ধুবুৰীঃ কেৱল ধুবুৰীয়ে নহয়, সমগ্র অসমতে অভিনৱ কৌশলেৰে চলিছে থলুৱা মাছৰ নিধন যজ্ঞ। মৎস্য আইনক ভেঙুচালি কৰি এচাম লোকে আঠুৱা জালেৰে, কম পাহিৰ লানি জালেৰে কণীযুক্ত মাছৰ নিধন কাৰ্য অব্যাহত ৰখাৰ লগতে খাল-বিল, জলাশয় আদিত বিহ প্ৰয়োগ কৰিও এনে দুষ্কাৰ্য অব্যাহত ৰাখিছে।
ইয়াৰে আঠুৱা জাল ইমান ক্ষতিকাৰক যে এনে জালৰ স্পৰ্শত অগণন পোণা মাছৰ মৃত্যু হোৱাৰ লগতে জলাশয়ত মাছে এৰি দিয়া কণীৰো ক্ষতি হয়।
ইপিনে মিছা মাছ মাৰিবলৈ অভিনৱ কৌশলেৰে ৰাজ্যজুৰি ব্ৰহ্মপুত্ৰ নৈত বিহ দিয়াৰো বাতৰি পোৱা গৈছে। ব্ৰহ্মপুত্ৰৰ বোৱতী পানী সংলগ্ন খাৱৈ বা কম সোঁতযুক্ত দ পানীত বজাৰত পোৱা তীব্ৰ কীটনাশক বোকা মাটিৰ সৈতে মিহলাই দুষ্টচক্ৰৰ লোকে পানীত ছটিয়াই দিয়ে । ক্ষন্তেক পাছতেই বিষক্ৰিয়াৰ প্ৰভাৱ পৰা এলেকাত থকা মিছা মাছবোৰ পানী এৰি মাটিত উঠিবলৈ চেষ্টা কৰে।
নিৰ্দিষ্ট এলেকাটোৰ পৰা মিছা মাছবোৰ বুটলি লয় যদিও অন্য মাছবোৰ মৰি তাতেই পচি যায় বা ভাঁহি যায়। বিহ প্ৰয়োগ কৰা এলেকাটোত পৰৱৰ্তি তিনি সপ্তাহলৈকে কোনো ধৰণৰ মাছৰ আগমন দেখা পোৱা নাযায়।
ইফালে আঠুৱা জালৰ প্ৰভাৱ আনফালে কীটনাশকৰ প্ৰয়োগৰ ফলত ব্ৰহ্মপুত্ৰ থলুৱা মাছৰ বিপন্নপ্ৰায় অৱস্থা হৈছে। থলুৱা মাছৰ প্ৰতি চৰম ভাবুকি হিচাপে দেখা দিয়া এই দুটা দুষ্কাৰ্য বন্ধ কৰিব নোৱাৰিলে এসময়ত এনে মাছৰ যে অসমত বিলুপ্তি নঘটিব সেয়াও নুই কৰিব নোৱাৰি।
মাছৰ সুৰক্ষা তথা উৎপাদন বৃদ্ধিৰ বাবে ৰাজ্যত মীন বিভাগ থকাৰ লগতে মীন আইন আছে যদিও কাৰ্যতঃ সফল নোহোৱাত থলুৱা মাছৰ বিলুপ্তপ্ৰায় অৱস্থা হোৱা বুলি ৰাজহুৱা অভিযোগত প্ৰকাশ পাইছে। প্ৰতিবেশী ৰাষ্ট্ৰ বাংলাদেশত এনে মীন আইনৰ সফল প্ৰয়োগ হোৱাৰ সময়তে আমাৰ অসমত এনে আইন বাস্তৱত অসাৰ হোৱা ঘটনা বিভাগটোৰ অকৰ্মণ্যতৰ চিন বুলি ৰাইজে অভিযোগ উত্থাপন কৰিছে।