ডিফুঃ শংকৰ-আজানৰ দেশ অসমত সমন্বয় আৰু সম্প্ৰীতিৰ ধ্বজাবাহক অসম সাহিত্য সভাৰ ডিফু শাখাই পৱিত্ৰ ৰমজান মাহৰ লগত সংগতি ৰাখি সোমবাৰে ডিফু জামে মছজিদত ৰোজাদাৰ সকলৰ ইফতাৰ বিতৰণ কৰে৷ প্ৰায় শতাধিক ৰোজাদাৰৰ মাজত সাহিত্য সভাৰ দলটোৱে পোলাও, সুস্বাদু ফলমূল আৰু শীতল পানীয় বিতৰণ কৰে৷
ইফতাৰৰ পূৰ্বে মছজিদৰ ইমাম আলহাজ মৌলানা গিয়াছ উদ্দিন কাছিমীয়ে ৰাজহুৱা দোৱা প্ৰাৰ্থনা কৰি পৰম কৰুণাময় আল্লাহৰ ওচৰত গুণাহৰ মাফৰ বাবে প্ৰাৰ্থনা কৰাৰ লগতে পৱিত্ৰ ৰমজান মাহত অসম তথা কাৰবি আংলঙত শান্তি আৰু ভাতৃত্ব সম্পৰ্ক অধিক সুদৃঢ় কৰাৰ বাবেও কামনা কৰে৷
ইয়াৰোপৰি অৰাজনৈতিক সংগঠন ডিফুৰ সাহিত্য সভাৰ হৈ কাণ্ডাৰীসকলে সাংবাদিকৰ আগত উল্লেখ কৰি কয় যে পৱিত্ৰ ৰমজান মাহত ৰোজাদাৰ সকলৰ মাজত ডিফু সাহিত্য সভাৰপৰা ইফতাৰ বিতৰণৰ প্ৰধান উদ্দেশ্য হ'ল শংকৰ-আজানৰ আদৰ্শ লৈ গঢ়ি উঠা বৃহতৰ অসমীয়া জাতিৰ সম্প্ৰীতি আৰু সমন্বয়ৰ সেঁতুডাল অধিক কটকটীয়া কৰি সমাজত সকলোকে একে ঈশ্বৰৰ সন্তান ৰূপে আকোঁৱালি লৈ অগ্ৰসৰ হোৱা৷
ইফতাৰ পাৰ্টীত অংশ গ্ৰহণ কৰা ডিফু সাহিত্য সভাৰ সঁজাতি দলটোত আছিল কৰ্মে সভাপতি উদ্ধব মহন্ত, সম্পাদক ডা: ব্ৰক্ষ্মানন্দ বৰাৰ লগতে দেবেন কাকতি, পাৰি ৰংপি, হৰি মোহন জিগদুং, ডা: মেহতাব হুছেইন আৰু ডিম্বেশ্বৰ বৰা৷ কাৰ্যসূচীৰ আৰম্ভণিতে সাহিত্য সভাৰ দলটোত ডিফু মছজিদৰ হৈ উষ্ম আদৰণি জনাই সভাপতি তাজ উদ্দিন সহ মছজিদ কমিটিৰ অন্যান্য বিষয়া কৰ্মীসকলে৷
ছাইদুল ইছলাম, ডিফু