♦ নগাঁৱত কেজিয়েপ্ৰতি দাম উঠিল পাঁচশলৈ

জয়ন্ত মুদৈ, নগাঁওঃ বসন্তৰ আগমনৰ লগে লগেই প্ৰকৃতিয়ে ন-সাজ পিন্ধি ব’হাগত আদৰণি জনোৱাৰ সময়তে অসমীয়া সমাজত আদৰ বাঢ়ে সকলোৰে পৰিচিত ৰঙচুৱা পতংগ 'আমৰলি' কেইটাৰ৷ কিয়নো, আমৰলি টোপ কেৱল সু-স্বাদুয়েই নহয়, বৰং ই মহৌষধো৷

জনবিশ্বাস মতে, বসন্ত ঋতুত আমৰলি টোপ ভক্ষণ কৰিলে বসন্ত ৰোগৰ উপৰি আন আন বহু ৰোগৰপৰা পৰিত্ৰাণ পাব পাৰি৷ কাজেই, গৰুবিহুৰ দিনাখন স্বাভাবিকতেই অসমীয়াৰ মাজত আমৰলি টোপ ভক্ষণৰ বাবে তৎপৰতা বৃদ্ধি পোৱা দেখা যায়৷

চহৰাঞ্চল কিম্বা গ্ৰামাঞ্চল সকলোতেই এতিয়া আমৰলি পৰুৱাৰ বাহ অথবা টোপ দুৰ্লভ হৈ পৰা দেখা গৈছে৷ গছ-গছনি ধ্বংস কিম্বা আন বহু কাৰকৰ বাবেই এইবিধ পতংগৰ জনসংখ্যা দিনক দিনে কমি অহাত ব’হাগ বিহুৰ সময়ত ইয়াৰ এখন সুকীয়া বজাৰ গঢ়ি উঠে বিহুক কেন্দ্ৰ কৰি৷

ঠাইভেদে চ’ত বা ব’হাগ মাহত এই টোপ পোৱা যায় যদিও অধিকাংশ স্থানতে ই বিলাসী সামগ্ৰীত পৰিণত হৈ পৰে বিহুৰ সময়ত পৰ্যাপ্তৰূপত নোপোৱাৰ বাবেই৷ তদ্ৰুপ, প্ৰকৃতিৰ ধাৰাবাহিক তাণ্ডৱৰ হেতু লাহে লাহে নগাঁও জিলাত আমৰলি টোপ দুৰ্লভ হৈ পৰাত ইয়াৰ চাহিদা আজি মাছ-মাংসকো চেৰাই যোৱা পৰিলক্ষিত হয়৷

কাৰণ, আজি নগাঁৱৰ ঠায়ে ঠায়ে আমৰলি টোপ বিচাৰি গ্ৰাহকে হাবাথুৰি খোৱাৰ বিপৰীতে একাংশ ধনৱান ব্যক্তিয়ে অত্যাধিক দামটো এইবিধ সামগ্ৰী ক্ৰয় কৰাৰ ব্যৱস্থা কৰে৷ 

প্ৰাপ্ত তথ্য মতে, জিলাখনৰ কোনো কোনো ঠাইত আমৰলি টোপ কেজিয়েপ্ৰতি ৩-৫ শ টকা পৰ্যন্ত দৰ উঠে৷ সি যি নহওক, ৰাজ্যৰ সৰ্বত্ৰে ৰঙালীক আদৰাৰ নিমিত্তে সকলোয়ে ব্যাপক তৎপৰতা চলোৱাৰ সময়তে নগাঁৱৰ জনতাই এইবিধ সামগ্ৰী বিচাৰি হামৰাও কঢ়া বিষয়টোৱে কিন্তু বিশেষ তাৎপৰ্য বহন কৰিবলৈ সক্ষম হৈছে৷