুকুৰবাৰে অসমৰ ইতিহাসত প্ৰথম বাৰৰ বাবে চৰকাৰৰ বিৰুদ্ধে অৰ্দ্ধ উলংগ প্ৰতিবাদ সাব্যস্ত কৰিলে একাধিক মহিলাই। শিলসাঁকো উচ্ছেদৰ বিৰুদ্ধে কৰা এই প্ৰতিবাদৰ পিছতে এতিয়া সৃষ্টি হৈছে তীব্ৰ প্ৰতিক্ৰিয়াৰ সৃষ্টি হৈছে। খিলঞ্জীয়াৰ সুৰক্ষাৰ শ্লোগান গাই ক্ষমতা দখল কৰা বিজেপি চৰকাৰে আজি খিলঞ্জীয়াকে উলংগ হ’বলৈ বাধ্য কৰোৱা বুলিও অভিযোগ উঠিছে।
অসমত প্ৰতিবাদ নতুন বিষয় নহয়। চৰকাৰৰ বিভিন্ন নীতিৰ বিৰোধিতা কৰি প্ৰতিবাদ সাব্যস্ত কৰি আহিছে অসমৰ জনতাই। এই প্ৰতিবাদৰো প্ৰকাৰ ভিন্ন। কেতিয়াবা যদি মহিলাই মুণ্ডন কৰি প্ৰতিবাদ সাব্যস্ত কৰিছে, প্ৰণৱ বড়োৰ দৰে যুৱকে আকৌ নিজৰ গাতে পেট্ৰ’ল ঢালি আত্মহত্যা কৰি চৰকাৰৰ বিৰুদ্ধে সাব্যস্ত কৰিছে প্ৰতিবাদ।
নাগৰিকত্ব সংশোধনী আইনৰ বিৰুদ্ধেও অসমৰ কেইবাগৰাকীও যুৱকে দিল্লীত অৰ্দ্ধ উলংগ হৈ প্ৰতিবাদ সাব্যস্ত কৰিছিল। কিন্তু অসমৰ কোনো খিলঞ্জীয়া মহিলাই চৰকাৰৰ বিৰুদ্ধে প্ৰতিবাদ কৰি নিজৰ গাৰ কাপোৰ খুলি দিয়া পৰিলক্ষিত হোৱা নাছিল। যাৰ বাবে শিলসাকোঁৰ এই নজিৰবিহীন প্ৰতিবাদ এতিয়া চৰ্চাৰ বিষয় হৈ পৰিছে।
কিয় শিলসাঁকোত চলিছে উচ্ছেদ?
প্ৰতিবছৰে কৃত্ৰিম বানত বুৰ যায় ব্যস্ত গুৱাহাটী মহানগৰী। ৰাজপথৰ ওপৰত জমা হোৱা বৰষুণ আৰু নলা-নৰ্দমাৰ পানীয়ে স্তব্ধ কৰি তোলে সদাব্যস্ত মহানগৰীখনৰ ব্যস্ত জীৱন যাত্ৰা। ক্ষমতালৈ অহা প্ৰতিখন চৰকাৰেই গুৱাহাটীক বান মুক্ত কৰাৰ প্ৰতিশ্ৰুতি দিয়ে যদিও সময়ত সকলো ফুটুকাৰ ফেন হৈ পৰে।
কিন্তু এইবাৰ মুখ্যমন্ত্ৰী হিমন্ত বিশ্ব শৰ্মা নেতৃত্বাধীন চৰকাৰে গুৱাহাটীক বান মুক্ত কৰিবই বুলি দৃঢ় প্ৰতিশ্ৰুতি দিছে। আৰু ইয়াৰ বাবে মহানগৰীৰ চৌপাশৰ জলাশয়সমূহ পুনৰুদ্ধাৰ কৰি চহৰৰ কৃত্ৰিম বান ৰোধ কৰাৰ বাবে পৰিকল্পনাও হাতত লৈছে। মুখ্যমন্ত্ৰী হিমন্ত বিশ্ব শৰ্মাই কয় যে গুৱাহাটীৰ আশে পাশে থকা জলাশয়সমূহ পুনৰুদ্ধাৰ কৰিলেহে মহানগৰীৰ কৃত্ৰিম বান সমস্যাৰ সমাধান সম্ভৱ হ’ব। আৰু ইয়াৰ বাবে মুখ্যমন্ত্ৰীয়ে গুৱাহাটী পৌৰ উন্নয়ন প্ৰাধিকৰণক জলাশয়সমূহ বেদখলমুক্ত কৰাৰ বাবে নিৰ্দেশ প্ৰদান কৰে।
উল্লেখ্য যে, গুৱাহাটীৰ শিলসাঁকো বিলক ২০০৮ চনত তদানীন্তন তৰুণ গগৈৰ চৰকাৰে সংৰক্ষিত জলভাগ হিচাপে ঘোষণা কৰিছিল। একে সময়তে শিলসাঁকো বিলৰ কাষৰীয়া অঞ্চলত যাতে কোনো ধৰণৰ নিৰ্মাণ বা বসতি স্থাপন কৰিব নোৱাৰে তাৰ বাবেও অসম চৰকাৰে এক বিধেয়ক গৃহীত কৰিছিল।
শিলসাঁকোৰ কাষত বাস কৰা মুঠ পৰিয়ালৰ সংখ্যা স্পষ্ট নহয় যদিও সংবাদ মাধ্যমৰ বাতৰি অনুসৰি তাত ৫০০ৰো অধিক পৰিয়ালে বাস কৰি আহিছে। ইয়াৰে অধিকাংশ পৰিয়ালৰ ওচৰত ভূমিৰ বৈধ নথি-পত্ৰ থকাৰ লগতে তেওঁলোকে কৰ আৰু বিদ্যুৎ বিল পৰ্যন্ত আদায় দি আহিছে।
চলিত বৰ্ষৰ ২২ ফেব্ৰুৱাৰীত শিলসাঁকোৰ ১৮০০ বিঘাৰো অধিক মাটি বেদখলমুক্ত কৰিবলৈ অসম চৰকাৰে ব্যাপক উচ্ছেদ অভিযান আৰম্ভ কৰে। গুৱাহাটী মহানগৰ উন্নয়ন প্ৰাধিকৰণে প্ৰায় ১২০০ আৰক্ষী জোৱান আৰু ৪০ খন এক্সকেভেটৰ, বুলডজাৰ আৰু পৰিবহণকাৰীৰ সহযোগত চলোৱা এই অভিযানত দশক দশক ধৰি অঞ্চলটোত বসবাস কৰা প্ৰায় ২৫০ টা পৰিয়ালৰ সপোনৰ ঘৰখন ভাঙি পেলোৱা হয়। ইয়াৰ পিছত ছেপ্টেম্বৰৰ পহিলা দিনটোতে পুনৰ শিলসাঁকোত উচ্ছেদৰ বাবে অঞ্চলসমূহৰ সীমা নিৰ্ধাৰণ কৰিবলৈ প্ৰায় ৭০০ আৰক্ষী জোৱানসহ উপস্থিত হয় গুৱাহাটী পৌৰ উন্নয়ন প্ৰাধিকৰণৰ দল।
উচ্ছেদিতৰ বাবে চৰকাৰৰ পদক্ষেপ
শিলসাঁকোৰ উচ্ছেদিত পৰিয়ালসমূহক উপযুক্ত ক্ষতিপূৰণ প্ৰদান কৰা হ’ব বুলি প্ৰতিশ্ৰুতি দিছে মুখ্যমন্ত্ৰী হিমন্ত বিশ্ব শৰ্মাই। উচ্ছেদিত পৰিয়ালৰ বাবে গুৱাহাটীত একোটাকৈ ফ্লেট নিৰ্মাণৰ ব্যৱস্থাও কৰা হ’ব বুলি সংবাদ মাধ্যমৰ সন্মুখত মন্তব্য কৰে মুখ্যমন্ত্ৰীয়ে। ইয়াৰোপৰি উচ্ছেদ কৰা কেঁচা আৰু পকী ঘৰৰ বাবে পৃথক পৃথক ক্ষতিপূৰণ আদায়ৰ বাবে উপায়ুক্তক নিৰ্দেশ দিয়া বুলিও তেওঁ সংবাদ মাধ্যমক ব্যক্ত কৰে।
জিএমডিএৰ অধ্যক্ষ নাৰায়ণ ডেকাই শিলসাঁকোৰ বাসিন্দাসকলক আশ্বাস দি কয় যে স্থানচ্যুত হোৱা লোকসকলক উপযুক্ত ক্ষতিপূৰণ আৰু পুনৰ সংস্থাপন দিয়া হ’ব। তেওঁ কয় যে প্ৰতিটো আৰ চি চিৰ ঘৰৰ বিপৰীতে পৰিয়ালে ১০ লাখ টকা পাব আনহাতে অসম টাইপৰ ঘৰৰ বাবে ৫ লাখ টকা পাব। লগতে তেওঁ কয় যে চৰকাৰে হাউছিং কমপ্লেক্স নিৰ্মাণ কৰিব য’ত উচ্ছেদিত লোকসকলে ৰাজসাহায্যযুক্ত হাৰত ঘৰ ক্ৰয় কৰিব পাৰিব।
সঁচাকৈয়ে ক্ষতিপূৰণ লাভ কৰে নে উচ্ছেদিতই?
২০২১ চনত হিমন্ত বিশ্ব শৰ্মাই মুখ্যমন্ত্ৰীৰূপে দায়িত্ব গ্ৰহণৰ পিছৰ পৰা সমগ্ৰ ৰাজ্যত প্ৰায় ৯০০ হেক্টৰ ভূমিত উচ্ছেদ অভিযান চলাইছে প্ৰশাসনে। এই উচ্ছেদৰ ফলত প্ৰায় ১১০০ পৰিয়ালৰ বাসগৃহ ভাঙি পেলোৱা হয়। ২০২১ৰ ছেপ্টেম্বৰ মাহত দৰং জিলাৰ ধলপুৰ গাঁৱত চৰকাৰে ২০০ হেক্টৰ বনাঞ্চল বে-দখলমুক্ত কৰিছিল। এই উচ্ছেদ অভিযানত ২০১টাতকৈও অধিক পৰিয়াল গৃহহীন হৈ পৰে। উচ্ছেদিত অধিকাংশই আছিল বাংলাভাষী মুছলমান।
একেটা বছৰৰে অক্টোবৰত চৰকাৰে বন্যপ্ৰাণীৰ বাসস্থান বেদখল কৰা বুলি দাবী কৰি কাজিৰঙা ৰাষ্ট্ৰীয় উদ্যানৰ ওচৰৰ তিনিখন গাঁৱৰ পৰা ৮০০ৰো অধিক পৰিয়ালক উচ্ছেদ কৰে। ২০২৩ চনৰ জানুৱাৰী মাহত চৰকাৰে লখিমপুৰ জিলাত আৰু ৫০০ হেক্টৰ বনাঞ্চল মুকলি কৰি প্ৰায় ১০০ টা পৰিয়ালক উচ্ছেদ কৰে।
চৰকাৰে উচ্ছেদ কৰা পৰিয়ালৰ সমূহৰ ভিতৰত কেৱল বাংলাভাষী মুছলমানেই নাই, আছে ভূমিপুত্ৰৰূপে পৰিচিত বড়ো, কছাৰী, ৰাভা আৰু অসমৰ অন্য জনজাতীয় পৰিয়ালো। উচ্ছেদৰ পিছত চৰকাৰে উচ্ছেদিতক পুনৰ সংস্থাপনৰ প্ৰতিশ্ৰুতি দিয়ে যদিও এই প্ৰতিশ্ৰুতি কাৰ্যকৰী হোৱাৰ গতি অতি লেহেমীয়া পৰিলক্ষিত হয়। যিদৰে ধলপুৰৰ উচ্ছেদিত বহু পৰিয়ালে আজিও গৃহহীন জীৱন যাপন কৰিবলগীয়া হৈছে বুলি অভিযোগ উঠিছে।
বহু উচ্ছেদিত পৰিয়ালে উচ্ছেদৰ পিছত পুনৰ নিজৰ জীৱন বিপদাপন্ন কৰি আগলৈ স্থানলৈ উভতি তাতেই থাকিবলৈ আৰম্ভ কৰাও পৰিলক্ষিত হয়। চৰকাৰে উচ্ছেদিতক সংস্থাপনৰ প্ৰতিশ্ৰুতি দিয়ে ঠিকেই, কিন্তু ইয়াৰ গতি অতি লেহেমীয়া হোৱা পৰিলক্ষিত হয়। যাৰ বাবে উচ্ছেদক লৈ এক আংশকা সদায় ব্যক্ত কৰি আহিছে বিৰোধী আৰু উচ্ছেদ বিৰোধী দল-সংগঠনসমূহেও।
উচ্ছেদক লৈ প্ৰতিবাদ
চৰকাৰে যেতিয়াই যেতিয়াই উচ্ছেদ অভিযান চলাই, তেতিয়াই উচ্ছেদস্থলীত এক উত্তপ্ত পৰিস্থিতিৰ সৃষ্টি হয়। বছৰ বছৰ ধৰি সেই স্থানত বাস কৰি অহা পৰিয়ালসকলে এই উচ্ছেদৰ বিৰোধিতা কৰি বহুবাৰ আৰক্ষী-প্ৰশাসনৰ লোকৰ সৈতেও সংঘৰ্ষত লিপ্ত হয়। ২০২১ৰ ছেপ্টেম্বৰ মাহত দৰং জিলাৰ ধলপুৰত চলোৱা উচ্ছেদ অভিযানৰ সময়ত আৰক্ষীৰে সংঘৰ্ষত দুজন লোকৰ মৃত্যু ঘটাৰ লগতে আন কেইবাজনো লোক আহত হৈছিল।
মূলতঃ ৰাভা আৰু বড়ো জনজাতিৰ লোক বাস কৰা শিলসাঁকোত ফেব্ৰুৱাৰী মাহত প্ৰশাসনে চলোৱা উচ্ছেদ অভিযানৰ সময়তো এক উত্তপ্ত পৰিস্থিতিৰ সৃষ্টি হৈছিল। সেই সময়ত বহু নিৱাসীয়ে নিজৰ ঘৰখন ভাঙি পেলোৱাৰ বিৰোধিতাৰে প্ৰতিবাদ সাব্যস্ত কৰিছিল। কিন্তু পহিলা ছেপ্টেম্বৰত নিৱাসী সকলৰ ওপৰত উচ্ছেদ চলাবলৈ বৃহৎ সংখ্যক আৰক্ষীসহ জিএমডিএৰ দল উপস্থিত হোৱাৰ পিছতে প্ৰতিবাদে ভয়াবহ ৰূপ লয়।
শিলসাঁকোত দশক ধৰি বাস কৰি অহা বহু লোকে চৰকাৰ আৰু প্ৰশাসনে চলোৱা প্ৰতিবাদৰ বিৰোধিতা কৰি উচ্ছেদ অভিযানত বাধা প্ৰদান কৰে। একাংশ মহিলাই গাৰ বস্ত্ৰ খুলিও উচ্ছেদৰ বিৰুদ্ধে প্ৰতিবাদ সাব্যস্ত কৰে। যি প্ৰতিবাদে এতিয়া অসমৰ লগতে সমগ্ৰ দেশজুৰি চৰ্চা লাভ কৰিবলৈ সক্ষম হৈছে।
শিলসাঁকোত ঘৰখন সাজি বাস কৰি অহা এজন ব্যক্তিয়ে উচ্ছেদৰ বিৰোধিতা কৰি কয়, ''মোৰ ঘৰখন ভাঙি পেলোৱাতকৈ মোক গুলীয়াই মাৰক। নহ’লে ঘৰ ভঙাৰ আগতে নিজেই গাত পেট্ৰ’ল ঢালি জ্বলি মৰিম।’’ সামাজিক মাধ্যমত ভাইৰেল হৈ পৰিছে ঘৰ হেৰুওৱাৰ ভয়ত ত্ৰস্তমান এই লোকজনৰ ভিডিঅ’।
শিলসাঁকোৰ এই উচ্ছেদৰ বিৰোধিতা কৰি প্ৰতিবাদ সাব্যস্ত কৰে কৃষক মুক্তি সংগ্ৰাম সমিতিৰ লগতে আন কেইবাটাও দল-সংগঠনেও। খিলঞ্জীয়া ভূমিপুত্ৰক উচ্ছেদ কৰিব বিচৰা চৰকাৰৰ বিৰুদ্ধে সাব্যস্ত কৰা প্ৰতিবাদৰ পিছতে আৰক্ষীয়ে কৃষক মুক্তিৰ সম্পাদক বিদ্যুৎ শইকীয়াসহ কেইবাজনো প্ৰতিবাদকাৰীক আটক কৰে।
শিলসাঁকোৰ অৰ্ধ উলংগ প্ৰতিবাদ, মুখ্যমন্ত্ৰীৰ মিথ্যাচাৰ!
২০০৪ৰ ১৫ জুলাইৰ এক প্ৰতিবাদে জোকাৰি গৈছিল সমগ্ৰ দেশ। বিশ্বৰ বুকুতো ভাৰতক লজ্জানত কৰিছিল সেই প্ৰতিবাদে। অসম ৰাইফলছে এগৰাকী যুৱতীক বলাৎকাৰ কৰি হত্যা কৰাৰ অভিযোগ তুলি কেইবাগৰাকীও মণিপুৰী মহিলাই অসম ৰাইফলছৰ মুখ্য কাৰ্যালয়ৰ সন্মুখত গাৰ সকলো বস্ত্ৰ খুলি প্ৰতিবাদ সাব্যস্ত কৰিছিল। হাতত তেওঁলোকৰ আছিল প্লে’কাৰ্ড, য’ত লিখা আছিল- 'ভাৰতীয় সেনাই আমাক ধৰ্ষণ কৰিছে।’
তদ্ৰুপ এক প্ৰতিবাদেই যেন এইবাৰ জোকাৰি গ’ল অসম। খিলঞ্জীয়াৰ সুৰক্ষাৰ কথা কৈ শাসনৰ গাদী দখল কৰা চৰকাৰৰ নিষ্ক্ৰিয়তাক উদঙাই এই প্ৰতিবাদে এতিয়া চৰ্চা লাভ কৰিছে ৰাজ্যৰ লগতে ৰাষ্ট্ৰীয় সংবাদ মাধ্যমতো। এই প্ৰতিবাদৰ পিছত সামাজিক মাধ্যমতো তীব্ৰ সমালোচনাৰ সন্মুখীন হ’বলগীয়া হৈছে চৰকাৰ-প্ৰশাসন।
শিলসাঁকো বিল দখলমুক্ত কৰি মহানগৰীৰ বান সমস্যাৰ সমাধান কৰিব বিচৰা চৰকাৰে অঞ্চলটোত উচ্ছেদ অভিযান চলোৱাৰ পিছতে একাংশ স্থানীয় মহিলাই গাৰ আধা কাপোৰ খুলি আৰক্ষী-প্ৰশাসনৰ সন্মুখত প্ৰতিবাদ সাব্যস্ত কৰে। এই মহিলাসকলে অভিযোগ উত্থাপন কৰে যে তেওঁলোকক কোনো আগতীয়া জাননী প্ৰদান নকৰাকৈয়ে তেওঁলোকৰ ঘৰখন ভাঙিব বিচৰা হৈছে।
শিলসাঁকোত বছৰ বছৰ ধৰি বাস কৰি অহা এইসকল মহিলাৰ অৰ্ধ উলংগ প্ৰতিবাদে সমগ্ৰ ৰাজ্যজুৰি প্ৰতিক্ৰিয়া সৃষ্টি কৰাৰ পিছতে এই প্ৰতিবাদৰ আঁৰত চক্ৰান্তমূলক দল-সংগঠন জড়িত থকা বুলি মন্তব্য কৰে মুখ্যমন্ত্ৰী হিমন্ত বিশ্ব শৰ্মাই। সংবাদ মাধ্যমৰ সন্মুখীন হোৱাৰ সময়ত তেওঁ কয়, ''শিলসাঁকোৰ উচ্ছেদক লৈ তাৰ নিৱাসী সকলৰ সৈতে তিনিদিন ধৰি কথা পতা হৈছে। তেওঁলোকক ক্ষতিপূৰণ প্ৰদানৰো নিৰ্দেশ দিয়া হৈছে। গুৱাহাটীত তেওঁলোকৰ বাবে ফ্লেট নিৰ্মাণৰো ব্যৱস্থা কৰা হৈছে। কিন্তু এই প্ৰতিবাদ কৰা সকল এটা বিশেষ দলৰ লোক, যাৰ কামেই হৈছে প্ৰতিবাদ কৰা। আমি তেনে লোকৰ বিৰুদ্ধে কঠোৰ ব্যৱস্থা ল’ম।’’
অসমীয়া জাতিক লজ্জিত কৰা এই প্ৰতিবাদক মুখ্যমন্ত্ৰীয়ে এটা 'প্ৰতিবাদকাৰী’ দলৰ ষড়যন্ত্ৰ বুলি অভিহিত কৰাক লৈও এতিয়া সৃষ্টি হৈছে প্ৰতিক্ৰিয়াৰ। অন্যহাতে মুখ্যমন্ত্ৰীয়ে নিৱাসীসকলৰ সৈতে তিনি-চাৰিদিন ধৰি কথা পতা বুলি কৰা মন্তব্য সম্পূৰ্ণ মিছা বুলি দাবী কৰিছে একাংশ স্থানীয় বাসিন্দাই।
শিলসাঁকোৰ উলংগ প্ৰতিবাদক লৈ বিৰোধীৰ প্ৰতিক্ৰিয়া
সমগ্ৰ ৰাজ্যৰ লগতে দেশ জোকাৰি যোৱা শিলসাঁকোৰ অৰ্ধ উলংগ প্ৰতিবাদৰ পিছতে প্ৰতিক্ৰিয়া ব্যক্ত কৰিছে বিভিন্নজনে। বিশেষকৈ বিৰোধীয়ে এই প্ৰতিবাদক লৈ চৰকাৰক কঠোৰ ভাষাৰে সমালোচনা কৰা পৰিলক্ষিত হৈছে। অসম জাতীয় পৰিষদৰ সভাপতি লুৰিণজ্যোতি গগৈয়ে শিলসাঁকোৰ উচ্ছেদক সমালোচনা কৰি কয়, ''খিলঞ্জীয়াৰ কথা কোৱা চৰকাৰে আজি খিলঞ্জীয়াকে কাপোৰ খুলিবলৈ বাধ্য কৰিলে। অসমৰ নাৰীক বিজেপি চৰকাৰে কৰা চৰম অপমানৰ প্ৰমাণ শিলসাঁকোৰ প্ৰতিবাদ। বিজেপিৰ শাসনত খোদ তেওঁলোকৰ কাৰ্যালয়তে নাৰী সুৰক্ষিত নহয়, সমাজত আজি নাৰী সুৰক্ষিত কেনেকৈ হ’ব?নাৰীৰ বেদনা মুখ্যমন্ত্ৰীৰ পৰিয়ালে কেতিয়াও উপলব্ধি কৰিব নোৱাৰে। যি সময়ত ৮ লাখ মানুহে ভূমিহীন হৈ থাকিবলগীয়া হৈছে, সেই সময়ত এইখন চৰকাৰে লাখ লাখ বিঘা অসমৰ বাবে বিহস্বৰূপ পাম খেতিৰ বাবে এৰি দিছে।’’
শিৱসাগৰ সমষ্টিৰ বিধায়ক অখিল গগৈয়ে কয়, ''এই ঘটনা অসমৰ ইতিহাসৰ এক অভূতপূৰ্ব ঘটনা। অসমৰ থলুৱা খিলঞ্জীয়া নাৰীয়ে যদি নিজৰ ভূমিৰক্ষাৰ কাৰণে এনেধৰণে প্ৰতিবাদ সাব্যস্ত কৰিবলগীয়া হৈছে, তেন্তে এয়া জাতিটোৰ বাবে দুৰ্ভাগ্যজনক। বিজেপিয়ে অসমৰ প্ৰতিজন খিলঞ্জীয়াৰ ওপৰত আগ্ৰাসন নমাই আনিছে।’’
মন্ত্ৰী পীযুষ হাজৰিকাৰ এক মন্তব্য সন্দৰ্ভতো প্ৰতিক্ৰিয়া ব্যক্ত কৰি তেওঁ কয়, ''পীযুষ হাজৰিকাই কৈছিল যে বিৰোধী দলপতিৰ কাপোৰ খুলি দিয়া হ’ব। এতিয়া তেওঁলোকে অসমৰ নাৰীৰহে কাপোৰ খুলি পেলাইছে। আজি শিলসাঁকোত অসমীয়া নাৰীৰ মৰ্যাদা হানি কৰা হৈছে। আমি ইয়াৰ নিন্দা কৰিছো।’’
কংগ্ৰেছৰ ৰাজ্যিক সভাপতি ভূপেন বৰাই কয়, ''এয়া অসমীয়া ইতিহাসৰ বাবে এক লজ্জাজনক ঘটনা। বিজেপি চৰকাৰে কেনে নাৰী সুৰক্ষাৰ কথা কয়, এয়া তাৰেই প্ৰমাণ। বিজেপিয়ে নিজৰ দলৰে মহিলাক সুৰক্ষা প্ৰদান কৰিব নোৱাৰে, তেনে পৰিপ্ৰেক্ষিতত এইখন চৰকাৰৰ হাতত অসমীয়া নাৰী কিমান সুৰক্ষিত সেয়া সকলোৱে চিন্তা কৰাৰ প্ৰয়োজন।’’