ৰাজ্যৰ ভ্ৰাম্যমাণ থিয়েটাৰত পুনৰ অপদস্ত অভিনেত্ৰী

গুৱাহাটীঃ ৰাজ্যৰ ভ্ৰাম্যমাণ থিয়েটাৰত পুনৰ অপদস্ত অভিনেত্ৰী। ২০১৯-২০ নাট্যবর্ষৰ বাবে আগশাৰীৰ ভ্ৰাম্যমাণ থিয়েটাৰৰ নাট্যগোষ্টী বৰদৈচিলা থিয়েটাৰত আনুষ্ঠানিক ভাৱে চুক্তিবদ্ধ হোৱা জনপ্ৰিয় অভিনেত্ৰী প্ৰাঞ্জনা দত্তক অনানুষ্ঠানিকভাৱে চুক্তি বাতিল কৰিছে বৰদৈচিলা থিয়েটাৰৰ প্ৰয়োজক নজৰুল ইছলামে।

এই সন্দৰ্ভত অভিনেত্ৰী প্ৰাঞ্জনা দত্তই আজি গুৱাহাটীৰ প্ৰেছ ক্লাবত এক সংবাদ মেল সম্বোধন কৰি কান্দোনত ভাগি পৰে। তেওঁ কয় যে আজি মই সংবাদ মেল সম্বোধন কৰিব লগা হোৱাটো মোৰ বাবে দুৰ্ভাগ্যজনক কথা। মোৰ সংবাদ মেল ভ্ৰাম্যমাণ থিয়েটাৰৰ বিৰুদ্ধে নহয়, ভ্ৰাম্যমাণ থিয়েটাৰৰ সপক্ষে মোৰ এই সংবাদ মেল। তেওঁ সমগ্ৰ বিষয়টো বৰ্ণনা দি কয় যে বিগত সাত বছৰৰ বিৰতিৰ পাছত যোৱা বর্ষৰপৰা ভ্ৰাম্যমাণ থিয়েটাৰত পুনৰ আত্মপ্ৰকাশ কৰিছিলোঁ।