নতুন দিল্লীঃ অৱশেষত ভাৰতলৈ প্ৰত্যৰ্পণ ঘটিল ২৬/১১ ৰ মুম্বাই আক্ৰমণৰ অন্যতম মাষ্টাৰমাইণ্ড তাহাউৰ হুছেইন ৰাণাৰ। আমেৰিকাৰ পৰা ভাৰতলৈ প্ৰত্যৰ্পণ কৰাৰ পিছত বৃহস্পতিবাৰে দিল্লীত অৱতৰণ কৰাৰ লগে লগে এনআইএয়ে গ্ৰেপ্তাৰ কৰে। সন্ত্ৰাসবাদ বিৰোধী আইনৰ অধীনত গ্ৰেপ্তাৰ হোৱাৰ পিছত তেওঁক পাটিয়ালা হাউছ ক’ৰ্টলৈ লৈ যোৱা হয়। এই হাই-প্ৰফাইল শুনানিৰ বাবে আদালত চৌহদত কটকটীয়া নিৰাপত্তাৰ ব্যৱস্থা কৰা হয়।
আদালতৰ আশেপাশে থকা অঞ্চলটোত কাকো প্ৰৱেশ কৰিবলৈ দিয়া নহয়, আনকি জৱাহৰলাল নেহৰু মেট্ৰ’ ষ্টেচনৰ ২ নং গেটটোও বন্ধ কৰি দিয়া হয়। দিল্লী মেট্ৰ’ই জনোৱা মতে, এন আই এ বিল্ডিঙৰ ওচৰত থকাৰ বাবে এই গেটখন বন্ধ কৰি দিয়া হৈছে। আদালতত ৰাণাৰ হৈ অধিবক্তা পীযুষ সচদেৱ আৰু এনআইএৰ হৈ দয়ান কৃষ্ণন উপস্থিত থাকে। এই প্ৰত্যৰ্পণ প্ৰক্ৰিয়াক ভাৰতৰ বাবে এক বৃহৎ কূটনৈতিক বিজয় হিচাপে দেখা গৈছে। ড’নাল্ড ট্ৰাম্প পুনৰ আমেৰিকাৰ ৰাষ্ট্ৰপতি হোৱাৰ পিছত আমেৰিকাৰ উচ্চতম ন্যায়ালয়ে ৰাণাক ভাৰতলৈ প্ৰত্যৰ্পণ কৰাৰ নিৰ্দেশ দিছিল। ভাৰত-আমেৰিকা প্ৰত্যৰ্পণ চুক্তিৰ অধীনত এই প্ৰক্ৰিয়া সম্পূৰ্ণ হৈছে।