ফখৰুল ইছলাম,দৰং
খাৰুপেটীয়াঃ অসম চৰকাৰৰ গৃহ বিভাগৰ অধীনত থকা সীমান্ত শাখাৰ আৰক্ষীৰ ষড়যন্ত্ৰত ভাৰতীয় সেনাৰ অৱসৰপ্ৰাপ্ত কেপ্টেইনেও অসম আৰক্ষীৰ সীমান্ত শাখাত কৰ্মৰত বিষয়া ম: সোনা উল্লাহৰ লগতে হাজাৰ হাজাৰ নিৰীহ ধৰ্মীয় আৰু ভাষিক সংখ্যালঘু সম্প্ৰদায়ৰ বৈধ নথি পত্ৰ থকা ভাৰতীয় নাগৰিকক একপক্ষীয়ভাৱে বিদেশী ঘোষণা কৰি ডিটেনশ্বন কেম্পত বন্দী কৰি ৰখাৰ প্ৰতিবাদত শনিবাৰে ইত্তেহাদ ফ্ৰন্ট দৰং জিলা সমিতিৰ উদ্যোগত খাৰুপেটীয়াত গৃহ বিভাগৰ দায়িত্বত থকা মুখ্যমন্ত্ৰী সৰ্বানন্দ সোণোৱালৰ প্ৰতিমূৰ্তি দাহ কৰি বিভিন্ন চৰকাৰ বিৰোধী শ্ল’গান দি খাৰুপেটীয়াৰ আকাশ বতাহ কপাই তোলে৷
মঃ সোনা উল্লাক বিনা চৰ্তে মুকলি কৰাৰ লগতে সীমান্ত আৰক্ষীৰ দায়িত্ব জ্ঞানহীনতাৰ বাবেই সোনা উল্লাহৰ দৰে হাজাৰ হাজাৰ নিৰীহ ধৰ্মীয় আৰু ভাষিক সংখ্যালঘু লোকে বিদেশী ন্যায়াধীকৰনত হাজিৰা দি দি জমৰ যাতনা সহ্য কৰিব লগা হৈছে। ছানাউল্লাহ যদি বিদেশীয়েই আছিল তেন্তে গৃহ বিভাগৰ অধীনস্থ অসম আৰক্ষীয়ে কেনেকৈ ছানাউল্লাহক ৩০ বছৰ পূৰ্বে সেনাত যোগদান কৰাৰ সময়ত পুলিচে প্ৰমাণ দিছিল৷
আনহাতে, বিদেশী এজনক কিয় ৩০ বছৰ দেশৰ নিৰাপত্তা বাহিনীত সেৱা আগবঢ়াব দিয়া হৈছিল? ১৯৭১ চনৰ ২৫ মাৰ্চ তাৰিখৰ পূৰ্বৰ বৈধ-শুদ্ধ নথি জমা দিয়াৰ পিছতো ছানাউল্লাহক ষড়যন্ত্ৰমূলকভাৱে বিদেশী সজোৱাই ডিটেনশ্বন কেম্পত বন্দী কৰা হৈছে। যিসময়ত প্ৰাক্তন সেনাজনে দেশৰ সাৰ্বভৌমত্ব ৰক্ষাৰ সেৱাত ব্ৰতী আছিল সেই সময়ত ব্যক্তিজনৰ সাক্ষী গ্ৰহণ কৰাৰ লগতে টিপ চহী মাৰি দেখুওৱাটোৱে প্ৰাক্তন সেনাজনৰ লগত যে চৰকাৰী পৃষ্ঠপোষকতাত ষড়যন্ত্ৰ কৰা হৈছে সেয়া স্পষ্টকৈ প্ৰমাণিত হয়।
সীমান্ত আৰু বিদেশী ন্যায়াধীকৰনে হাজাৰ হাজাৰ নিৰীহ ধৰ্মীয় আৰু ভাষিক সংখ্যালঘু লোকক ষড়যন্ত্ৰমূলক নীতিৰে মানসিক, আৰ্থিক নিৰ্যাতন চলাই আহিছে। এইক্ষেত্ৰত ইত্তেহাদ ফ্ৰন্টে ২৪ ঘন্টাৰ ভিতৰত প্ৰাক্তন সেনা মঃ ছানাউল্লাহক বিনা চৰ্তে মুকলি কৰাৰ লগতে সীমান্ত আৰক্ষী আৰু বিদেশী ন্যায়াধীকৰণৰ মইমতালি কঠোৰ হাতেৰে নিয়ন্ত্ৰণ কৰিবলৈ চৰকাৰক দাবী জনায়৷ সমান্তৰালকৈ ছানাউল্লাহৰ বিৰুদ্ধে ষড়যন্ত্ৰ কৰা চক্ৰটোক চিনাক্তকৰণ কৰি কঠোৰ শাস্তি প্ৰদান কৰিবলৈয়ো দাবী জনায়।
বিদেশীৰ নামত ১৯৭১ চনৰ ২৫ মাৰ্চ তাৰিখৰ পূৰ্বৰ বৈধ-শুদ্ধ নথি থকা সংখ্যালঘু সম্প্ৰদায়ৰ নিৰীহ ৰাইজক হাৰাশাস্তি বন্ধ কৰাৰ দাবীত দলগাঁও ৰাজহ চক্ৰৰ চক্ৰ বিষয়াৰ জৰিয়তে ৪ দফীয়া দাবী সম্বলিত এক স্মাৰক পত্ৰ অসমৰ মুখ্যমন্ত্ৰী সৰ্বানন্দ সোণোৱালক প্ৰেৰণ কৰে৷ স্মাৰক পত্ৰখনত উল্লেখ কৰা দাবী সমূহ হ’লঃ
(১) প্ৰাক্তন ভাৰতীয় সেনাৰ কেপ্টেইন তথা বৰ্তমানৰ সীমান্ত আৰক্ষীৰ সহ:উপ পৰিদৰ্শক ছানাউল্লাহক বিনা চৰ্তে ডিটেনশ্বন কেম্পৰপৰা মুকলি কৰি দিব লাগে৷
(২) একপক্ষীয়ভাৱে বিদেশী বুলি ৰায়দান দিয়া গোচৰ সমূহ উচ্চ ন্যায়ালয়ৰ ন্যায়াদীশৰ দ্বাৰা তদন্ত সমিতি গঠন কৰি তদন্তৰ জৰিয়তে প্ৰকৃত ভাৰতীয় নাগৰিকক ভাৰতীয় বুলি ৰায়দান ব্যৱস্থা গ্ৰহণ কৰিব লাগে৷
(৩) ভোটাৰ তালিকাত 'ডি' থকা ব্যক্তি সকলৰ চক্ৰ বিষয়াৰ জৰিয়তে নথি পত্ৰ পৰীক্ষাণ কৰি বৈধ নথি থকা ভাৰতীয় নাগৰিকৰ ভোটাৰ তালিকাত থকা 'ডি'সমূহ উঠাই দিয়াৰ ব্যৱস্থা গ্ৰহন কৰিব লাগে৷
(৪) উচ্চ পৰ্যায়ৰ তদন্তৰ জৰিয়তে মইমতালিৰ আশ্ৰয় লৈ ধৰ্মীয় ভাষিক সংখ্যালঘু লোকক হাৰাশাস্তি চলোৱা সিমান্ত আৰক্ষীৰ বিৰুদ্ধে কঠোৰ ব্যৱস্থা গ্ৰহণ কৰা৷
উক্ত দাবীসমূহ চৰকাৰে মানি নল’লে ইত্তেহাদ ফ্ৰন্টৰ সাধাৰণ সম্পাদক নুৰ ইছলাম, কাৰ্য্যকৰি সভাপতি আব্দুল ৰৌফ ,সাংগঠনিক সম্পাদক ছুলেমান আলীয়ে তীব্ৰ গনতান্ত্ৰিক আন্দোলন গঢ়ি তুলিবলৈ বাধ্য হ’ব বুলি প্ৰেছ বিজ্ঞপ্তিত প্ৰকাশ পাইছে৷