নগাঁওঃ নগাঁও জিলাৰ অন্যতম অগ্ৰণী শিক্ষানুষ্ঠান জেঙনী নুৰুল নাহাৰ আদৰ্শ উচ্চতৰ মাধ্যমিক বিদ্যালয়ত এক সম্বৰ্ধনা অনুষ্ঠান অনুষ্ঠিত কৰা হয় ৷ বিদ্যালয়খনৰ পৰা বিগত হাইস্কুল শিক্ষান্ত আৰু উচ্চতৰ মাধ্যমিক চূড়ান্ত বৰ্ষৰ পৰীক্ষাত সফলতাৰে উত্তীৰ্ণ হোৱা কৃৰ্তী ছাত্ৰ-ছাত্ৰীসকলক উৎসাহ জনোৱাৰ উদ্দেশ্যে এই অনুষ্ঠানটি অনুষ্ঠিত কৰা হয়৷
এই মৰ্মে, বিদ্যালয়ৰ প্ৰেক্ষাগৃহত বিদ্যালয়ৰ পৰিচালনা আৰু উন্নয়ণ সমিতিৰ সভাপতি ডাঃ আনোৱাৰ হুছেইন চৌধুৰীৰ সভাপতিত্বত অনুষ্ঠিত হোৱা গাম্ভীৰ্যপূৰ্ণ সভাখনিত সদ্য ঘোষিত অসম লোক সেৱা আয়োগৰ পৰীক্ষাত স্থান লাভ কৰা মদিৰা বেগম, আমেৰিকাত ছফটৱেৰ অভিযন্ত্ৰা হিচাপে কৰ্মৰত মজিবুৰ ৰহমান, গুৱাহাটী চিকিৎসা মহাবিদ্যালয়ৰ সহযোগী অধ্যাপক ডাঃ মীৰ আলম ছিদ্দিকী, ডাঃ নাছৰিন চুলতানা, ডাঃ প্ৰাসাদ উল্লাহ, মীন সম্প্ৰসাৰণ বিষয়া আবদিদাৰ ছিদ্দিকী, বিদ্যালয়খনৰ অধ্যক্ষ মুকুট কলিতাকে প্ৰমুখ্য কৰি বহুকেইজন বিশিষ্ট ব্যক্তি উপস্থিত থাকি ছাত্ৰ-ছাত্ৰীৰ উপযোগী সাৰুৱা ভাষণ প্ৰদান কৰে৷
