Printer-friendly version

♦ সদৌ অসম ভিত্তিত অনুষ্ঠিত হ’ব বিহুৱতী-বিহুকন্যা প্ৰতিযোগিতা

জয়ন্ত মুদৈ, নগাঁওঃ নগাঁও জিলাৰ বেবেজীয়াৰ সমীপৰ ডিমৌ চাৰিআলিৰ নাট্যশ্ৰী উমাৰাম কাকতি নাট্য চ’ৰাত বিগত বৰ্ষবোৰৰ দৰে এইবাৰো অহা ১০ মে’ত দিনযোৰা বিস্তৃত কাৰ্যক্ৰমণিকাৰে ডিমৌ চাৰিআলি আঞ্চলিক ৰঙালী বিহু উৎসৱটি উদযাপনৰ দিহা কৰা হৈছে৷

এই মৰ্মে উৎসৱটি সুচাৰুৰূপে পৰিচালনা কৰাৰ অৰ্থে ইতিমধ্যে লক্ষ্মীকান্ত দাসক সভাপতি, ৰাজীৱ দাসক কাৰ্যকৰী সভাপতি আৰু চানু ডেকাক সম্পাদক হিচাপে লৈ এখনি শক্তিশালী উদযাপন সমিতি গঠন কৰা হৈছে।

প্ৰকাশিত কাৰ্যসূচী অনুসৰি সেই দিনা পুৱা ৬ বজাত বিহু পতাকা উত্তোলনেৰে উৎসৱটিৰ পাতনি মেলাৰ পাছতে ছহিদ তৰ্পণ কাৰ্যসূচী ৰূপায়ণ কৰা হ’ব৷ পুৱা ৭ বজাত জয়কৃষ্ণ ডেকাৰ স্মৃতিত মাৰাথন দৌৰ প্ৰতিযোগিতা আৰু ১১ বজাত ছাত্ৰ-ছাত্ৰীৰ মাজত চিত্ৰাংকন প্ৰতিযোগিতা অনুষ্ঠিত হ’ব। 

বিয়লি ২ বজাত স্থানীয় শিল্পীসকলৰদ্বাৰা বাৰেৰহণীয়া সাংস্কৃতিক অনুষ্ঠান অনুষ্ঠিত হ’ব৷ সন্ধ্যা ৬ বজাত সম্বৰ্ধনা অনুষ্ঠানৰ লগতে মুকলি বিহু আৰু জনগোষ্ঠীয় নৃত্য প্ৰদৰ্শনৰ অন্তত নিশা ৮ বজাৰপৰা সদৌ অসম ভিত্তিত বিহুৱতী আৰু বিহুকন্যা প্ৰতিযোগিতা অনুষ্ঠিত হ’ব৷ 

বিহুৱতী প্ৰতিযোগিতাত প্ৰথম পুৰস্কাৰ হিচাপে নগদ ১২,২২২ টকা, দ্বিতীয় পুৰস্কাৰ হিচাপে নগদ ৭০০১ টকা আৰু তৃতীয় পুৰস্কাৰ হিচাপে নগদ ৫০০১ টকাৰ লগতে একোখনকৈ মানপত্ৰ প্ৰদান কৰাৰ বিপৰীতে বিহুকন্যা প্ৰতিযোগিতাত প্ৰথম, দ্বিতীয় আৰু তৃতীয় পুৰস্কাৰ হিচাপে ক্ৰমে নগদ ৫৫৫৫ টকা,৩০০১ টকা আৰু ২০০১ টকাৰ লগতে একোখনকৈ মানপত্ৰ প্ৰদান কৰা হ’ব৷ উৎসৱৰ সকলো কাৰ্যসূচীতে ৰাইজৰ উপস্থিতি উদ্যোক্তাসকলে আন্তৰিকতাৰে কামনা কৰিছে।