নগাঁওঃ “লাখ লাখ টকাত এ পি এচ চিৰ চাকৰি বেচা,এনৰেগাৰ টকা-লুটি খোৱা,পোন্ধৰ বছৰীয়া অপশাসন,দুৰ্নীতি ভ্ৰষ্টাচাৰৰে ৰাজ্যখনক বিধ্বঃস্ত কৰি পেলোৱা কংগ্ৰেছক কোনো কাৰণতে পুনৰবাৰ পঞ্চায়ত দখল কৰিবলৈ সুযোগ নিদিব৷ কংগ্ৰেছে সুত-কম্বল-আঠুঁৱাৰ ৰাজনীতিৰে ৰাইজক বছৰ বছৰ ধৰি ঠগাই আহিছে৷” আজি বটদ্ৰৱা সমষ্টিৰ কাকমাৰী,মাজ জাজৰি আৰু নিজ হাতীচোং পঞ্চায়তত কেইবাখনো নিৰ্বাচনী সভাত অংশলৈ স্থানীয় বিধায়িকা আঙুৰলতা ডেকাই এনেদৰে কংগ্ৰেছ দলক ক্ষুৰধাৰ সমালোচনা কৰে৷  

নিজ হাতীচোঙৰ কলবাৰীত অনুষ্ঠিত নিৰ্বাচনী সভাখনত অংশলৈ বিধায়িকা গৰাকীয়ে কয় যে ৰাইজক এতিয়া উন্নয়ন লাগে৷ বিজেপি চৰকাৰ অহাৰ পাছত  বটদ্ৰৱা সমষ্টিত উন্নয়নৰ বতাহ বলিছে৷ সেয়ে ৰাইজক আগন্তুক পঞ্চায়ত নিৰ্বাচনত সমষ্টিটোৰ সামগ্ৰিক উন্নয়নৰ স্বাৰ্থতে বিজেপি দলৰ প্ৰক্ষেপিত প্ৰাৰ্থী সকলক বিপুল ভোটত জয়যুক্ত কৰিবলৈ বিধায়িকা গৰাকীয়ে আহ্বান জনায়৷

সভাখনত  বিজেপি দলৰ ১০নং হাতীচোং জিলা পৰিষদৰ প্ৰাৰ্থী সীমাৰেখা ভৰালী,নিজ হাতীচোং গাঁও পঞ্চায়তৰ সভাপতি আৰু আঞ্চলিক সদস্য পদৰ প্ৰাৰ্থী ক্ৰমে অভিজিৎ মেধি আৰু পূৰ্ণিমা বৰদলৈ, বাৰ্ড সদস্যৰ প্ৰাৰ্থী ভাগ্যলক্ষী ৰাজা,বাবুল শইকীয়াৰ লগতে বহু সংখ্যক দলীয নেতা-কৰ্মী আৰু ৰাইজ উপস্থিত আছিল ৷ 

ইফালে অসম গণ পৰিষদ সম্পৰ্কত নিৰ্বাচনী সভাখনত লক্ষ্যনীয় মন্তব্য প্ৰকাশ কৰি কয় যে অসম গণ পৰিষদৰ বিৰুদ্ধে বেয়াকৈ কবলৈ তেঁওৰ সত নাযায়৷ কাৰন বটদ্ৰৱা সমষ্টিত মিত্ৰজোঁটৰ পৰা তেওঁক বিজয়ী কৰোৱাত অগপ ভোটাৰ সকলৰো বহু অৰিহণা আছে ৷ উল্লেখযোগ্য যে হাতীচোং জিলা পৰিষদ সমষ্টিৰ বাবে বিজেপি ৰ সীমাৰেখা ভৰালীৰ বিপৰীতে কংগ্ৰেছৰ কুমকুম মহন্ত ,অগপৰ অবন্তি দেৱী আৰু এ আই ইউ ডি এফৰ হৈ মুৰ্ছিদা বেগমে প্ৰাৰ্থিত্ব আগবঢ়াইছে। নিৰ্বাচনলৈ মাজত মাথো কেইটামান  দিন বাকী থকা সকলো কেইজন প্ৰাৰ্থীয়েই পূৰ্ণোদ্যমে ৰণক্ষেত্ৰত নামি পৰা দেখা গৈছে ৷