কণ্টেইনমেন্ট জ’নত টোলগেটৰ নিৰ্মাণ কাৰ্য, শংকিত কামৰূপৰ মদনপুৰবাসী

চাংসাৰিঃ কামৰূপ জিলাৰ বাইহাটা চাৰিআলিৰ নিকটৱৰ্তী মদনপুৰত দেৱৰাজ আচাৰ্য নামৰ এজন লোকৰ দেহত কৰ’না পজিটিভ পোৱাৰ পিছৰে পৰা সমগ্ৰ অঞ্চলটোৰ লগতে জিলাখনত আতংকময় পৰিৱেশ বিৰাজ কৰিছে। ইয়াৰ মাজতে মদনপুৰত তীব্ৰ গতিত চলিছে টোলগেটৰ নিৰ্মাণ কাৰ্য৷

প্ৰাপ্ত বাতৰি অনুসৰি, কৰ্মসূত্ৰে চাংসাৰি আৰক্ষী থানাৰ অন্তৰ্গত মদনপুৰত ভাড়া ঘৰত বসবাস কৰা দেৱৰাজ আচাৰ্য নামৰ ক’ভিড-১৯ পজিটিভ লোকজন যোৱা ৬ মে’ত পশ্চিম বংগৰ শিলিগুৰিৰ পৰা গুৱাহাটীলৈ আহিছিল। তাৰপিছত তেওঁক কোৱাৰেন্টাইন আৰু চিকিৎসাৰ বাবে লৈ যোৱা হৈছিল সৰুসজাইলৈ৷