কাজিৰঙাঃ ৰাজ্যৰ সৰ্বত্ৰে আজিও অপৰিৱৰ্তিত বিকশিত অসমৰ অবিকশিত ৰূপ৷ স্বয়ং কৃষিমন্ত্ৰী অতুল বৰাৰ সমষ্টিতে থকা তিলমাত্ৰও উন্নয়নৰ পোহৰ নপৰা এখন গাঁৱে উদঙাই দেখুৱাইছে বিকশিত অসমৰ এখন ফোঁপোলা ছবি৷ বোকাখাত মহকুমাৰ কাজিৰঙাৰ অগৰাতলি বনাঞ্চলৰ গাতে লাগি থকা এই গাঁওখনৰ নাম কান্ধুলিমাৰী গাঁও৷
স্বাধীনতাৰ ৭২ বছৰৰ পাছটো কান্ধুলিমাৰী গাঁৱত নপৰিল উন্নয়নৰ এচিকুটমানো পোহৰ৷ পূৱ কাজিৰঙা গাঁও পঞ্চায়তৰ অধীনৰ এই গাঁওখন সকলো দিশৰ পৰাই আজিও উপেক্ষিত৷ বাট-পথৰ দুৰৱস্থাই বছৰ-বছৰ ধৰি গাঁওবাসীক যমৰ যাতনা ভূগাই আহিছে৷ বিগত ১৫ বছৰীয়া কংগ্ৰেছ চৰকাৰৰ শাসন কালত গাঁওখনৰ বাট-পথ সমূহ সুচল কৰি তুলিবলৈ গাঁওখনৰ ৰাইজে বহুবাৰ আবেদন-নিবেদন কৰা স্বত্বেও কোনো সুফল নাপালে৷ আনহাতে, পৰিৱৰ্তনৰ শ্ল’গান দি দিছপুৰৰ মচনদ দখল কৰা বিজেপি নেতৃত্বাধীন চৰকাৰৰ ওচৰটো হাজাৰটা আবেদন-নিবেদন কৰি কৰি কান্ধুলিমাৰী ৰাইজ সম্প্ৰতি ভাগৰি পৰিল৷
