108
হেলিকপ্টাৰ দুৰ্ঘটনাত নিহত হৈছে ইৰাণৰ ৰাষ্ট্ৰপতি ইব্ৰাহিম ৰইছি। ৰাষ্ট্ৰপতি ৰইছিৰ লগতে হেলিকপ্টাৰখনত থকা দেশখনৰ বিদেশ মন্ত্ৰী হোছেইন আমিৰ আব্দুল্লাহিয়াৰো মৃত্যু হৈছে। ৰাষ্ট্ৰপতি ৰইছিৰ হেলিকপ্টাৰখন দেওবাৰে দুৰ্ঘটনাত পতিত হৈছিল যদিও সোমবাৰে ধ্বংসাৱশেষ উদ্ধাৰ হোৱাৰ পিছত নিহত হোৱাতো নিশ্চিত কৰা হয়।
এই দুৰ্ঘটনাত মুঠ ৯ গৰাকী লোকে প্ৰাণ হেৰুৱাইছে। ইৰাণৰ কেবিনেটে এক আনুষ্ঠানিক বিবৃতিযোগে ৰাষ্ট্ৰপতিৰ মৃত্যুত গভীৰ শোক প্ৰকাশ কৰিছে আৰু দেশখনৰ শাসন ব্যৱস্থা পূৰ্বৰ দৰেই অব্যাহত থাকিব বুলি জনাইছে। সংবাদ সংস্থা এপিত প্ৰকাশিত বাতৰি মতে হেলিকপ্টাৰখনত দেহৰক্ষী, পাইলট, সহঃপাইলটৰ লগতে সুৰক্ষা প্ৰধানৰ দৰে শীৰ্ষ বিষয়াও উপস্থিত আছিল। ৰয়টাৰ্ছে এগৰাকী ইৰাণৰ চৰকাৰী বিষয়াৰ উধৃতিৰে প্ৰকাশ কৰিছে যে দুৰ্ঘটনাটোত হেলিকপ্টাৰখন সম্পূৰ্ণৰূপে ভস্মীভূত হৈ পৰিছে।
