নতুন দিল্লীঃ দিল্লী বিধানসভা নিৰ্বাচনৰ ভোটগণনাত বিজেপিতকৈ এই পৰ্যন্ত আগবাঢ়ি আছে শাসনাধিষ্ঠিত আম আদমী পাৰ্টী চমুকৈ আপ। প্ৰাৰম্ভিক পৰ্যায়ৰ ভোট গণনাত দেখা গৈছে যে দিল্লীক ভেটি হিচাপে লৈ গঠিত দল আপে ৫১ খন আসনত আৰু বিজেপিয়ে ১৯ খন আসনত অগ্ৰগতি লাভ কৰিছে।
ভোটগণনাৰ প্ৰথম দুঘণ্টাৰ ট্ৰেণ্ড অনুযায়ী এগজিট পোলসমূহে দাবী কৰা ধৰণে ৰাষ্ট্ৰীয় ৰাজধানী ক্ষেত্ৰখনত পুনৰ আপে চৰকাৰ গঠন কৰাৰ সম্ভাৱনা প্ৰায় স্পষ্ট হৈ পৰিছে। 'আমাৰ জয়ে প্ৰমাণ কৰিব যে প্ৰকৃত দেশপ্ৰেমক। প্ৰকৃত দেশপ্ৰেম হৈছে ৰাজনীতিত জড়িত হ’লে জনতাৰ হৈ কাম কৰিবই লাগিব। শিক্ষাত গুৰুত্ব দিব লাগিব, স্বাস্থ্যখণ্ড উন্নত কৰিব লাগিব।’-বিজেপিৰ দেশপ্ৰেমৰ সংজ্ঞাক প্ৰত্যাহ্বান জনাই এইদৰে কয় আপ নেতা তথা দিল্লীৰ উপ-মুখ্যমন্ত্ৰী মনীষ ছিছ’ডিয়াই।
আজিৰ ভোটগণনাত বিজেপিক পিছ পেলালেও ২০১৫ৰ তুলনাত এতিয়ালৈকে ১৯ খন আসনত পিছপৰি আছে আপ। কেজৰিৱাল চৰকাৰক প্ৰত্যাহ্বান জনাবলৈ সমগ্ৰ দিল্লীতে চলোৱা হাইভল্টেজ প্ৰচাৰৰ অন্তত প্ৰাৰম্ভিক পৰ্যায়ত ১৯ খনকৈ আসনত জয়ী হোৱাৰ সম্ভাৱনা দেখিছে বিজেপিয়ে। মূলতঃ শ্বাহিনবাগত চলি থকা 'কা’ বিৰোধী প্ৰতিবাদক আধাৰ হিচাপে লৈ প্ৰচাৰ অভিযান চলোৱা বিজেপি দলটোৰ বাবে এয়া উল্লেখনীয় সফলতা হিচাপে চিহ্নিত হৈছে।
ইয়াৰ বিপৰীতে শাসকীয় আপে শিক্ষা আৰু স্বাস্থ্যখণ্ডৰ লগে বিনামূলীয়া তথা কম মূল্যত পানী-বিজুলী যোগান ধৰাৰ দৰে কামবোৰক ভিত্তি হিচাপে লৈ মূল বিৰোধী বিজেপিক প্ৰতিহত কৰিবলৈ নামি পৰিছিল নিৰ্বাচনী যুঁজত। এই যুঁজত কেজৰিৱালক যিকোনো প্ৰকাৰে ধৰাশায়ী কৰিবলৈ বিজেপিয়ে প্ৰচাৰ অভিযানত নমাইছিল ৭০ জনকৈ কেন্দ্ৰীয় মন্ত্ৰী, ২৭০ জন সাংসদ আৰু বিজেপি শাসিত ভিন্ন ৰাজ্যৰ মুখ্যমন্ত্ৰীক।
অৱশেষত যোৱা শনিবাৰে ভোটগ্ৰহণৰ দিনা দিল্লীৰ ৬২.৫৯ শতাংশ ভোটাৰে সাব্যস্ত কৰে ভোটাধিকাৰ। তাৎপৰ্যপূৰ্ণ যে ২০১৫ৰ নিৰ্বাচনত ভোটদানৰ হাৰ আছিল ৬৭.৫ শতাংশ। আজিৰ ভোটগণনাত দেখা গৈছে যে কেজৰিৱাল চৰকাৰে জনতাৰ হকে কাম কৰা বুলি দাবী কৰি অহাৰ সময়তে ভোট শ্বেয়াৰৰ ক্ষেত্ৰত পূৰ্বৰ তুলনাত যথেষ্ট ভাল ফলাফল দেখুৱাবলৈ সমৰ্থ হৈছে বিজেপি। ভোটগণনাৰ প্ৰথম দুই ঘণ্টাৰ ক্ৰম অনুযায়ী আপে ৫১ শতাংশ ভোট লাভ কৰাৰ বিপৰীতে বিজেপিয়ে লাভ কৰিছে ৪১ শতাংশ ভোট। আনহাতে কংগ্ৰেছৰ ভোট শ্বেয়াৰ হৈছে মাত্ৰ ৪ শতাংশ।