নগাঁওঃ বাটৰ বিহুক কেন্দ্ৰ কৰি এতিয়া উদুলি-মুদুলি হৈ পৰিছে নগাঁও জিলাৰ বেবেজীয়াৰ দাঁতি কাষৰীয়া বৰক'লা অঞ্চলবাসীৰ পদূলি। অঞ্চলটোক উজ্বলাই তোলা হাৰিয়া নৈৰ পাৰে পাৰে বৈছে উছাহৰ ঢল। আঠটাকৈ সম্প্ৰদায়ে শান্তি-সম্প্ৰীতিৰে বসবাস কৰা বৃহত্তৰ অঞ্চলটোৰ সাংস্কৃতিক সমন্বয়ৰ সেঁতু 'প্ৰয়াস'ৰ উদ্যোগত আৰু বৰক'লা উচ্চতৰ মাধ্যমিক বিদ্যালয়ৰ পৃষ্ঠপোষকতাত বিগত কেইবাদিনো ধৰি অনুষ্ঠিত হৈ থকা বিহু কৰ্মশালাৰ সামৰণিৰ অংশ হিচাপে শনিবাৰে বিয়লি ঐতিহ্যমণ্ডিত বৰক'লা অঞ্চলৰ ছটাকৈ স্থানত পৰিৱেশন কৰা হয় বাটৰ বিহু। 

কৰ্মশালাত অংশগ্ৰহণ কৰা চাৰি কুৰিৰো অধিক প্ৰশিক্ষাৰ্থীক লৈ পৰিৱেশন কৰা এই বাটৰ বিহুৱে হাৰিয়া নৈৰ পাৰে পাৰে উছাহৰ ঢল বোৱাবলৈ সক্ষম হয়। বৰক'লা উচ্চতৰ মাধ্যমিক বিদ্যালয়ৰ চৌহদৰ বকুল তলত প্ৰয়াসৰ সভাপতি যুগ প্ৰসাদ বৰদলৈয়ে পতাকা উত্তোলন কৰাৰ পিছতেই এই বাটৰ বিহু আনুষ্ঠানিকভাৱে উদ্ধোধন কৰে সাংবাদিক জ্যোতিপ্ৰসাদ বৰাই।

উদ্ধোধনী ভাষণ প্ৰসংগত সাংবাদিক বৰাই অসমীয়া জাতি ৰক্ষা কৰিবলৈ হ'লে বিহুকো জীয়াই ৰাখিব লাগিব বুলি উল্লেখ কৰাৰ লগতে বিহুক সমাজ সংগঠিত কৰাৰ এক অন্যতম উপাদান বুলি অভিহিত কৰে। বৰক'লা উচ্চতৰ মাধ্যমিক বিদ্যালয়ৰ অধ্যক্ষ প্ৰতাপ সিঙে আদৰণি ভাষণ প্ৰদান কৰা আৰু প্ৰয়াসৰ মুখ্য সম্পাদক ভদ্ৰকান্ত ডেকাই সামগ্ৰিকভাৱে পৰিচালনা কৰা এই বাটৰ বিহু বৰক'লা উচ্চতৰ মাধ্যমিক বিদ্যালয়ৰ চৌহদৰ বকুল তলত আৰম্ভ হোৱাৰ পিছতে ক্ৰমানুসৰি অঞ্চলটোৰ ছটাকৈ স্থানত পৰিৱেশন কৰা হয়। 

বৈদ্যপুখুৰীৰ পাৰ, পূব বৰক'লাৰ যুৰীয়া আহঁতৰ তল, পালেংতলিৰ যোৰ পুখুৰীৰ পাৰ, হীৰাগাঁৱৰ নামঘৰ চৌহদ, আদৰ্শ লালুং গাঁৱৰ বিহুতলী পথাৰ আৰু কচুৱৈগুৰিৰ মুকলি পৰিবেশত পৰিৱেশন কৰা এই বাটৰ বিহুত অগণণ লোকে স্বতস্ফূৰ্তভাৱে উবুৰি খাই পৰা পৰিলক্ষিত হয়। উল্লেখ্য যে, কালিলৈ বিয়লি ২ বজাৰপৰা অনুষ্ঠিত হ'বলগীয়া মুকলি সভা আৰু মুকলি বিহুৰে 'প্ৰয়াস'ৰ এই বিহু বিষয়ক বিস্তৃত কাৰ্যসূচীৰ পৰিসমাপ্তি ঘটিব।