গোলাঘাটঃ সমগ্ৰ ভাৰতবৰ্ষৰ নিচিনাকৈ আমাৰ অসমতো ক’ভিড-১৯ অতিমাৰীয়ে ভয়ঙ্কৰ ৰূপ ধাৰন কৰিছে৷ ৰাজ্যখনত এতিয়ালৈকে তিনিলাখ ছব্বিশ হাজাৰ নশ ঊনআশী গৰাকী লোক ক’ভিড-১৯ত আক্ৰান্ত হোৱাৰ তথ্য আহিছে৷ যোৱাকালিলৈকে পাঁছহাজাৰ তিনিশ সাতছল্লিছ গৰাকী নতুন ব্যাক্তি এই ৰোগত আক্ৰান্ত হোৱাৰ খৱৰ আছে আৰু এতিয়ালৈকে এই ৰোগত মৃত্যু হোৱা লোকৰ সংখ্যা দুইহাজাৰ এশ তেইছ গৰাকী৷
আনহাতে অসম চৰকাৰে বৰ্দ্ধিত ক'ভিড-১৯ ৰ প্ৰতি লক্ষ্য ৰাখি কেতবোক নিয়ম বান্ধি দিয়াৰ পাছতো ক'ভিড-১৯ ৰ সংহাৰী ৰূপৰ প্ৰকোপ কমি অহা নাই৷ দিনৰ ১২ বজাৰ পিচত সান্ধ্যআইন, বিদ্যালয়-কাৰ্য্যালয় বন্ধ, যান-বাহনত যুগ্ম-অযুগ্ম নম্বৰৰ পদ্ধতি ব্যৱহাৰ কৰিও ৰাজ্যখনত যোৱা কেইটা দিনত ক'ভিড-১৯ ৰ বৃদ্ধি ৰোধ কৰিব পৰা নাই৷ দিনক দিনে আক্ৰান্ত ৰোগীৰ সংখ্যা বৃদ্ধি হৈ গৈ আছে কিন্তু আক্ৰান্তৰ বিপৰীতে বহু সংখ্যক লোক ইতিমধ্যে সুস্থ হৈ নিজ নিজ ঘৰলৈ উভতি আহিছে ৷
উল্লেখযোগ্য যে ৰাজ্যখনত থকা চাহ বাগান সমুহতো বৰ্তমান ক'ভিড-১৯ ৰোগীৰ সংখ্যাও দিনক দিনে বৃদ্ধি পাই আহিছে৷ ইয়াৰ মুলতে আছে এই চাহ বাগিছাৰ অঞ্চল সমুহত বাস কৰা জনসাধাৰনৰ সজাগতাৰ অভাৱ৷ বৰ্ত্তমান সময়ছোৱা চাহ গছৰ পাত চিঙাৰ উপযুক্ত সময়৷ বাগান সমুহতপাত চিঙিবলৈ যোৱা বহু লোক ইতিমধ্যে ক'ভিড-১৯ ত আক্ৰান্ত হোৱা বুলি খৱৰ পোৱা গৈছে৷ বিশেষত: এই অঞ্চলসমূহত মাস্কৰ ব্যৱহাৰ তথা চেনিটাইজাৰৰ ব্যৱহাৰ ৰ সজাগতা আৰু উপযুক্ত শিক্ষা ৰ অভাৱৰ বাবে দিনক দিনে ক'ভিড-১৯ ত আক্ৰান্ত ৰোগীৰ সংখ্যা বৃদ্ধি পাইছে৷
চৰকাৰে উক্ত অঞ্চল সমুহত উপযুক্ত ব্যৱস্থা লৈ সজাগতা অভিযান তথা মাক্স-চেনিটাইজাৰ আদিৰ বিতৰন কৰি এই বৰ্ধিত লংক্ৰমণ ৰোধ কৰা ব্যৱস্থা কৰিলেহে অসমৰ চাহ উদ্যোগতোৱে স্বাভাৱিকভাৱে কাম কৰি থাকিব পাৰিব বুলি ৰাইজে মন্তৱ্য কৰিছে৷