কোকৰাঝাৰঃ ২০০৩ চনৰ ১০ ফেব্ৰুৱাৰীত ঐতিহাসিক বিটিচি চুক্তি সম্পন্ন হোৱাৰ পিছত বিটিএডি এলেকাৰ জীৱন ধাৰণৰ মান, অাৰ্থ সামাজিক উন্নয়ন অস্বীকাৰ কৰিব নোৱাৰি যদিও একমাত্ৰ বিটিচি গঠন হোৱাৰ বাবেই ১৮৮ টা পৰিয়াললৈ ঘোৰ অমানিশা নামি অহাৰ বাতৰিয়ে বিটিএডিৰ অান এক অমনোযোগিতাৰ দিশ উদঙাই দিছে। বিটিএডি প্ৰশাসনৰ অমনোযোগিতা অাৰু ৰাজ্য চৰকাৰৰ চূড়ান্ত অৱহেলাৰ বাবেই সম্প্ৰতি অন্ধকাৰৰ অটল গহ্বৰত নিমজ্জিত হোৱা ১৮৮ গৰাকী কেজুৱেল কৰ্মীয়ে অাজি ন্যায় প্ৰদানৰ দাবীত কোকৰাঝাৰত প্ৰতিবাদী ধৰ্ণা কাৰ্যসূচীৰে চহৰৰ পৰিৱেশ উত্তাল কৰি তোলে।
উল্লেখ্য যে ১৯৯২-৯৩ চনত ৰাজ্যত কেজুৱেল কৰ্মী অৰ্থাৎ পিয়ন ,চকীদাৰ , কৰ সংগ্ৰাহক , অালি মহৰী হিচাপে পঞ্চায়ত বিভাগত ২০০০ গৰাকী লোকে নিযুক্তি লাভ কৰিছিল। ২০০৫ চনত ৰাজ্য চৰকাৰে ৩১০০০ কেজুৱেল, মাষ্টাৰৰোল কৰ্মচাৰীক নিয়মীয়াকৰণ কৰিছিল অাৰু ২০১২ চনত চৰকাৰে ২০০০ গৰাকী পঞ্চায়তৰ কেজুৱেল কৰ্মচাৰীৰ ভিতৰত ১৮১২ গৰাকী কৰ্মচাৰীক বিটিএডিৰ বাহিৰত ফিক্সড পে’ত নিযুক্তি দিয়ে। অৰ্থাৎ বিটিএডিত থকা ১৮৮ গৰাকী কেজুৱেল কৰ্মচাৰী নিযুক্তি লাভৰ পৰা বঞ্চিত হয়।
