#শিৰোনামাটো দেখাত বা শুনাত অলপ আচহুৱা যেন লাগিব পাৰে৷ কিন্তু শিৰোনামাৰ আলমেৰে সোধা প্ৰশ্নৰ উত্তৰ পাঠকসকলে এই নিবন্ধত পাব ৷ বহুতৰে অন্নৰ কাঁহীত জলকীয়া নহলে পেটলৈ এমুঠি ভাতো নাযায়৷ আকৌ কেঁচা চালাড, চাটনি নাইবা সৰু সৰুকৈ কুটি লোৱা মাটি কঠাল, টেঙা আম  বা ৰবাৰ টেঙাৰ লগত জলকীয়া নহলে মুঠেই জুতি নাহে৷

পাকঘৰত আলু, পিয়াঁজ,আদা,নহৰুৰ সৈতে জলকীয়া নহলে ৰান্ধনিৰ নচলেই৷ আকৌ বহুতে অশুভ শক্তিক খেদিবলৈ ঘৰত, যান-বাহনত, দোকান আৰু ব্যৱসায়িক প্ৰতিষ্ঠানত জলকীয়াৰ মালা আঁৰি দিয়ে৷ আজিকালি জলকীয়াৰ পাউদাৰ বা স্প্ৰে মহিলাসকলক দুষ্টলোকৰ পৰা হাত সৰাৰ আত্মৰক্ষাৰ উপায় হিচাবে ৰাখিবলৈ পৰামৰ্শ দিয়া হয়৷ জলকীয়া ভক্ষণ কৰি আৰু চকুত সানি অসমৰে এগৰাকী মহিলাই নানান ৰেকৰ্ড গঢ়িছে আৰু বিশ্ব দৰবাৰত ইয়াৰ বাবেই স্বীকৃতি লাভ কৰিছে৷

বুৰঞ্জীয়ে জলকীয়াৰ বিষয়ে কি কয়? চুইডেনৰ Hakon Hjelmqvist নামৰ এজন পৌৰাণিক বনস্পতি বিজ্ঞানীয়ে ১৯৯৫চনত এটা প্ৰৱন্ধ লিখি জনায় যে খৃষ্টপূৰ্ব ৩০০বছৰৰো আগতেই ৰোমানসকলে জলকীয়াৰ সৈতে পৰিচিত আছিল৷ কিন্তু ইয়াৰ আগলৈকে বিশ্বই জানিছিল কলম্বচে কেৰিবিয়ান দ্বীপপুঞ্জৰ ৱেষ্ট ইণ্ডিজ পৰা জলকীয়াৰ সঁচ ইউৰোপলৈ ১৪৯৩চনত কঢ়িয়াই আনে৷ ইউৰোপৰ পৰা পৰ্টুগীজসকলে ভাৰত, ফিলিপাইন, জাপান, কোৰিয়া আৰু এচিয়াৰ বিভিন্ন দেশলৈ জলকীয়াৰ সঁচ কঢ়িয়াই নিয়ে৷

বিশ্বত সৰ্বাধিক জলকীয়া উৎপাদনকাৰী দেশৰ নামঃ ২০১৪চনত প্ৰকাশিত সমীক্ষামতে বিশ্বত ৩২ নিযুত টন কেঁচা জলকীয়াৰ আৰু প্ৰায় ৪নিযুত টন শুকান জলকীয়াৰ উৎপাদন হয়৷ ইয়াৰে ৫০শতাংশ উৎপাদিত হয় চীন দেশত৷ আমেৰিকা যুক্তৰাষ্ট্ৰ, ব্ৰিটেইন, ভাৰত, ট্ৰিনিডাড আদি হ'ল আন অধিক জলকীয়া উৎপাদনকাৰী দেশ৷ 

নামাৱলীঃ জলকীয়াৰ বৈজ্ঞানিক নাম হ'ল–Capsicum যাৰ ৫টা প্ৰজাতিৰ (Species) নাম হ'ল Capsicum annuum, Capsicum frutescens, Capsicum chineense, Capsicum pubescens, Capsicum baccatum৷  আকৌ বিশ্বত কমেও দুশ বিধ বেলেগ বেলেগ ধৰণৰ জলকীয়াৰ উপস্থিতিৰ কথা কৃষি বিজ্ঞানী সকলে ব্যক্ত কৰিছে৷

ই আলু, বিলাহী, বেঙেনাৰ সৈতে একে Solanaceae বা Nightshade family বংশৰ৷ অসমীয়াত জলকীয়া এনে কেইটামান নাম বেলেগ বেলেগ নামেৰে পৰিচিতঃ ভজলুক, লংকা, মৰিচ, ভোজনঠেলা, ভূঁই জালুক, মেম জলকীয়া আদি৷ আন আন ভাষাত জলকীয়াক মতা নাম হ'লঃ নাগামিজ-মেৰচা,বড়ো-বানজল্লো, কাৰ্বি-বিৰিক, মিচি -মূৰ চি, খাচি-চমকেন, মণিপুৰী মক সী, টিৱা-চালু৷

আন আন ভাৰতীয় ভাষাত ইয়াৰ পৰিচয় হ'ল-হিন্দী, মাৰাঠী, উৰ্দু আৰু পঞ্জাবী-মিৰচি, বাংলা-মৰিচ আৰু লংকা, গুজৰাটী-মৰচা, তামিল-ৱৰা আৰু পচাই মিলাগাই, মলয়ালম-পাচমুলাগো, ওৰিয়া-লিলা মৰচা, কোংকনি-তানৰিনি মিৰচাং, কানাড়া- হাচি মেনা চিনাকাই৷ ইংৰাজীত Chili, Chilli, Chilly, Chile, Chilli Pepper আদি৷ আন বিদেশী ভাষাত এইদৰে পৰিচিতঃ চীনা-লা জিয়াঅ' আৰু হাচিয়াম চিয়াঅ'৷ ইণ্ডোনেচিয়া-চাবে চবৰং৷ মালেয়চিয়া-লাডা কেৰাৱিট৷

জাৰ্মান, ফ্ৰান্স, চেক, ডেনিছ, হাংগেৰি, পোলিচ আৰু জাপানী-চিলি, পৰ্টুগীজ-পিমেন্টা৷ স্পেনিচ - চিলে৷ ৰাচিয়ান- পিৰেট চিলি৷ জলকীয়াত থকা উপাদানসমূহ কি কি ? ১০০ গ্ৰাম কেঁচা জলকীয়াত থাকে শক্তি ৪০কেলৰি৷ কাৰ্বোহাইড্ৰেট ৮-৮গ্ৰাম, প্ৰটিন ১-৯গ্ৰাম,ফেট ৪০০মিলিগ্ৰাম, ডায়েটেৰি ফাইবাৰ ১-৫গ্ৰাম৷ ভিটামিন-এ,ভিটামিন-বি৬, ভিটামিন-এ, ভিটামিন-ই, ভিটামিন-চি, বিটা কেৰটিন, আলফা কেৰটিন, লুটেন,ঝেনথচিন৷

খনিজ-আইৰণ ৮%,মেগনেচিয়াম ৬%,প'টেচিয়াম ৭%৷ পানীৰ পৰিমাণ ৮৮গ্ৰাম৷ জলকীয়াত থাকে কেপাচাইচিন(Capasaicin–8 methyl N vanillyl 6 nonenamide) নামৰ এক অতি লাগতিয়াল ৰাসায়নিক তত্ব৷ জলকীয়াৰ জলা গুণটো এই কেপাচাইচিনৰ বাবেই হয়৷ ১০০ গ্ৰাম জলকীয়াত ১গ্ৰামৰ পৰা ৬গ্ৰাম পৰ্য্যন্ত কেপাচাইচিন থাকে৷

আমি জলকীয়া খালে কেপাচাইচিনে মুখৰ ভিতৰত থকা বিষ অনুভৱ কৰা কেন্দ্ৰসমূহৰ (ৰিচেপ্তৰ) মাধ্যমেৰে মস্তিষ্কৰ ব্ৰেইনষ্টেম আৰু থেলামাচৰ লগত সংযোগ স্থাপন কৰে আৰু আমি জলকীয়াৰ গৰম পূৰণি প্ৰদান কৰা স্বাদক অনুভৱ কৰোঁ৷ High Performance Liquid Chromatography (HPLC)ৰ মাধ্যমেৰে বেলেগ বেলেগ জলকীয়াত থকাকেপাচাইচিনৰ শক্তিৰ পৰীক্ষা কৰা হয়৷

ইয়াৰ ইউনিটক Scoville Heat Unit (SHU) বুলে৷ অতিপাত চোকা আমেৰিকাৰ 'কেৰলিনা ৰিপাৰ'ৰ SHU হ'ল ২.২ নিযুত৷ ইয়াৰ বিপৰীতে ভোট জলকীয়াৰ SHU হ'ল ১.৫৮ নিযুত৷ জলকীয়া কি কি ধৰণে খাবলৈ প্ৰস্তুত কৰা হয়? ২০১৭বৰ্ষৰ আৰম্ভণিতেই এখন মেডিকেল চেমিনাৰৰ বাবে স্পেইনৰ বাৰ্চিলোনালৈ গৈছিলোঁ৷ তাত থকা কেউদিনেই দুয়োবেলাৰ আহাৰ বেলেগ বেলেগ ৰেষ্ট্ৰ'ৰাত কৰিছিলোঁ৷ সকলো ৰেষ্ট্ৰ'ৰাত এবিধ খাদ্য উমৈহতীয়া আছিল, সেইবিধ আছিল প্লেটত ভৰাই নিমখ-তেলত ভজা সেউজীয়া দীঘল দীঘল জলকীয়া৷

জলকীয়া কেঁচাই,ভাজি, পিচি বা শুকান গুৰি কৰি চচ,আচাৰ আদি কৰি নাইবা গৰম মছলাৰ দৰে ব্যৱহাৰ কৰা হয়৷ দেশে দেশে জলকীয়াক খাদ্যৰ বাবে ভিন্ন ভিন্ন ধৰণেৰে প্ৰস্তুত কৰে৷ জলকীয়াৰ পাতো খাবলৈ ব্যৱহাৰ কৰিব পাৰি৷ ইয়াৰ বিপৰীতে একে বংশৰ বিলাহীৰ পাত বিষাক্ত, খাব নোৱাৰি৷ ফিলিপাইনত Dahon ng sili নামেৰে জলকীয়াৰ পাতৰ চিকেন চুপ এক জনপ্ৰিয় খাদ্য৷

Kimchi হ'ল কোৰিয়াত বনোৱা জলকীয়া পাতৰ চুপজাতীয় খাদ্য৷ জাপানত Tsukudani নামেৰে জলকীয়াৰ সেউজীয়া পাত ৰান্ধে৷ ভূটানত Ema datsi নামেৰে নানাবিধ জলকীয়াৰ ব্যঞ্জন ৰন্ধা হয়৷ ইটালিত জলকীয়া-বিলাহীৰ চচ Arrabbiata নামেৰে বিখ্যাত৷ হাংগেৰিত চিকেনৰ লগত শুকান জলকীয়া  Paprika নামেৰে জনাজাত৷ চীনত Kung pao chicken ,মেক্সিকোত Mole poblano ,থাইলেণ্ডত Nam phrik, ইণ্ডোনেচিয়াত Sambal tersi হ'ল জলকীয়াৰে প্ৰস্তুত কৰা বিখ্যাত খাদ্য৷ এনেদৰে আৰু বহুতো দীঘল তালিকা আছে৷ 

জলকীয়াৰ বহুমুখী উপকাৰিতাৰঃ

*ৰক্তক্ষৰণ ৰোধ কৰাত সহায়ক৷
*হৃদৰোগ হ্ৰাস কৰে-ক'লেষ্টৰেল আৰু উচ্চ ৰক্তচাপ কমোৱাৰ দ্বাৰা৷
*বিষহাৰক-এন্টিইনফ্লেমেটৰী গুণযুক্ত৷
*পাচনতন্ত্ৰত সহায়ক৷ ভোক বঢ়ায়৷
*ওজন হ্ৰাস কৰাত সহায়ক৷ চৰ্বি গলোৱাত সহায় কৰে৷ 
*কৰ্কট ৰোগ প্ৰতিৰোধক৷
*ইমিউনিটি বঢ়ায়৷
*তেজৰ চুগাৰ নিয়ন্ত্ৰণত সহায়ক৷
*মনোদশা স্থিৰ ৰখাত সহায়ক-জলকীয়াই এণ্ডৰফিন নিৰ্গত কৰাৰ ফলত৷  
*চৰ্মৰ উজ্বলতা বঢ়ায় আৰু মুখমণ্ডলত বয়সৰ চাপ পৰিব নিদিয়ে৷
*ঘাঁ সোনকালে শুকায় ভিটামিন-চিৰ বাবে৷ 
*ভিটামিন-চিৰ বাবেই দাঁত মজবুট হয়৷
*আৰ্থাইটিচ জাতীয় হাঁড়ৰ বিষ কমায়৷
*চকুৰ ৰশ্মি বঢ়ায়৷

আন আন উপকাৰিতাঃ

*ফুলৰ বাগিচাত শুৱনি কৰিব পৰা বহুতো নানাৰঙী, নানান আকৃতিৰ জলকীয়া আছে৷ 
*শুকান গোবৰৰ পিঠাৰ সৈতে শুকান জলকীয়া জলালে তাৰ তীব্ৰ গোন্ধ হাতীয়ে সহ্য কৰিব নোৱাৰে৷ হাতীৰ ঘ্ৰাণশক্তি বৰ প্ৰবল৷ বনৰীয়া হাতীৰ আক্ৰমণৰ পৰা সুৰক্ষা পাবলৈ এনে ফলপ্ৰসু ব্যৱস্থা লব পাৰি৷
জলকীয়াৰ ক্ষেত্ৰত লবলগীয়া সতৰ্কতাঃ 
*অতি মাত্ৰাত সেৱন কৰিলে এচিডিটি,ডায়েৰিয়া হব পাৰে৷ 
*পাইলচ ৰোগৰ বাবে জলকীয়া হানিকাৰক৷

ডা০ ভূপেন শইকীয়া  
৩১ ডিচেম্বৰ ২০১৭, ডোহা, কাটাৰৰ পৰা      
যোগাযোগঃ drbksaikia@gmail.com  
আৰু ৱাটচএপ নম্বৰ ০৯৭৪৩৩৭৩৮৭২২
ৱেবচাইট www.drbhupensaikia.com